ޕާކިސްތާނުގައި މި މަހުގެ 19 ވަނަ ދުވަހު ފަށާ ޗެމްޕިއަންސް ޓްރޮފީ ކްރިކެޓް މުބާރާތުގެ ތަށި އެ ގައުމަށް ގެންގޮސްފި އެވެ.
އެންމެ ފަހުން 2017 ވަނަ އަހަރު ބޭއްވި މުބާރާތުގެ ޗެމްޕިއަން ޓީމަކީ ޕާކިސްތާނެވެ. މި ފަހަރު އެ ގައުމުގައި ބާއްވާ މުބާރާތަށް ތަށި ގެންދިޔައީ މުބާރާތް ކުޅޭ އަށް ގައުމަށް ތަށި ގެންދަން ފެށި ހާއްސަ ދަތުރުގެ ފަހު މަންޒިލްގެ ގޮތުގަ އެވެ.
މުބާރާތުގައި ވާދަކުރާ އަށް ގައުމަކީ އިންޑިޔާ އާއި ނިއުޒީލޭންޑާއި ބަނގްލަދޭޝް އާއި ޕާކިސްތާނުގެ އިތުރުން ގްރޫޕް ބީގައި ހިމެނޭ އޮސްޓްރޭލިޔާ އާއި ދެކުނު އެފްރިކާ އާއި އިންގްލޭންޑާއި އަފްގާނިސްތާނެވެ.
ޕާކިސްތާނަށް ތަށި ގެންދިއުމަށްފަހު ދެން އޮންނާނީ އެ ގައުމުގެ މުހިންމު ސިޓީތަކަށް ތަށި ގެންދިއުމެވެ. މި ގޮތުން ވެރިރަށް އިސްލާމް އާބާދާއި ޕިޝާވަރާއި، ލާހޯރާއި ފައިސަލްއާބާދާއި މުލްޓާން އަދި ބަހަވަލްޕޫރާއި ސަރްގޮދާ އާއި ޝައިހޫޕޫރާ އަދި ކަރާޗީ އާއި ރާވަލްޕިންޑީ އަށް ތަށި ގެންގޮސް ދައްކާލަން ބަހައްޓާނެ އެވެ.
ޕާކިސްތާނުގައި ބާއްވާ ޗެމްޕިއަންސް ޓްރޮފީ ކްރިކެޓް މުބާރާތަކީ 1996ގެ ވޯލްޑްކަޕުގެ ފަހުން އެ ގައުމުގައި ބާއްވާ އެންމެ ބޮޑު ކުޅިވަރު މުބާރާތެވެ. މިހެންވެ މި މުބާރާތް ކުލަގަދަކޮށް އަދި ފެންވަރު ރަނގަޅަށް ނިންމާލަން އެ ގައުމުން ވަނީ އަމާޒު ހިފައިފަ އެވެ.