އެމެރިކާގެ ވޮޝިންޓަންގައި ކުރިއަށްދިޔަ މަޝްވަރާތަކަކަށްފަހު، އިސްރާއީލާއި ލުބުނާނުން ސުލްހައިގެ ފްރޭމްވޯކް އެއްބަސްވުމެއްގައި ސޮއިކޮށްފިއެވެ. މިއީ އެމެރިކާ މެދުވެރިވެގެން، ދެ ގައުމުގެ ދެމެދުގައި އޮތް ޒަމާންވީ ދުޝްމަންކަން ނިމުމަކަށް ގެނައުމަށް މަގުފަހިކުރުމުގެ ގޮތުން ވެވުނު އެއްބަސްވުމެކެވެ. ވޮޝިންޓަންގައި ބޭއްވި ފަސް ބުރުގެ މަޝްވަރާތަކަށްފަހު ސޮއިކުރި މި އެއްބަސްވުމުގެ ތަފުސީލުތައް އަދި ހާމަކޮށްފައެއް ނުވެއެވެ. އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވި ގޮތުގައި، މި އެއްބަސްވުމަކީ ދާއިމީ ސުލްހައާއި ސަލާމަތްތެރިކަން ގާއިމުކުރުމުގެ އޮނިގަނޑެއް އެކުލަވާލުމުގެ ފެށުމެވެ. އެމެރިކާއަށް ކަނޑައަޅާފައި ހުންނަވާ ލުބުނާނުގެ ސަފީރު ނާދާ ހަމާދޭ މުއައްވަދު ވިދާޅުވީ، މިއީ ލުބުނާނުގެ ސިޔާދަތާއި ސަރަހައްދީ މިނިވަންކަން އިއާދަކޮށް، ހަމަލާބަދަލުކުރުން ދާއިމީކޮށް ހުއްޓާލައި، ރައްޔިތުންނަށް އެނބުރި ރަށަށް ދިއުމުގެ ފުރުސަތު ހޯދައިދިނުމަށް އެޅުނު ފުރަތަމަ ފިޔަވަޅު ކަމަށެވެ. އަދި އިސްރާއީލުން އެމެރިކާއަށް ކަނޑައަޅާފައި ހުންނަވާ ސަފީރު ޔެހިއެލް ލެއިޓަރ ވިދާޅުވި ގޮތުގައި، މި އެއްބަސްވުމުގެ ދަށުން އީރާނާއި ހިޒްބުﷲ ބާކީވެ، އިސްރާއީލާއި ލުބުނާނާ ދެމެދު ސުލްހަ ގާއިމުވުމަށް މަގުފަހިވެގެންދާނެއެވެ. މި ހަނގުރާމަ ފެށުނީ، އެމެރިކާއާއި އިސްރާއީލުން ދިން ހަމަލާތަކެއްގައި އީރާނުގެ ރޫހާނީ ލީޑަރު އަލީ ޚާމަނާއީ އަވަހާރަކޮށްލުމާ ގުޅިގެން، ބަދަލުހިފުމުގެ ގޮތުން މާޗު މަހުގެ 2 ވަނަ ދުވަހު ހިޒްބުﷲއިން އިސްރާއީލަށް ރޮކެޓް ހަމަލާތަކެއް ދިނުމުންނެވެ. އޭގެ ރައްދުގައި އިސްރާއީލުން ދިން ވަރުގަދަ ވައިގެ ހަމަލާތަކާއި އެއްގަމު މަގުން އެރި އެރުމުގައި 4،200 އަށްވުރެ ގިނަ މީހުން މަރުވެފައިވާ ކަމަށް ރިޕޯޓުތަކުން ބުނެއެވެ. އެމެރިކާގެ ބާރުއެޅުމާއެކު އޭޕްރީލް މަހު ވޮޝިންޓަންގައި ދެ ގައުމުގެ ދެމެދުގައި ސީދާ މަޝްވަރާތައް ފަށައި، އޭޕްރީލް 17 ގައި ހަމަލާތައް މެދުކަނޑާލަން އިއުލާނުކުރި ނަމަވެސް އެކަން ވަނީ ނާކާމިޔާބުވެފައެވެ. ނަމަވެސް، މި މަހުގެ ތެރޭގައި އަލުން ހަމަލާތައް މެދުކަނޑާލުމަށް އިއުލާނުކޮށްފައިވަނީ، އެމެރިކާއާއި އިސްރާއީލުން ފެށި ބޮޑު ހަނގުރާމަ ނިމުމަކަށް ގެނައުމަށް ވޮޝިންޓަނާއެކު އީރާނުން ވެވޭ އެއްބަސްވުމުގައި ލުބުނާނު ހިމެނުމަށް ތެހެރާނުން ބާރުއެޅުމާ ގުޅިގެންނެވެ.