އައްޑޫ ހިތަދޫގައި ‘ސްކޫޕު’ ނަމުގައި ހަރަކާތްތެރިވާ ގްރޫޕަކީ އިންތިޒާމުވެފައިވާ ކުށްކުރާ ގްރޫޕެއް ނުވަތަ ގޭންގެއް ކަމަށް ކަނޑައަޅައިދިނުމަށް އެދި ހުށަހެޅި މައްސަލާގައި އަޑުއެހުންތައް ސިއްރުކުރުމަށް ހައި ކޯޓުން ނިންމައިފިއެވެ.
މި މައްސަލައިގެ ފުރަތަމަ އަޑުއެހުން ރޭ 9:15 އަށް ތާވާލުކޮށްފައިވާއިރު މައުލޫމާތު ލިބޭ ގޮތުން މިއީ މައްސަލަ ކުރިއަށް ގެންދާނެ ގޮތުގެ އިޖުރާއީ ކަންކަން ނިންމުމަށް ބޭއްވި އަޑުއެހުމެކެވެ. އެ ގޮތުން އަޑުއެހުންތައް މި ވަގުތަށް ހުޅުވާނުލާ ކުރިއަށް ގެންދަން ނިންމާފައިވާއިރު، ފަނޑިޔާރުން އެހެން ގޮތަކަށް ކަނޑައަޅަން ދެން މި މައްސަލާގައި ބާއްވާ އަޑުއެހުންތަކުގެ ވީޑިއޯ އާންމެއް ނުކުރާނެއެވެ.
މިއީ، ގޭންގްތައް ހުއްޓުވަން މިދިޔަ އަހަރު ތަންފީޒުކުރަން ފެށި އާ ގާނޫނުގެ ދަށުން ގޭންގެއްގެ ގޮތުގައި ކަނޑައަޅަން ހުށަހެޅި ފުރަތަމަ ގްރޫޕެވެ. މިއަހަރުގެ ޖަނަވަރީ މަހުގެ ތެރޭގައި އައްޑޫ ސިޓީގައި ހަރަކާތްތެރިވާ ސްކޫޕ’ ގްރޫޕުގެ މައްސަލަ ޕްރޮސެކިއުޓާ ޖެނެރަލް (ޕީޖީ)ގެ އޮފީހުން ހައިކޯޓަށް ހުށަހަޅާފައިވާއިރު ޕީޖީން ބުނީ ސްކޫޕު ގްރޫޕަކީ ގޭންގެއް ކަމަށް ކަނޑައަޅަން ކޯޓަށް ހުށަހަޅަން ނިންމީ ފުލުހުން ހުށަހެޅި ހެކިތައް ދިރާސާކުރުމަށް ފަހުގައި ކަމަށެވެ.
އެ ގޮތުން، އެ ގްރޫޕުގައި ގޭންގެއްގެ ޝަރުތުތައް ފުރިހަމަވާ ކަމަށާއި މިހާރު ވެސް ކުށްކުރުމުގައި ހަރަކާތްތެރިވާ ކަމަށް ޕީޖީން ވަނީ ތުހުމަތުކޮށްފައެވެ. މީގެ އިތުރުން ޕީޖީން ވަނީ އެ ގްރޫޕަކީ ގޭންގެއް ކަމަށް ކަނޑައަޅެމުގެ އިތުރުން އެ ގްރޫޕަށް ނިސްބަތްވާ ކަމަށް ފާހަގަކުރެވުނު ނުވަ މީހަކީ އެ ގްރޫޕުގެ މެންބަރުންގެ ގޮތުގައި ކަނޑައަޅައިދޭން ހައިކޯޓުގައި އެދިފައެވެ.