ގެދޮރުވެރިޔާ ސްކީމުގެ ދަށުން ހުޅުމާލޭގަައި އިމާރަތްކުރަމުން އަންނަ 4،000 ފްލެޓަށް ޝަރުތު ހަމަވާ މީހުންގެ ލިސްޓު ކުރިއަށް އޮތް ރޯދަމަހުގެ ކުރިން އާންމުކުރައްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.ރައީސް އެހެން ވިދާޅުވީ، ހުވަދު އަތޮޅުގެ ބައެއް ރަށްތަކަށް ކުރެއްވި ދަތުރުފުޅު މިއަދު ނިންމަވާލެއްވުމަށް ފަހު އެނބުރި މާލެ ވަޑައިގަތުމުގެ ކުރިން، އެ މަނިކުފާނާ އެކު ދިޔަ ނޫސްވެރިންނާ ވާހަކަފުޅު ދައްކަވަމުންނެވެ.ކުރީ ސަރުކާރުގައި މާލެ ސަރަހަރައްދުގައި ދިރިއުޅޭ މީހުންނަށް ފްލެޓު ދިނުމަށް ހިންގި 'ގެދޮރުވެރިޔާ' ސްކީމުގެ ދަށުން ފްލެޓު ލިބޭ މީހުންގެ ލިސްޓު އާންމުކޮށް ފްލެޓު ދޫކުރުމުގެ މަސައްކަތުގެ އެންމެ ފަހުގެ މަސައްކަތްތަކާ ގުޅޭ ގޮތުން ނޫސްވެރިޔަކު ކުރި ސުވާލަކަށް ޖަވާބު ދެއްވަމުން ރައީސް ވިދާޅުވީ އެ މަނިކުފާނު ވައުދުވެވަޑައިގެންނެވި ގޮތަށް އެ މަސައްކަތް ކުރަން މިހާރު ފަށާފައިވާ ކަމަށެވެ."އަޅުގަނޑު ވައުދުވީ އެއްވެސް ރައްޔިތަކަށް ދީފައިވާ ގޯއްޗެއް، ފްލެޓެއް އަޅުގަނޑުމެންނެއް އަތެއް ނުލާނަމޭ. ދެން އަބަދު ވެސް އޮންނަ ހަމައެކޭ އެންމެ ކުރިން ފެށިގެން ވެސް ނުގަވައިދުން، މަކަރު ހަދައިގެން، ދޮގު ހަދައިގެން ފޯޖު ޑޮކިއުމެންޓު ލައިގެން، މިކަހަލަ ގޮތަކަށް މީހަކު ފްލެޓެއް ނޫނީ ގޯއްޗެއް ހޯދާފައި އޮވެއްޖެ ނަމަ އެއީ ކެންސަލްވާނެ އެއްޗެއް،" އެ މަނިކުފާނު ވިދާޅުވި އެވެ."އެކަހަލަ ކަންތައްތަކެއް ހިނގާފައި ހުރިއްޔާ ނޫނީ އޭސީސީން އެ ބެލި ބެލުންތަކުގެ ތެރެއިން ގޯސްކޮށް ކަމެއް ކޮށްފައި ހުރި ބަޔަކު ފިޔަވާ އެންމެންނަށް ވެސް އަޅުގަނޑު ވައުދުވި ގޮތަށް [ގޯއްޗާއި ފްލެޓު] ދޭން ބޭނުންވަނީ."ކުރިއަށް އޮތް ދުވަސްތަކުގައި އެ މަސައްކަތް ވަރަށް ބާރަށް ކުރިއަށް ގެންދަވާނެ ކަމަށް ރައީސް ވިދާޅުވި އެވެ.އެންމެ ފަހުން އެ މައްސަލާގައި މިނިސްޓްރީން ބުނީ ގެދޮރުވެރިޔާ ސްކީމުގެ ދަށުން ފްލެޓް ލިބޭ ކަމަށް އިއުލާން ކުރި ދާއިމީ ލިސްޓުގައި ކޮރަޕްޝަނަށް މަގުފަހިވާ ކަންތައްތަކެއް ހުރި ކަމަށް ތުހުމަތުކޮށް، އާންމު ފަރާތްތަކުން އޭސީސީ އަށް ހުށަހަޅާފައިވާ މައްސަލައާ ގުޅިގެން އެ ކޮމިޝަނުން މިނިސްޓްރީ އަށް އަންގާފައިވާ ކަންކަން ބެލުމުގެ މަސައްކަތް ކުރަމުން އަންނަ ކަމަށެވެ.އެ ލިސްޓު މުރާޖައާ ކުރުމުގެ މަސައްކަތް ކުރަމުން އަންނަނީ ރައީސް މުއިއްޒުގެ ލަފާފުޅުގެ މަތިން އެކުލަވާލާފައިވާ ހައުސިން އެޑްވައިޒަރީ ކޮމިޓީ އާއި ހައުސިން ކޮންސަލްޓޭޓިވް ކޮމިޓީގެ ލަފާގެ މަތިން ކަމަށް މިނިސްޓްރީން ބުނެފައިވެ އެވެ.ގާތްގަނޑަކަށް މަސައްކަތް އެއްކޮށް މިހާރު ނިމިފައިވާ އެ ފްލެޓުތަކަށް ހުޅުވައިލި މުއްދަތުގައި ކުރިމަތިލި 20،697 މީހުންގެ ތެރެއިން 18،167 މީހުން ފްލެޓަށް ޝަރުތު ހަމަވާ ކަމަށް ކުރީގެ ސަރުކާރުން އޮތީ ބުނެފަ އެވެ.ނަމަވެސް، ފްލެޓުތަކާ ގުޅިގެން އޭސީސީ އަށް ހުށަހެޅި ޝަކުވާތަކާ ހެދި ކުރި ދެ މަސް ދުވަހުގެ ތަހުގީގުން އެނގޭ ގޮތުގައި ފްލެޓް ލިބޭ ކަމަށް އާންމުކުރި ދާއިމީ ލިސްޓުގައިވާ 4،000 މީހުންގެ ތެރޭގައި ހިމެނޭ 60 ޕަސެންޓް މީހުންނަކީ މަކަރާއި އޮޅުވައިލުމުގެ ތެރެއިން ފްލެޓް ކަށަވަރުކުރި މީހުންނެވެ. އެއީ ހައްގުވެރިންނެއް ނޫން ކަމަށް އޭސީސީން ބުނެފައި ވެ އެވެ.