އިންޑިއާގެ އިލެކްޓްރޯނިކް އުފެއްދުންތަކުގެ ސިނާއަތް ފުޅާކޮށް، ދުނިޔޭގެ ފެންވަރުގައި ވާދަވެރި ގައުމަކަށް ވުމަށްޓަކައި 4.6 ބިލިއަން ޑޮލަރު ނުވަތަ ގާތްގަނޑަކަށް 386 ބިލިއަން އިންޑިއަން ރުޕީސްގެ އައު މަޝްރޫއުތަކަކަށް އިންޑިއާ ސަރުކާރުން ހުއްދަ ދީފިއެވެ. މިއީ އިލެކްޓްރޯނިކް ކޮމްޕޯނަންޓް ނުވަތަ އިލެކްޓްރޯނިކް ސާމާނު އުފެއްދުމަށް ބޭނުންވާ ބައިތައް އިންޑިއާގައި އުފެއްދުމަށް ބާރުއެޅުމުގެ ގޮތުން އެގައުމުގެ ސަރުކާރުން ނިންމި މުހިންމު ނިންމުމެކެވެ. މި މަޝްރޫއުތަކުގެ އެންމެ ބޮޑު އެއް މަގުސަދަކީ، "މޭކް އިން އިންޑިއާ" ސިޔާސަތުގެ ދަށުން އެ ގައުމުގެ އަމިއްލަ އުފެއްދުންތެރިކަން އިތުރުކޮށް، ޗައިނާ ފަދަ އެހެން ގައުމުތަކުން އެތެރެކުރާ އިލެކްޓްރޯނިކް ސާމާނަށް ބަރޯސާވުން ކުޑަކުރުމެވެ. މިކަމުގެ ސަބަބުން އިންޑިއާގެ ސަޕްލައި ޗެއިން ވަރުގަދަވެ، ބޭރުގެ އިމްޕޯޓްތަކަށް ބަރޯސާނުވެ އަމިއްލަ ފައިމައްޗަށް ތެދުވުމަށް މަގުފަހިވެގެންދާނެއެވެ. https://sun.mv/168467 މި މަޝްރޫއުތަކުގެ ސަބަބުން އިގްތިސާދީ ގޮތުން ވެސް ބޮޑެތި ކުރިއެރުންތަކެއް ލިބިގެންދާނެ ކަމަށް ބެލެވެއެވެ. އެގޮތުން މި ދާއިރާ ފުޅާވުމާ ގުޅިގެން ޓެކްނޮލޮޖީގެ ރޮނގުން ގިނަ އަދަދެއްގެ އައު ވަޒީފާތައް އުފެދި، ފަންނީ ގޮތުން ގައުމު ކުރިއަރައިގެން ދިއުމަށް ފުރުސަތު ހުޅުވިގެންދާނެއެވެ. މިއީ ދިގު މުއްދަތަކަށް ބަލާއިރު އިންޑިއާގެ އިގްތިސާދަށް ލިބޭނެ ބޮޑު ކުރިއެރުމެކެވެ. މި ނިންމުމާއެކު، ސެމިކޮންޑަކްޓަރާއި ޗިޕް ފަދަ ތަކެތި އުފެއްދުމުގެ މަސައްކަތަށް އިތުރު ދިރުމެއް ލިބިގެންދާނެ ކަމަށް މާހިރުން ލަފާކުރެއެވެ. އިންޑިއާއިން މިހާރުވެސް ގެންދަނީ އެޕަލް ފަދަ ދުނިޔޭގެ ބޮޑެތި ކުންފުނިތަކުގެ އުފެއްދުންތައް އެ ގައުމުގައި އެސެމްބްލް ކުރުމުގެ ފުރުސަތު ފުޅާކުރަމުން ކަމަށްވާއިރު، އަލަށް ފެށޭ މި މަޝްރޫއުތަކަކީ އެ މިސްރާބަށް އެޅޭ މުހިންމު ފިޔަވަޅެކެވެ. އިންޑިއާގެ ބޮޑުވަޒީރު ނަރެންދުރަ މޯދީގެ ސަރުކާރުން ފާއިތުވި އަހަރުތަކުގައި ގެންދަނީ އެ ގައުމަކީ ދުނިޔޭގެ އިލެކްޓްރޯނިކްސް ހަބަކަށް ހެދުމަށް ގިނަގުނަ މަސައްކަތްތަކެއް ކުރަމުންނެވެ. ޚާއްސަކޮށް "މޭކް އިން އިންޑިއާ" ސިޔާސަތުގެ ދަށުން، ބޭރުގެ އިންވެސްޓަރުންނަށް ލުއި ގޮތްތަކާއި މާލީ އިނާޔަތްތައް (ޕީއެލްއައި ސްކީމްތައް) ދީގެން، ދުނިޔޭގެ ބޮޑެތި ޓެކްނޮލޮޖީ ކުންފުނިތައް އިންޑިއާއަށް ގެނައުމަށް ވަނީ ބާރުއަޅާފައެވެ. މީގެ މައިގަނޑު ސަބަބަކީ ކޮވިޑް-19 އާއި ޖިއޯ-ޕޮލިޓިކަލް މައްސަލަތަކާ ގުޅިގެން ޗައިނާގެ ސަޕްލައި ޗެއިންއަށް އައި ލޮޅުންތަކުން ފިލާވަޅު ލިބިގަނެ، އިންޑިއާގެ އަމިއްލަ ގާބިލުކަން އިތުރުކުރުމެވެ. މިހާރުވެސް އެޕަލްއާއި ސެމްސަންގް ފަދަ ކުންފުނިތަކުން އިންޑިއާގައި ފޯނު އުފެއްދުން އިތުރުކޮށްފައިވާއިރު، މިހާރު އަމާޒު ހިފާފައި ވަނީ ހަމައެކަނި ރޭވުމުގެ (އެސެމްބްލިންގ) ބަދަލުގައި، އެ ތަކެތި އުފެއްދުމަށް ބޭނުންވާ އަސާސީ ބައިތައްވެސް އެގައުމުގައި އުފެއްދުމަށެވެ.