ދުނިޔޭގެ ކުރިއަރާފައިވާ އެހެން ގިނަ ގައުމުތަކެކޭ އެއްފަދައިން އަޅުގަނޑުމެންގެ ކުޑަކުޑަ ރާއްޖެވެސް ބެލެވެނީ ޑިޖިޓަލް ޖީލެއް އުފެދެމުން އަވަސް މިނެއްގައި ޑިޖިޓަލް ބަދަލުތައް އަންނަ ގައުމެއްގެ ގޮތުގައެވެ. މިންތީގެ ތަފާތުކުރުމެއްނެތި ކޮންމެ ޖިންސަކަށްވެސް ހަމަހަމަ ގޮތެއްގައި ޒަމާނީ ޑިޖިޓަލް ފުރުސަތު ފަހިކޮށްދޭ ގައުމެއްގެ ގޮތުގައިވެސްމެއެވެ.
ޑިޖިޓަލައިޒޭޝަނަކީ ދިރިއުޅުމުގެ ކަންކަމުގައި ޑިޖިޓަލް ޓެކްނޮލޮޖީ ބޭނުންކުރުން ކަމަށް ވީއިރު މީގެ ސަބަބުން މީހުން އެކަކު އަނެކަކާ މުޢާމަލާތްކުރާ ގޮތާއި، މުވާޞަލާތުކުރާ ގޮތާއި، އަދި ކަންކަމުގައި އަޑުއުފުލައި ވަކާލާތުކުރާ ގޮތުގެ ވައްޓަފާޅިއަށް މިވަނީ ބޮޑެތި ބަދަލުތަކެއް އައިސްފައެވެ.
ސޯޝަލް މީޑިއާތަކާއި އޮންލައިން ކޮމިއުނިޓީތަކުގެ އިތުރުން ޑިޖިޓަލް ކެމްޕޭންތަކުގެ ބޭނުން އަންހެނުން ކުރަމުންދަނީ އެމީހުންގެ އަޑު ގިނަ ބަޔަކަށް ފޯރުކޮށްދިނުމުގެ މަގުޞަދުގައެވެ. މީގެ އިތުރުން އަންހެނުންގެ ޙައްޤުތަކަށް ވަކާލާތުކުރުމަށާއި، އަދި މިންތީގެ ހަމަހަމަކަން ނެތް މުޖުތަމަޢުގެ އާދަކާދަތަކަށް މީހުންނަށް ހާމަކޮށްދީ ހޭލުންތެރި ކުރުވުމަށެވެ. އެހެންކަމުން ޑިޖިޓަލް ދާއިރާވެފައިވަނީ އަންހެނުންނަށް އެމީހުންގެ ތަޖުރިބާތައް ހިއްސާކުރުމަށާއި، ޚިޔާލު އެއްގޮތް ފަރާތްތަކާއި ގުޅުން ބަދަހިކުރުމަށާއި، އަދި ޖިންސަށް ބިނާކޮށް ކުރެވޭ ތަފާތުކުރުންތަކާ ދެކޮޅަށް ވަކާލާތުކުރުމަށް މުހިންމު މަންސައެއް ކަމުއެވެ.
ރާއްޖެއަށް ބަލާއިރު ޑިޖިޓަލް ޕްލެޓްފޯމްތަކުގެ ސަބަބުން އަންހެނުންނަށް އުނގެނުމާއި އިލްމީ މަޢުލޫމާތު ލިބިގަތުމަށް ފަސޭހަވެގެން ގޮސްފައިވެއެވެ. އޮންލައިން ކޯސްތަކާއި އީ-ލާނިން ޕްލެޓްފޯމްތަކުގެ ސަބަބުން އަންހެނުންނަށް ގޭގައި ތިބެގެން ހުނަރާއި ޢިލްމު އިތުރުކުރުމުގެ ފުރުޞަތުތައް ލިބިގެންދެއެވެ. ހަމައެހެންމެ ޑިޖިޓަލައިޒޭޝަންގެ ސަބަބުން އަންހެން ވިޔަފާރިވެރިންނަށް އާ މަގުތަކެއް ވެސް ވަނީ ހުޅުވިގެންގޮސްފައެވެ. އޮންލައިން މާކެޓްޕްލޭސްތަކާއި ސޯޝަލް މީޑިއާ ޕްލެޓްފޯމްތަކުގެ ސަބަބުން އަންހެނުންނަށް ޚަރަދުކުޑަގޮތަކަށް ވިޔަފާރި ފެށުމާއި ޕްރޮމޯޓް ކުރުމުގެ ފުރުސަތު ލިބިގެންދެއެވެ. ރިމޯޓް ވޯކްގެ ފުރުސަތުތައް އިތުރުވެ، އަންހެނުންނަށް މަސައްކަތާއި އާއިލީ ޒިންމާތައް މާ ފައިދާހުރި ގޮތެއްގައި ބެލެންސް ކުރެވޭނެ ގޮތް މިވަނީ ފަހިވެފައެވެ. މީގެއިތުރުން ސިއްޙީ ދާއިރާއަށް ބަލާއިރު ޓެލެމެޑިސިން އާއި ޑިޖިޓަލް ހެލްތު ސާވިސްގެ ސަބަބުން ސިއްޙީ ވަސީލަތްތައް ރަނގަޅުފެންވަރުގައި ގާއިމުވެފައި ނެތް ރަށްރަށުގައި ދިރިއުޅޭ އަންހެނުންނަށް އެދެވޭ ސިއްޙީ ޚިދުމަތް ލިބޭނެ ގޮތްވެސް މިވަނީ ފަހިވެގެން ގޮސްފައެވެ.
ޑިޖިޓަލައިޒޭޝަންގެ ދާއިރާއިން އަންހެނުން ބާރުވެރި ކުރުމަކީ ރާއްޖޭގެ އިޖްތިމާއީ އަދި އިގްތިސާދީ ތަރައްގީއަށް ވެސް ނުހަނު ބޭނުންތެރި ކަމެކެވެ. އެގޮތުން އަންހެނުންނަށް ޑިޖިޓަލް ހުނަރުގެ ތަޢުލީމާއި ތަމްރީނު ލިބިދިނުމަކީ ވަރަށް މުހިންމު ކަމެކެވެ. ކޯޑިން ބޫޓް ކޭމްޕްތަކާއި އޮންލައިން ކޯސްތަކާއި ވޯކްޝޮޕްތައް ފަދަ މަސައްކަތްތަކަކީ ޑިޖިޓަލް ދާއިރާ އިން ކުރިއަށް ދާން ބޭނުންވާ އަންހެނުންނަށް އެމީހުންނަށް ބޭނުންވާ ހުނަރުތައް ހޯދުމަށް އެހީތެރިވެދޭނެ ކަންކަމެވެ. މިސާލަކަށް ވިމެން އިން ޓެކް މޯލްޑިވްސް ފަދަ ޖަމިއްޔާތަކުންނާއި ދިރާގުން އިސްނަގައިގެން މިހާރުވެސް ކުރިއަށް ގެންދާ ކޯޑިން ޕްރޮގްރާމްތަކާއި އިވެންޓްތަކުގެ ތެރެއިން ޓެކް އިންޑަސްޓްރީގައި އަންހެނުންގެ ބައިވެރިވުން އިތުރުކުރުމަށް މަސައްކަތް ކުރާކަން ފާހަގަކުރެވެއެވެ.
ޓެކް ސެކްޓަރގައި އަންހެން ވިޔަފާރިވެރިންނަށް ހިތްވަރުދީ ސަޕޯޓް ދިނުމަކީވެސް އުފެއްދުންތެރިކަން އިތުރުވެ އިޤްތިޞާދަށް ކުރިއެރުން ލިބިގެންދާނެ ކަމެކެވެ. އެގޮތުން މެންޓަރޝިޕް، ފަންޑިންގ، އަދި ނެޓްވޯކިންގ ފުރުސަތުތައް ލިބޭ ޕްރޮގްރާމްތަކުގެ ސަބަބުން އަންހެނުންނަށް އަމިއްލަ ޓެކް ވިޔަފާރިތައް ފެށުމާއި ކުރިއެރުވުމަށް އެހީތެރިވެދެއެވެ. މޯލްޑިވްސް ވިމެން އެންޓްރަޕްރިނިއަރސް އެސޯސިއޭޝަން (އެމްޑަބްލިޔުއީއޭ) އަކީ ޓެކްނޮލޮޖީ ހިމެނޭ ގޮތަށް އެކި ދާއިރާތަކުން އަންހެން ވިޔަފާރިވެރިންނަށް އެހީތެރިކަން ފޯރުކޮށްދޭ އެފަދަ އެއް ޖަމިއްޔާއެވެ. މި ޖަމިއްޔާއިން މިހާރުވެސް ގިނަ އަންހެނުންތަކަކަށް މިފަދަ އެހީތެރިކަން ފޯރުކޮށްދީ އޮންލައިން ވިޔަފާރިތައް ކުރިއެރުވުމަށް ވަނީ މަސައްކަތް ކޮށްފައެވެ.
މަސައްކަތުގެ މާހައުލުގައި މިންތީގެ ހަމަހަމަކަން ކުރިއެރުވުމާއި، ޑިޖިޓަލް އިޤްތިޞާދުގައި އަންހެނުން ބައިވެރިވުމަށް އެހީތެރިވުމަށް ސަރުކާރުގެ ސިޔާސަތުތަކަކީ ކޮންމެހެން ބޭނުންތެރި ސިޔާސަތުތަކެކެވެ. އެގޮތުން މިފަދަ ތަފާތުކުރުންތައް ނައްތާލައި އަންހެނުންނަށް ހަމަހަމަ ފުރުޞަތުތައް ހޯދައިދިނުމުގެ މަޤްޞަދުގައި ސަރުކާރުން ހިންގާ ޖެންޑަރ އިކުއަލިޓީ ޤާނޫނު ފަދަ އެކިއެކި މަސައްކަތްތަކާއި ސިޔާސަތުތަކުގެ ތެރެއިން ޖެންޑަރ އިކުއަލިޓީއަށް މަސައްކަތް ކުރެވޭތަން ފެންނަމުންދެއެވެ.
މިއާއެކު ޓެކް އިންޑަސްޓްރީގައި މަސައްކަތް ކުރާ ކާމިޔާބު އަންހެނުންނަށް އަލިއަޅުވާލުމަކީ ޑިޖިޓަލް ދާއިރާތަކުން ކުރިމަގު ބައްޓަން ކުރުމަށް ބޭނުންވާ މީހުންނަށް ލިބިގެންދާނެ އިތުރު ހިތްވަރެކެވެ. މިފަދަ މެންޓަރޝިޕް ޕްރޮގްރާމްތަކުގެ ސަބަބުން ޓެކް އިންޑަސްޓްރީއަށް ވަންނަ އަންހެނުންނަށް އިރުޝާދާއި ސަޕޯޓް ލިބިގެންދެއެވެ. ގާލް ގައިޑްސް އެސޯސިއޭޝަން އޮފް މޯލްޑިވްސް ފަދަ އިނިޝިއޭޓިވްތަކުން މިހާރުވެސް ކުރިއަށް ގެންދާ ޓެކްނޮލޮޖީ އާއި ލީޑަޝިޕް ޕްރޮގްރާމްތަތަކަކީ މިދެންނެވި ފަދައިން ޒުވާން އަންހެން ކުދިން ބާރުވެރި ކުރުވުމަށް ކުރިއަށް ގެންދެވޭ ކާމިޔާބު ހަރަކާތްތަކެކެވެ.
ޑިޖިޓަލައިޒޭޝަންގެ ދާއިރާއިން އަންހެނުން ބާރުވެރިކޮށް، މިއަށްވުރެ ގިނަ ފަރާތްތަކެއް ހިމެނޭ މުޖުތަމަޢެއް ހޯދައިދިނުމަށް ކުރެވޭ އެންމެ މުހިއްމު އެއްމަސައްކަތްތަކެއްގެ ގޮތުގައި އަންހެނުންނަށް ބޭނުންވާ ޓެކްނޮލޮޖީއާއި އިންޓަރނެޓް ކަނެކްޓިވިޓީ ލިބޭނެކަން ކަށަވަރުކުރުން ހިމެނެއެވެ. އެގޮތުން ކުދިކުދި ރަށްރަށުގައި ވެސް ޑިޖިޓަލް އިންފްރާސްޓްރަކްޗާ ރަނގަޅުކޮށް، ޓެކްނޮލޮޖީގެ އަތްފޯރާފަށުގައި ފޯރުކޮށްދިނުމަށް މަސައްކަތް ކުރުން މުހިއްމެވެ.
މިފަދަ މަސައްކަތްތަކަކީ މިހާރުވެސް ސަރުކާރާއި އަމިއްލަ ފަރާތްތަކުން ކުރަމުން އަންނަ މަސައްކަތް ކަމުން ދުނިޔޭގެ ނިސްބަތުން ރާއްޖޭގެ އަންހެނުން ފާހަގަކުރެވެނީ ޑިޖިޓަލައިޒޭޝަންގެ ދާއިރާއިން ބާރުވެރިވަމުން އަންނަ ކާމިޔާބު ބައެއްގެ ގޮތުގައެވެ.