ހއ. ހޯރަފުށީގައި ބުޅަލަކަށް ގަސްތުގައި އަނިޔާކޮށް މަރާލާފައިވާ ކަމަށް ބުނާ މައްސަލައެއް ފެންމަތިވެ، އެކަން ތަހުގީގުކުރަމުންދާ ކަމަށް ފުލުހުން މިއަދު ބުނެފި އެވެ.
ވީ ކިހިނެއް؟ - ހޯރަފުށީގައި ބުޅަލަކަށް އަނިޔާކޮށް މަރާލާފައިވާ ކަމަށް ބުނާ މައްސަލައެއް ފުލުހުންނަށް ހުށަހެޅީ މިދިޔަ ބުރާސްފަތި ދުވަހުގެ ރޭ 7 ހާއިރު އެވެ.
ބުނީ ކީކޭ؟ - މިކަމާ ގުޅިގެން ފުލުހުން މީޑިއާ ގްރޫޕަށް ފޮނުވި މެސެޖެއްގައި ބުނީ:
މި މައްސަލައާ ގުޅިގެން ތިން މީހަކާ ސުވާލުކޮށް، ތަހުގީގަށް ބޭނުންވާ ބަޔާން ނަގާފައިވޭ
އެ މައްސަލަތައް ފުލުހުން ގެންދަނީ އިތުރަށް ތަހުގީގުކުރަމުން
މިކަމާ ގުޅޭ އިތުރު ތަފްސީލެއް ފުލުހުން ނުދެ އެވެ.
އެނގުން މުހިންމު - ގާނޫނުލްއުގޫބާތުގެ 625 ވަނަ މާއްދާގައިވާ ގޮތުން، ޖަނަވާރަކާ މެދު އަނިޔާވެރި އަމަލެއް ހިންގުމަކީ ކުށެކެވެ. އެގޮތުން:
އެއީ ޖުނަހުގެ ތިން ވަނަ ދަރަޖައިގެ ކުށެއް
ކުށް ސާބިތުވެއްޖެ ނަމަ، އަސާސީ މިންގަނޑުން އެއް މަހާއި ހަ ދުވަހުގެ ޖަލު ހުކުމެއް އަންނާނެ
މި ދަރަޖައިގެ ކުށްތަކަށް ކަނޑައެޅޭ އެންމެ މަތީ އަދަބަކީ ތިން މަސް