ގައުމުގެ ކަންކަން ތަރުތީބު ކުރަން ބޭނުންވާ ކަމަށް ވާނަމަ، އެންމެ ފުރަތަމަ ޖެހެނީ އެމްޑީޕީގެ އެތެރެ ރަނގަޅަށް ތަރުތީބު ކުރަން ކަމަށް އެމްޑީޕީގެ ކުރީގެ ނައިބު ރައީސް މުޙައްމަދު ޝިފާޒު ރޭ ވިދާޅުވެއްޖެއެވެ. އެސްއެސްޓީވީގެ ބާރު ހަތަރެއް ފްރޮގްރާމުގައި ވާހަކަ ދައްކަވަމުން ދާދި ފަހުން އެމްޑީޕީއާ އަލުން ގުޅިވަޑައިގެންނެވި ޝިފާޒު ވިދާޅުވީ، އެމްޑީޕީއަށް ވާ ގޮތް ގައުމަށް ވާނެ ކަމަށާއި އެއީ ހަގީގަތް ކަމަށެވެ. އެގޮތުން، އެމްޑީޕީގެ ތެރޭގައި މަސްލަހަތެއް ނެތިއްޔާ ގައުމުގެ މަސްލަހަތެއް ނޯންނާނެ ކަމަށާއި ގައުމު ރޫޅޭނެ ކަމަށް އޭނާ ވަނީ ވިދާޅުވެފައެވެ. އެހެންވީމާ އެމްޑީޕީ ތެރެ ވަރަށް ރަނގަޅަށް ތަރުތީބުވެގެން މަސައްކަތް ކުރަން އެބަ ޖެހޭ ގައުމު ތަރުތީބު ކުރާ ކަމަށް ވަންޏާ. މި ސަރުކާރު ހަމަ މަގަށް އަޅުވައި، މި ހާލަތުން އަޅުގަނޑުމެންގެ ރާއްޖެ ސަލާމަތް ކުރަންޏާ އަޅުގަނޑުމެން ޖެހޭ ފުރަތަމަ އެކަން ކުރަން އެންމެ މުހިންމު މަސައްކަތެއް ގޮތުގައި އެ ޕާޓީން ކުރަން ޖެހޭ ކަމަށް ގަބޫލުކުރަނީ ސަރުކާރު ހަމަ މަގަށް އެޅުވުމަށް ކުރަން ޖެހޭ މަސައްކަތްތަކަށް, އެމްޑީޕީގެ ޖޯޝާއި ފޯރި ހޯދުން ކަމަށާއި ހަރުދަނާ އޮޕޮޒިޝަނެއް ގޮތުގައި ފެނުން ކަމަށް އޭނާ ވިދާޅުވިއެވެ. އަދި، އުންމީދަކީ އެ މަގަށް މަސައްކަތް ކުރުން ކަމަށް ޝިފާޒު ވަނީ ވިދާޅުވެފައެވެ. މީގެއިތުރުން، އެނބުރި އެމްޑީޕީއާ ގުޅުމަށް ފަހު މަސައްކަތް ކުރާނީ ގަބޫލު ކުރާ ހަމަތަކުގެ ތެރޭގައި ކަމަށް ޝިފާޒް ވިދާޅުވިއެވެ.