އެމެރިކާއާއެކު "އިންސާފުވެރި އަދި ހަމަހަމަ" މަޝްވަރާތަކަކަށް އީރާން ތައްޔާރު ކަމަށާއި، ނަމަވެސް ބިރު ދެއްކުމުގެ މާހައުލެއްގައި އެފަދަ ވާހަކަތަކެއް ނުދެއްކޭނެ ކަމަށް އިރާނުގެ ފޮރިން މިނިސްޓަރު އައްބާސް އަރަގްޗީ ވިދާޅުވެއްޖެއެވެ.
އިއްޔެ ތުރުކީއަށް ކުރެއްވި ދަތުރުގައި ނޫސްވެރިންނާ ވާހަކަ ދައްކަވަމުން އަރަގްޗީ ވިދާޅުވީ، މަޝްވަރާ ކުރުމުގައި އިރާނުގެ އެއްވެސް މައްސަލައެއް ނެތް ކަމަށެވެ. ނަމަވެސް، އެމެރިކާގެ ރައީސް ޑޮނަލްޑް ޓްރަމްޕް އިރާނާ ދެކޮޅަށް އަސްކަރީ ފިޔަވަޅު އަޅާނެ ކަމުގެ އިންޒާރު ދެއްވަމުން ގެންދަވާ ދަނޑިވަޅެއްގައި އެކަން ނުކުރެވޭނެ ކަމަށް އޭނާ ފާހަގަކުރެއްވިއެވެ.
އިރާނުގެ ދިފާއީ އަދި މިސައިލް ގާބިލުކަމަކީ އެއްވެސް އިރެއްގައި މަޝްވަރާ ކުރެވޭނެ މައުޟޫއެއް ނޫން ކަމަށާއި، ގައުމުގެ ސަލާމަތަށްޓަކައި ދިފާއީ ބާރުތައް ވަރުގަދަ ކުރުމަކީ އެހެން އެއްވެސް ގައުމަކާ ބެހޭ ކަމެއް ނޫން ކަމަށްވެސް އޭނާ ވިދާޅުވިއެވެ.
މަސްރަހު ހޫނުވެފައިވަނީ، އިރާނުގެ ނިއުކްލިއާ ޕްރޮގްރާމާ ގުޅިގެން ޓްރަމްޕް އިންޒާރުތައް އިތުރުކުރައްވައި، ޔޫއެސްއެސް އަބްރަހަމް ލިންކަން މަނަވަރު އީރާނާ ދިމާލަށް މިސްރާބު ޖަހާފައިވާ ކަމަށް ވިދާޅުވެފައިވާ ދަނޑިވަޅެއްގައެވެ.
ވައިޓް ހައުސްގައި ވާހަކަ ދައްކަވަމުން ޓްރަމްޕް ވިދާޅުވީ، އިރާނާއެކު އެއްބަސްވުމަކަށް އާދެވިއްޖެ ނަމަ އެއީ ރަނގަޅު ކަމެއް ކަމަށާއި، ނަމަވެސް އެއްބަސްވުމަކަށް ނާދެވިއްޖެ ނަމަ ދެން ވާގޮތެއް ފެންނާނެ ކަމަށެވެ. ރިޕޯޓްތައް ބުނާގޮތުން ޓްރަމްޕް ވަނީ އީރާނަށް ސުންގަޑިއެއްވެސް ދީފައެވެ.
މި މައްސަލައިގައި ސަރަހައްދީ ގައުމުތަކުން ދަނީ މަސްރަހު ފިނިކުރުމަށް މަސައްކަތް ކުރަމުންނެވެ. ތުރުކީގެ ރައީސް ރަޖަބު ތައްޔިބު އުރުދުޣާން ވަނީ އީރާނުގެ ރައީސް މަސްއޫދު ޕެޒެޝްކިއާންއާ ފޯނުން ގުޅުއްވައި، ދެ ފަރާތުގެ ދެމެދުގައި މެދުވެރިއެއްގެ ދައުރު އަދާކުރަން ތުރުކީ ތައްޔާރު ކަމަށް ވިދާޅުވެފައެވެ.