އެމެރިކާ އާއި އީރާނާ ދެމެދު ޕާކިސްތާނުގެ އިސްލާމްއާބާދުގައި ކުރިއަށްދިޔަ މަތީ ފަންތީގެ މަޝްވަރާތަކުގައި އެއްބަސްވުމަކާ ހަމައަށް ނާދެވުމުން، އެމެރިކާގެ "އެންމެ ފަހުގެ އަދި އެންމެ ރަނގަޅު ހުށަހެޅުން" އީރާނަށް ހުށަހެޅުއްވުމަށްފަހު އެމެރިކާގެ ނައިބު ރައީސް ޖޭޑީ ވެންސް އެނބުރި ގައުމަށް ވަޑައިގެންފިއެވެ.
ޕާކިސްތާނުގެ ވެރިރަށުގައި 21 ގަޑިއިރަށް ދެމިގެންދިޔަ މި މަޝްވަރާތަކަށްފަހު ނޫސްވެރިންނާ ވާހަކަދައްކަވަމުން ވެންސް ވިދާޅުވީ، އެމެރިކާގެ ހުށަހެޅުންތަކާ މެދު ގޮތެއް ނިންމުމަށް އީރާނަށް އަދިވެސް ވަގުތު އެބައޮތް ކަމަށެވެ. މަޝްވަރާތައް ކުރިއަށްދާ މުއްދަތުގައި އިސްރާއީލާ ގުޅިގެން ދޭ ހަމަލާތައް ދެ ހަފުތާއަށް މެދުކަނޑާލުމަށް އެމެރިކާއިން މިދިޔަ އަންގާރަ ދުވަހު ނިންމާފައިވާކަން ވެސް އޭނާ ފާހަގަކުރެއްވިއެވެ.
މި މަޝްވަރާތަކުގައި އެންމެ ބޮޑު ދެބަސްވުމެއް އުފެދިފައިވަނީ އީރާނުގެ ނިއުކްލިއާ ހަތިޔާރުގެ މައްސަލައިގައެވެ. ވެންސް ވިދާޅުވި ގޮތުގައި، އީރާނުން ދިގު މުއްދަތަކަށް ނިއުކްލިއާ ހަތިޔާރު އުފެއްދުން ހުއްޓާލާނެ ކަމުގެ ސާފު ޔަގީންކަމެއް އެމެރިކާއަށް ބޭނުންވެއެވެ.
އީރާނުން ނިއުކްލިއާ ބޮމެއް އުފައްދަން މަސައްކަތް ނުކުރާ ކަމަށް ބުނި ނަމަވެސް، އެމެރިކާ އާއި އިސްރާއީލުން ދަނީ އީރާނުގެ ނިއުކްލިއާ މަރުކަޒުތަކަށް އަމާޒުކޮށް ހަމަލާތައް ދެމުންނެވެ.
އަނެއްކޮޅުން، އީރާނުން ވަނީ އެމެރިކާގެ ހުށަހެޅުންތަކަކީ އިންސާފުން ބޭރު އަދި ޣައިރު ގާނޫނީ ޑިމާންޑުތަކެއްގެ ގޮތުގައި ސިފަކޮށްފައެވެ.
އީރާނުގެ ފޮރިން މިނިސްޓްރީގެ ތަރުޖަމާނު އިސްމާއީލް ބަގާއީ ވިދާޅުވީ، މަޝްވަރާތައް ކާމިޔާބުވާނީ އެމެރިކާއިން އީރާނުގެ ގާނޫނީ ހައްގުތައް ގަބޫލުކޮށް، އިހްލާސްތެރިކަން ދެއްކުމުން ކަމަށެވެ.
މި ބައްދަލުވުންތަކުގައި ނިއުކްލިއާ މައްސަލައިގެ އިތުރުން ހޮރްމޫޒް ކަނޑުއޮޅީގެ ސަލާމަތާއި، ދަތިކުރުމުގެ ފިޔަވަޅުތައް އުވާލުމާ ގުޅޭގޮތުން ވެސް ވަނީ ވާހަކަދެކެވިފައެވެ.
ވެންސްގެ އަރިހުގައި މި މަޝްވަރާތަކުގައި ޖެރެޑް ކުޝްނާ އާއި އެމެރިކާގެ ހާއްސަ މަންދޫބު ސްޓީވް ވިޓްކޮފް ވެސް ބައިވެރިވެވަޑައިގެންނެވިއެވެ.