އެންޓި ކޮރަޕްޝަން ކޮމިޝަން (އޭސީސީ)އިން އޭނާގެ މައްޗަށް ދައުވާ ކުރަން ފޮނުވީ އެ ކޮމިޝަނުގެ މައްޗަށް އޮތް ސިޔާސީ ޕްރެޝަރު ބޮޑުވުމުކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
“ސަންގު ޓީވީ”އިން ރޭ ގެނެސްދިން ޕްރޮގްރާމެއްގައި ވާހަކަ ދައްކަވަމުން އުމަރު ވިދާޅުވީ، މި މައްސަލައަކީ އެއްވެސް ގާނޫނީ ބުރަދަނެއް އޮތް މައްސަލައެއް ނޫން ކަމަށެވެ. އަދި މިއީ ސިއްރުން ކުރި ކަމެއް ނޫން ކަމަށާއި، އެއީ ހުޅުވާލެވިފައި އޮތް އޯޕަން ބިޑެއްގެ ތެރެއިން ހިނގި ކަމެއް ކަމަށް ވިދާޅުވިއެވެ. އަދި ބިޑެއް ހުޅުވާލުމާއެކު ސަރުކާރުގެ ޕްރޮސީޖާއަކީ އެންމެ ހެޔޮ އަގު ހުށަހަޅާ ފަރާތަކަށް ބިޑު ހަވާލުކުރުން ކަމަށާއި، އެ ޕްރޮސީޖާއިން ބޭރުވެފައި ނޯންނާނެ ކަމަށެވެ.
އޭނާ ވިދާޅުވީ، އެއީ 2015ގައި ހިނގާފައިވާ ކަމަކަށް ވާއިރު، ހައަހަރު ފަހުން އެ މައްސަލައިގައި ދައުވާކުރަން ފޮނުވަން ޖެހުނު ސަބަބަށްވެސް ބަލައިލަން ޖެހޭ ކަމަށެވެ. އެގޮތުން އުމަރު ވިދާޅުވީ މިނިސްޓަރު ކަމުން ވަކިވެ، 2018 ވަނަ އަހަރުގެ ރިޔާސީ އިންތިހާބުގައި ވާދަ ކުރާނެކަން އިއުލާން ކުރި ހިސާބުން އޭނާގެ އެއްވެސް މައްސަލައެއް ފެނޭތޯ ރައީސް އަބްދުﷲ ޔާމީންވެސް މަސައްކަތް ކުރެއްވި ކަމަށާއި، މި ސަރުކާރުންވެސް އެކަމަށް މަސައްކަތް ކުރި ކަމަށެވެ. ނަމަވެސް މޯލްޑިވްސް މާކެޓިން އެންޑް ޕީއާރް ކޯޕަރޭޝަން (އެމްއެމްޕީއާރް)ގެ ހިޔާނާތްފަދަ ބޮޑެތި ހިޔާނާތުގެ މައްސަލަތަކުގައިވެސް އޭނާގެ ނަން ނުހިމެނޭ ކަމަށް ވިދާޅުވިއެވެ.
އަދި އެންމެ ފަހުން ހޯމް މިނިސްޓްރީން ކޮށްފައި ހުރި ބިޑުތަކާއި، ހުރިހާ އެއްޗެއް ބަލައިގެންވެސް ފެނުނީ އެންމެ މައްސަލައެއް ކަމަށާއި، އެއީ މި ބިޑު ހަވާލުކުރި ކުންފުނީގައި އޭނާގެ ދެ ރަހުމަތްތެރިއެއްގެ ހިއްސާ އޮންނަކަން އެކަނި ކަމަށެވެ. އެހެން ނަމަވެސް އެއީ ގާނޫނީ ގޮތުން އުމަރާ އެއްވެސް ގުޅުމެއް އޮތް ކަމެއް ނޫން ކަމަށް ވިދާޅުވިއެވެ.
އުމަރު ވިދާޅުވީ އޭސީސީން އޭނާއަށް ދައުވާ ކުރީ ސިޔާސީ ޕްރެޝަރާ ގުޅިގެން ކަމަށެވެ. އަދި އެ ކޮމިޝަނުގެ މެންބަރުން ވަކިކުރާނެ ކަމުގެ އިންޒާރު މިދިޔަ މަހުވެސް ދީފައިވާ ކަމަށާއި، އޭނާއަށް ދައުވާ ކުރީ އެ އިންޒާރު ދިންތާ އެއް މަސް ދުވަހުގެ ތެރޭގައި ކަމަށެވެ.
“ފޮނުވާފަ އަނެއްކާވެސް މެންބަރުން ވަކި ކުރާނެ ކަމަށް ބިރުދައްކަމުން އެބަ ގެންދޭ. އެހެންވީމަ އޭސީސީއަށް ވަރަށް ބޮޑަށް ސިޔާސީ ޕްރެޝަރު އެބައޮތް، ސިޔާސީ އެކިއެކި ބެފުޅުންގެ މައްސަލަތައް ޝަރީއަތަަށް ފޮނުވުމުގެ” އުމަރު ވިދާޅުވިއެވެ.
އެނާ ވިދާޅުވީ އެކަމާ އެއްވެސް ވަރަކަށް ކަންބޮޑު ނުވާކަމަށެވެ. އަދި އޭނާ ހައްޔަރުކުރެވޭތޯ މަސައްކަތްކުރާ މިއީ ތިންވަނަ ސަރުކާރު ކަމަށާއި، ރައީސް މުހައްމަދު ނަޝީދުގެ ސަރުކާރުންނާއި، ރައީސް ޔާމީނުގެ ސަރުކާރުންވެސް އެކަމާ މަސައްކަތް ކުރި ކަމަށެވެ. އަދި އެ މައްސަލައިން ނުކުމެގެން އަންނާނީ އޭނާގެ ހުދު ވަލަކީ އަދި އިތުރަ ހުދު ވަލެއްކަން ސާބިތުކޮށްފައި ކަމަށް ވިދާޅުވިއެވެ.
2015 ވަނަ އަހަރު ކުށްވެރިންގެ ފައިގައި ޓެގު އެޅުވުމުގެ މަސައްކަތް ހަމާލުކޮށްފައި ވަނީ އޭނާއާ ވިޔަފާރީގެ ގޮތުން ގާތް ގުޅުމެއް އޮންނަ ކުންފުންޏަކާ ކަމަށް ބުނާ މައްސަލައެއް ތަހުގީގު ކުރުމަށް ފަހު އުމަރަށް ދައުވާ ކުރަން ފޮނުވާފައި ވަނީ މިމަހުގެ 7 ވަނަ ދުވަހުއެވެ. އޭސީސީން އޭނާގެ މައްޗަށް ކުރަން ފޮނުވާފައި ވަނީ ރަސްމީ ހައިސިއްޔަތު ނަހަމަގޮތުގައި ބޭނުންކުރުމުގެ ކުށުގެ ދައުވާއެވެ.