ޗާންދަނީ މަގުގައި ހުންނަ އެމްޑީޕީގެ ހަރުގެއަށް ކަޅުތެޔޮ ޖެހި މައްސަލަ ފުލުހުން ބަލަން ފަށައިފިއެވެ.
ފުލުހުން ބުނީ، ރޭ ދަންވަރު 00:59 ހާއިރު ޗާންދަނީ މަގުގައި ހުންނަ އެމްޑީޕީ ދަނޑިކޮށި ޖަގަހައަށް ކަޅު ތެޔޮ ޖެހި މައްސަލަ ފުލުހުންނަށް ރިޕޯޓްކޮށްފައިވާ ކަމަށެވެ.
އަދި އެ މައްސަލަ ފުލުހުން ތަހުގީގު ކުރަމުންދާ ކަމަށްވެސް ވަނީ ބުނެފައެވެ.
އެމްޑީޕީ ޖަގަހައަށް ކަޅުތެޔޮ ޖަހާފައި މިވަނީ ވަގު ފޯމު ފުރައިގެން އެމްޑީޕީގެ ދަފްތަރުގައި ތިބި މެންބަރުން އެހެން ޕާޓީތަކަށް ވައްދާ މައްސަލައިގައި އިދިކޮޅުން ހިންހަމަނުޖެހުން ފާޅުކޮށް، އެކަމާ ދެކޮޅަށް އަޑު އުފުލަމުންދާ ދަނޑިވަޅެއްގައިކަން ފާހަގަކޮށްލެވެއެވެ.
އެގޮތުން އެ ޖަގަހައިގެ ގޭޓުގައި ޕީއެންސީ އަށް މެންބަރުން އިތުރު ކުރަން ވަގު ފޯމްތަކެއް ހުށަހަޅާފައިވާ މައްސަލައިގައި ތުހުމަތުވާ މީހުންގެ ފޮޓޯ ވެސް ވަނީ ހިއްޕާފައެވެ.
ޕީއެންސީއަށް ވަގަށް ވެއްދި މީހުންގެ ތެރޭގައި ރައްޔިތުންގެ މަޖިލީހުގެ ވައިކަރަދޫ ދާއިރާގެ އެމްޑީޕީ މެންބަރު ހުސެއިން ޒިޔާދު އާއި އެމްޑީޕީގެ ގައުމީ މަޖިލީހުގެ މެންބަރަކާއި އާންމު ގިނަ މެންބަރުން ހިމެނެ އެވެ. މި މައްސަލައާ ގުޅިގެން ހުރި ކަންބޮޑުވުންތައް އިދިކޮޅު އެމްޑީޕީން ވަނީ މިދިޔަ ހަފުތާގައި އިލެކްޝަންސް ކޮމިޝަނާ ވެސް ހިއްސާކޮށްފައިވެއެވެ.
ދޭދޭ ސިޔާސީ ޕާޓީގެ މެދުގައި ހިނގާ އެކިއެކި ހިޔާލުތަފާތުވުންތަކުގައި މީގެ ކުރިން ވެސް ޖަގަހަތަކަށް ކަޅުތެޔޮ ޖަހާ ގެއްލުންދީފައި ވެއެވެ.