ކޮންމެ ދެމަފިރިއަކަށްވެސް މައްސަލަތައް ކުރިމަތިވާނެއެވެ. އެއީ ކުރިމަތިނުވެ ނުދާނެ ކަމެކެވެ. އެހެންކަމުން ވަރަށް ބޮޑެތި މައްސަލަތައްވެސް ކުރިމަތިވާނެއެވެ. މާފުކުރަން އުނދަގޫވާނެ ކަންކަންވެސް ކުރިމަތިވާނެއެވެ.  
އެޙާލަތުގައިވެސް އަހުރެމެންގެ މައްޗަށް ވާޖިބުވެގެންވާ ކަމެއް އެބައޮތެވެ. އެއީ އަނެކާއަށް ރަޙުމްކުރުމެވެ. ސަބަބަކީ ﷲ ތަޢާލާގެ ވަޙީބަސްފުޅެވެ. ރަސޫލް ޞައްލަﷲ ޢަލައިހި ވަސައްލަމަ ދުނިޔެއަށް ފޮނުއްވެވުނީ އެންމެހައި މީސްތަކުންގެ މައްޗަށް ރަޙްމަތެއް ކަމުގައި އޮތް ވަޙީބަސްފުޅެވެ. ހަމައެކަނި މީސްތަކުންގެ މައްޗަކަށްވެސް ނޫނެވެ. ޖިންނީންނާއި އެންމެހައި މަޚްލޫޤުންގެ މައްޗަށެވެ.  
އަހުރެމެންނަށް އޮތީ ﷲ ތަޢާލާގެ ވަޙީއަށް ކިޔަމަންތެރިވުމެވެ. ރަސޫލް ޞައްލަﷲ ޢަލައިހި ވަސައްލަމަގެ ސުންނަތަށް ޢަމަލުކުރުމެވެ. އެހެންކަމަށްވާއިރު އެއްވެސް މީހަކަށް ރަޙުމްނުކޮށް އަނިޔާވެރިވެގެން ދެކޮޅު ޖެއްސޭނީ ކިހިނަކުން ހެއްޔެވެ؟  
މިބުނި ފަދަ ޙާލަތެއް ކުރިމަތިވެއްޖެނަމަ ހިތަށް ގެންނާށެވެ! ﷲ ތަޢާލާއީ ރަހްމާންވަންތަ ރަޙީމްވަންތަ ރަސްކަލާނގެ ކަމެވެ. ވީމާ އެއްވެސް މީހަކަށް ރަޙުމްކުރަންޖެހޭ ކޮންމެ ޙާލަތެއްގައިވެސް ރަޙުމްކުރަންޖެހޭނެކަމެވެ.  
އަހުރެން މިވާހަކަކޮޅު މިދެއްކި އެންމެ ބޮޑު މަޤްޞަދުވެސް ބުނެލާނަމެވެ. ދެމަފިރިންގެ މެދުގައި ޖެހޭ މައްސަލައެއްގެ ސަބަބުން ވަޤުތުންވެސް އެބަ ވަރިކުރެއެވެ. ވަރިކޮށްފައި ވަޤުތުން ގެއިން ނުކުންނަންވެސް އެބަ ބުނެއެވެ. އެއީ އެއްގޮތަކަށްވެސް ކޮށްގެންވާނެ ކަމެއް ނޫނެވެ. ފުރަތަމަ ސަބަބަކީ ޢިއްދައިގައި އިންނަ މުއްދަތުގައި ބޯހިޔާވަހިކަން ފޯރުކޮށްދޭން ޖެހެއެވެ. ބެލެނިވެރިކަމުގެ ޒިންމާވެސް އުފުލަންޖެހެއެވެ.  
ހަމައެއާއިއެކު އަނބިމީހާއަކީ ވަޤުތުން ނުކުމެގެން ގޮސް ވަންނާނެ ތަނެއް ނެތް އަންހެނަކަށްވެސް ވެދާނެއެވެ. ވީމާ ގެންގުޅޭ ޖަނަވާރު ފަދަ ތަކެތި ކޮށިން ނެރެ ދާނެ ތަނަކަށް ދާން ދޫކޮށްލާ އުޞޫލުން އަނބިމިހާ އާއިމެދު ކަންތައްކުރަން ހެޔޮވާނީ ކިހިނަކުން ހެއްޔެވެ؟  
ﷲ ތަޢާލާއަށް ކިޔަމަންތެރިވާށެވެ! ޢިއްދަ ހަމަވަންދެން ބަލަހައްޓާށެވެ. އެއިރުން އެކަނބަލުން ކޮންމެވެސް މަގެއް ހޯދަން ފުރުޞަތު ދެވުނީއެވެ. ރަޙުމް ކުރުމަކީ އެއީއެވެ.
 
- އިސްލާމީ ތިލަފަތުގެ ދަރުސަކުން