ޕީޕީއެމްގެ ޕްރައިމަރީގައި ވާދަކުރައްވާ ނާކާމިޔާބުވެވަޑައިގެންނެވި އެޕާޓީގެ ކުރީގެ މެންބަރު އުމަރު ނަސީރު ޖުމްހޫރީ ގުޅުމުގެ ރިޔާސީ ކެންޑިޑޭޓު އަދި ޖުމްހޫރީ ޕާޓީގެ ލީޑަރު ގާސިމް އިބްރާހިމަށް ތާއީދުކުރެއްވުމަށް ނިންމައިފި އެވެ.
މިއަދު މޫކައި ހޮޓެލްގައި ބޭއްވި ނޫސްވެރިންގެ ބައްދަލުވުމުގައި އުމަރު ނަސީރު ވިދާޅުވީ ކުރިއަށް އޮތް ރިޔާސީ އިންތިހާބުގައި ތާއީދުކުރާނެ ކެންޑިޑޭޓެއް ނިންމުމަށް ވޭތުވެދިޔަ ދުވަސްތަކުގައި ވަރަށް ބޮޑަށް ދިރާސާކޮށްފައިވާ ކަމަށެވެ.
އެގޮތުން ބެލި ބެލުމުން ރިޔާސީ އިންތިހާބަށް ވާދަކުރައްވާ ކެންޑިޑޭޓުންގެ ތެރެއިން މިގައުމުގެ ގައުމިއްޔަތު ހިފަހައްޓާ އިސްލާމް ދީން ހިމާޔަތްކޮށް ކޮރަޕްޝަންގެ މަގުން ދައުލަތުގެ ތެރެއަށް އަތް ބާނާ ދައުލަތުގެ ފައިސާ ނާޖައިޒު ގޮތެއްގައި ނުނަގާނެ ކަމުގެ ޔަގީންކަން އޮތީ ޖުމްހޫރީ ގުޅުމުގެ ކެންޑިޑޭޓު ގާސިމް އިބުރާހިމްގެ މައްޗަށް އެކަނި ކަމަށް އުމަރު ވިދާޅުވި އެވެ.
ރާއްޖެއަށް ދިމާވެފައި ހުރި މައްސަލަތަކުގެ މައިގަނޑު މައްސަލައަކީ ސިޔާސީ މަސްރަހުގައި ތިބި ގިނަ މީހުންނަކީ ކޮރަޕްޝަނާއި ފަސާދައަށް މަގުފަހިކުރާ މީހުން ކަމަށާއި ސިޔާސީ މަސްރަހުގައި ހުރި ކުނި ބުނިތައް ސާފުކުރުމަށް ޓީމު އުމަރުގެ ފަރާތުން ވަރަށް ބޮޑަށް ވަކާލާތުކުރި ކަމަށް ވެސް އުމަރު ވިދާޅުވި އެވެ. އެހެންވެ ގާސިމް އަށް ތާއިދު ކުރަން ނިންމީ ގާސިމް އަކީ އުމަރު ވަކާލާތު ކުރައްވާ ސިފަތައް ހުރި ބޭފުޅަކަށް ވާތީ ކަމަށް އުމަރު ވިދާޅުވިއެވެ.
އަދި މަސްތުވާތަކެއްޗާއި ގޭންގުތަކުގެ މައްސަލައެއް ހޯދާދެވޭނީ ކޮން ކެންޑިޑޭޓަކަށްތޯ ވަރަށް ބޮޑަށް ވިސްނުމަށްފަހު ނިންމީ ޖުމްހޫރީ ކޯލިޝަނަށް ތާއީދުކުރުމަށް ކަމަށް ވެސް އޭނާ ވިދާޅުވި އެވެ.
ޕީޕީއެމްގެ ރިޔާސީ ޕްރައިމަރީގައި އުމާރާއި ވާދަކުރައްވާ ކާމިޔާބު ހޯއްދެވި ޔާމިނަށް ފާޑުވިދާޅުވެ އުމަރު ވިދާޅުވީ ރައީސް މައުމޫނުގެ ވެރިކަމުގައި މައުމޫނަށް ލިބިވަޑައިގެންނެވި ގެއްލުމެއް ވިއްޔާ ލިބުނީ ޔާމީންގެ ސަބަބުން ކަމަށެވެ. އަދި "ޔަމިނަކީ މައުމޫނެއް" ނޫންކަމަށް އުމަރު ވިދާޅުވިއެވެ.
އަދި ޕީޕީއެމް މިހާރު ހިނގަމުންދަނީ ރައީސް މައުމޫނުގެ ވިސްނުމާއި އެއްގޮތައް ނޫންކަމަށާއި އެހެންކަމުން ޕީޕީއެމް އަށް އަދި އެޕާޓީގެ ރިޔާސީ ކެނޑިޑޭޓަށް ތާއިދު ކުރެވެން ނެތް ކަމަށް އުމަރު ވިދާޅުވިއެވެ.