ކުޑަކުދިން ކުށުގެ މާހައުލަށް ތައާރަފުވެ ކުށްތަކަށް އަރައިގަތުމަށް މެދުވެރިވާ ސަބަބުތައް ހޯދުމަށް ކުރަން ނިންމާފައިވާ ދިރާސާ މި އަހަރު ފަށާނެކަމަށް ހޯމް މިނިސްޓްރީގެ ޑެޕިއުޓީ މިނިސްޓަރު ހަސަން ވަހީދު ވިދާޅުވެއްޖެއެވެ.
އޭނާ މިހެން ވިދާޅުވީ ވީޓީވީގެ ޕްރޮގްރާމެއްގައި ވާހަކަދައްކަވަމުންނެވެ.
ޑިޕާޓްމަންޓް އޮފް ޖުވެނައިލް ޖަސްޓިސްގެ މަސައްކަތްތަކާއި ގުޅޭގޮތުން ވާހަކަ ދައްކަވަމުން ހަސަން ވިދާޅުވީ ކުޑަކުދިން ކުށްތަކަށް އަރައިގަންނަ ސަބަބުތަކާިއ ގުޅޭގޮތުން ދިރާސާއެއް ހެދުމަކީ އެ މިނިސްޓްރީގެ މެންޑޭޓް ތެރޭގައިވެސް އޮތް އެއް މަސައްކަތްކަމަށެވެ.
އޭނާ ވިދާޅުވީ ޔުނިސެފްގެ އެހީތެރިކަމާއެކީގައި މި މައްސަލަތައް ދެނެގަންނަން ނުވަތަ މި މައްސަލަތައް އުފެދިގެން އަންނަ ގޮތް އޮޅުން ފިލުވައި ހައްލެއް ހޯދުމުގެ މަސައްކަތް މިހާރު ކުރަމުން އަންނަކަމަށެވެ.
ހަސަން ވިދާޅުވީ މި ދިރާސާ ނިމުމުން ކުޑަކުދިން ކުށުގެ ވެއްޓަށް ވަދެގެން އަންނަ ގޮތް ދެނެގަނެވޭނެކަމަށާއި މި މައްސަލައަށް ހައްލު ހޯދުމަށް ފަސޭހަވާނެކަމަށެވެ.
"އެ ދިރާސާއަށް ބަލާލާފައި އަޅުގަނޑުމެންނަށް އެނގޭނެ ދަންނަވަން މިއީއޭ ދިމާވާ ނުވަތަ އުފެދިގެން މިއަންނަ ހިސާބަކީ. ނުވަތަ އަސްލަކީ ކޮބައިކަން އަޅުގަނޑުމެންނަށް އެއިރުން އެނގޭނެ ދަންނަވަން" ހަސަން ވިދާޅުވިއެވެ.
ހަސަން ވިދާޅުވީ މި އަހަރުގެ މާޗް މަހުގެ ތެރޭގައި މި މަސައްކަތް ފެށޭވަރުވާނެކަމަށާއި ހަ މަސްދުވަހުގެ ތެރޭގައި އެ މަސައްކަތް ނިންމޭނެކަމަށް ބެލެވޭކަމަށެވެ.
ހަސަން ވިދާޅުވިގޮތުގައި މިއީ މުޅި ދިވެހިރާއްޖެއަށް އަމާޒުކޮށްގެން ކުރިއަށް ގެންދާނެ މަސައްކަތެއްކަމަށެވެ.
ޑެޕިއުޓީ މިނިސްޓަރު ހަސަން ވަހީދުގެ އިތުރުން އެ ޕްރޮގްރާމުގައި ޑިޕާޓްމަންޓް އޮފް ޖުވެނައިލް ޖަސްޓިސްގެ ޑިރެކްޓަރ ޖެނެރަލް ހުނާނާ ލަތީފްވެސް ބައިވެރިވެވަޑައިގެންފައިވެއެވެ.
އޭނާ ވިދާޅުވީ ކުށުގެ ވެށީގައި ކުޑަކުދިން ހަރަކާތްތެރިވާ މިންވަރު މަދުކުރުމަށްޓަކައި ހޭލުންތެރިކަމުގެ ޕްރޮގްރާމުތައް ކުރިއަށް ގެންދާކަމަށެވެ.