ޖަމްޢިއްޔާތަކުގެ ރަޖިސްޓްރީއަށް ހުށަހަޅަންޖެހޭ ލިޔެކިޔުންތައް ގަވާއިދުން ހުށަހަޅާފައި ނުވުމުގެ ސަބަބުން ހަރަކާތްތެރި ނޫން ޖަމްއިއްޔާތައް ކަމަށް ކަނޑައަޅާފައިވާ ޖަމްޢިއްޔާތަކަށް ލިޔެކިއުންތައް ހުށަހެޅުމަށް އިތުރު ފުރުސަތެއް ދީފިއެވެ.
ޒުވާނުން ބާރުވެރިކުރުވުމާއި މައުލޫމާތާއި ފަންނާބެހޭ ވުޒާރާއިން ވިދާޅުވީ ލިޔެކިޔުންތައް ގަވާއިދުން ހުށަހަޅާފައި ނުވުމުގެ ސަބަބަބުން ހަރަކާތްތެރި ނޫން ޖަމްޢިއްޔާތައް ކަމަށް ރެކޯޑުކުރެވިފައިވާ ޖަމްޢިއްޔާތަކަށް ލިޔެކިޔުންތައް ހުށަހެޅުމަށް އިތުރު ފުރުސަތެއް ދީފައިވާކަމަށެވެ.
އެގޮތުން އެންމެ ފުރަތަމަ ފުރުސަތު ދިނުމަށް ހަމަޖެހިފައިވަނީ 1971 އިން 1991 އަށް ރަޖިސްޓްރީކޮށް، އިންއެކްޓިވްވެފައިވާ 55 މަދަނީ ޖަމްއިއްޔާއަށެވެ. މިގޮތުން ލިޔެކިއުންތައް ހުށަހެޅުމުގެ އެންމެފަހު މުއްދަތަކީ 20 ޖުލައި 2025 ވާ އާދީއްތަ ދުވަހުގެ 14:00އެވެ.
އިތުރު ފުރުސަތުދޭ ފުރަތަމަ 55 މަދަނީ ޖަމްއިއްޔާގެ ލިސްޓު އާންމުކޮށްފައިވާއިރު މި މުއްދަތުގެ ތެރޭގައި ޖަމްއިއްޔާ އެކްޓިވް ނުކުރާނަމަ، އެފަދަ ޖަމްއިއްޔާތައް ޤާނޫނުގައި ބަޔާންކުރާ ގޮތުގެމަތިން އުވާލުމުގެ މަސައްކަތް ކުރިއަށް ގެންދެވޭނެ ކަމަށްވެސް އެ ވުޒާރާއިން ވިދާޅުވެއެވެ.
ހަރަކާތްތެރި ނޫން ޖަމްޢިއްޔާތައް ނުވަތަ އިންއެކްޓިވްވެފައިވާ ޖަމްއިއްޔާތަކުގެ ތެރެއިން، ޖަމްއިއްޔާ އެކްޓިވް ކުރުމަށްޓަކައި ލިޔެކިޔުން ފުރުހަމަކުރަން ބޭނުންވާ ޖަމްއިއްޔާތަކުން ލިޔުންތައް އެ ވުޒާރާގެ އީމެއިލް މެދުވެރިކޮށް ހުށަހެޅޭނެ އިންތިޒާމްވަނީ ހަމަޖައްސާފައެވެ.