ސަޢުދި ޢަރަބިއްޔާގައި އޮންނަ އެކްސްޓްރާ އޯޑިނަރީ ޖޮއިންޓް އަރަބް-އިސްލާމިކް ސަމިޓް އެންޑް އޯގަނައިިޒޭޝަން އޮފް އިސްލާމިކް ކޯޕަރޭޝަން ސަމިޓަށާއި، އަޒަރުބައިޖާންގައި ފަށާ ކޮޕް-29 ސަމިޓުގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފުރާވަޑައިގެންފިއެވެ.
އެކްސްޓްރާ އޯޑިނަރީ ޖޮއިންޓް އަރަބް-އިސްލާމިކް ސަމިޓް އެންޑް އޯގަނައިިޒޭޝަން އޮފް އިސްލާމިކް ކޯޕަރޭޝަން ސަމިޓް އޮންނާނީ މިއަދު ސަޢުދި ޢަރަބިއްޔާގެ ވެރިރަށް ރިޔާދުގައެވެ. އޯގަނައިޒޭޝަން އޮފް އިސްލާމިކް ކޯޕަރޭޝަންގެ ބައްދަލުވުމަކީ، ފަލަސްޠީނުގެ ބިންތައް ހިފާ، ޢީރާންގެ ސިޔާދަތީ މިނިވަންކަމާއި ދެކޮޅަށް އިސްރާޢީލުން ދެމުގެންދާ ޙަމަލާތަކާ ގުޅޭގޮތުން ބާއްވާ ބައްދަލުވުމެކެވެ.
މި ބައްދަލުވުމުގައި ރައީސުލްޖުމްހޫރިއްޔާ ވާހަކަފުޅު ދައްކަވާނެއެވެ. މި ބައްދަލުވުމަށް އަލިއަޅުއްވާލައްވާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ފަލަސްޠީނުގެ މައްސަލާގައި އެންމެ ވަރުގަދައަށް އެއްވެސް ޖެހިލުމެއްނެތި ރާއްޖެއިން މަސައްކަތްކުރައްވަމުން ގެންދަވާކަމަށެވެ.
"ސަޢުދި ޢަރަބިއްޔާއަކީ އިސްލާމީ ދުނިޔޭގެ ލީޑަރު. އިސްލާމީ ދުނިޔޭގައި އެންމެ އިސްނަގައިގެން މަސައްކަތްކުރާ އަޅުގަނޑުމެންގެ ފަޚުރުވެރިވާ ޤައުމު. ސަޢުދި ރަސްގެފާން އެ ކުރައްވާ މަސައްކަތުގައި އަޅުގަނޑުމެން ފުރިހަމައަށްބައިވެރިވަން. ސަޢުދި އަރަބިއްޔާއަށް އަޅުގނޑު މިދަނީ ރާއްޖޭގެ ފަރާތުން ބަސް އިއްވަން. އެހެންވީމަ ފަލ؛ަސްޠީނުގެ މައްސަލާގައި އަޅުގަނޑުމެން އިރާދަކުރެއްވިއްޔާ ރައްޔިތުންގެ ފަރާތުން އެންމެ ބާރަށް މަސައްކަތްކުރާނަން." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.
އޯއައިސީގެ ސަމިޓަށްފަހު މިމަހުގެ 12 ވަނަ ދުވަހު ރައީސުލްޖުމްހޫރިއްޔާ ދެން ވަޑައިގަންނަވާނީ އަޒަރުބައިޖާނުގެ ބޫކާގައި އޮންނަ ކޮޕް-29 ސަމިޓުގައި ބައިވެރިވެވަޑައިގަތުމަށެވެ. ރައީސުލްޖުމްހޫރިއްޔާ ވަނީ، މިފަހަރުގެ ކޮޕް ސަމިޓުގައި މޫސުމީ ނޭދެވޭ ބަދަލުތަކުން ކުރިމަތިވެފައި އޮތް ނާޒުކު ޙާލަތުން ސަލާމަތްވުމަށް ރައްޔިތުންގެ ޙައްޤުގައި ވަކާލާތުކުރައްވާނެ ކަމުގެ ޔަޤީންކަންދެއްވާފައެވެ. އަދި ތިމާވެށި ހަލާކު ކުރަމުންދާ ފަރާތްތަކުގެ އަތުން، އެ ގެއްލުން ފޫބެއްދުމުގެ ބަދަލެއްގެ ގޮތުގައި ފައިސާ ހޯއްދެވުމަކީ މި ދަތުރުފުޅުގެ މަޤްޞަދެއްކަންވެސް ރައީސުލްޖުމްހޫރިއްޔާ ފާހަގަކުރެއްވިއެވެ.
މިއަހަރުގެ ކޮޕް ސަމިޓު ކުރިއަށްދާނީ މިމަހުގެ 11 އިން 22ގެ ނިޔަލަށް އަޒަރުބައިޖަންގެ ވެރިރަށް ބާކޫގައެވެ. މިއަހަރު ކޮޕްގެ ޝިޢާރަކީ "އިން ސޮލިޑޭރިޓީ ފޯރ އަ ގްރީން ވޯލްޑް" މިއެވެ. ކޮޕް ސަމިޓަކީ ދުނިޔެއަށް ކުރިމަތިވަމުންދާ ތިމާވެށީގެ މައްސަލަތަކާއި ގުޅޭގޮތުން އދ.ގެ މެމްބަރު ޤައުމުތަކުގެ ތެރެއިން ކުދި ބޮޑު ހުރިހާ ޤައުމަކުން ބައިވެރިވާ އެންމެ ބޮޑު ސަމިޓެވެ.
މިދިޔަ އަހަރު ދުބާއީގައި ކުރިއަށްދިޔަ ކޮޕް-28ގެ ބައްދަލުވުމުގައިވެސް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުވަނީ ބައިވެރިވެވަޑައިގަންނަވާފައެވެ.