އިޒްރޭލު-އެމެރިކާ އިން އީރާނަށް ދޭ ހަމަލާތަކަކީ ބައިނަލްއަގުވާމީ ގާނޫނުތަކާ ހިލާފު ހަމަލާތަކެއް ކަމަށް ބުނެ، ސްޕެއިންގެ ވައިގެ މަރުކަޒުތައް ބޭނުން ކުރުމުގެ ފުރުސަތު އެމެރިކާއަށް ނުދިނުމަށް އެ ގައުމުން ނިންމައިފި އެވެ.
"ޖޮއިންޓް ޔޫސް ބޭސްތައް، އެކަމަކު އެއީ ސްޕެއިނުގެ އިސްތިގުލާލުގެ ދަށުގައި ހުރި ތަންތަން. އެތަންތަން އދ.ގެ ޗާޓަރުގައި ނުހިމެނޭ އެއްވެސް ކަމަކަށް ބޭނުމެއް ނުކުރެވޭނެ،" ސްޕެއިނުގެ ހާރިޖީ ވަޒީރު ހޯސޭ މެނުއެލް އަލްބަރެސް ވިދާޅުވި އެވެ.
އަލްބަރެސްގެ ވާހަކައާ ގުޅިގެން އެމެރިކާގެ ގިނަ މަތިންދާބޯޓުތަކެއް ވަނީ ސްޕެއިންގެ ރޯޓާ އާއި މޮރޮންގައި ހުންނަ ބޭސްތަކުން ފުރައިފަ އެވެ.
އޭގެ ތެރެއިން ހަތް މަތިންދާބޯޓު ވަނީ ޖަރުމަނުގެ ރަމްސްޓެއިން ވައިގެ ބޭސްއަށް ދަތުރުކޮށްފަ އެވެ. އަދި ނުވަ ޓޭންކަރެއް ވެސް ވަނީ އެ ދިމާއަށް ދަތުރުކޮށްފަ އެވެ. އަނެއް ދެ ޓޭންކަރު ދަތުރުކުރީ ފްރާންސްގެ ދެކުނު ފަރާތަށެވެ. 
"އަޅުގަނޑުމެން ޑިމާންޑް ކުރަނީ ބައިނަލްއަގުވާމީ ގާނޫނުތަކަށް އިހުތިރާމް ކުރަން. ހަމަނުޖެހުންތަކުން ގެނެސްދެނީ އިތުރު ހަމަނުޖެހުންތައް. ހަމަނުޖެހުންތަކާ ދުރަށް ދިއުމާއި މަޝްވަރާގެ ދޮރުތައް ހުޅުވުމަކީ ހަމަޖެހުމަށް އޮތް މަގު،" އެމެރިކާ އާއި އިޒްރޭލުން އީރާނަށް ދިން ހަމަލާތަކާ ގުޅިގެން ސޯޝަލް ޕްލެޓްފޯމް އެކްސްގައި އަލްބަރެސް ވިދާޅުވި އެވެ.
އެމެރިކާ އާއި އިޒްރޭލުން ދިން ހަމަލާތަކުގައި އީރާންގެ ސުޕްރީމް ލީޑަރު އާޔަތުއްލޯ އަލީ ހާމަނާއީ ވަނީ އަވަހާރަކޮށްލައިފަ އެވެ.