އައްޑޫ ސިޓީ ހިތަދޫ އާއި ގުޅިފައިވާ ރަށްތަކުން މިއަދުވެސް އެއް ގަޑިއިރަށް ކަރަންޓް ކެނޑުމަށް ނިންމައިފި އެވެ.
ފެނަކައިން ފޮނުވި މެސެޖެއްގައި ބުނީ ދެ އިންޖީނަކަށް މައްސަލަ ދިމާވެ މަރާމާތު ކުރަމުންދާ މިވަގުތު ހިތަދޫ އާއި ގުޅިފައިވާ ރަށްރަށަށް އެންމެ މަތީ ލޯޑު ނަގާ ވަގުތުތަކުގައި ބޭނުންވާ ވަރަށް ވުރެ ކަރަންޓް އުފައްދާ މިންވަރު 1،000 ކިލޯވޯޓު މަދުވެފައިވާ ކަމަށެވެ.
އެގޮތުން މިއަދު މެންދުރު 12:00 އިން އިރުއޮއްސި 19:00 އާ ދެމެދު، ހިތަދޫ އާއި ގުޅިފައިވާ ރަށްރަށުގެ ބައެއް ސަރަހައްދުތަކުން 1 ގަޑިއިރަށް ކަރަންޓުގެ ހިދުމަތް މެދުކަނޑާލަން ޖެހިދާނެ ކަމަށް ފެނަކައިން ވަނީ ބުނެފަ އެވެ.
މިގޮތަށް ކަރަންޓު ކަނޑާލަން ނިންމާ ސަރަހައްދުތަކުގެ ވާހަކަ ދުރާލައި އިއުލާނުކުރާނެ ކަމަށާއި ހަވީރު 6:00 ގެ ފަހުން ކަރަންޓު ނުކަނޑާ މެނޭޖު ކުރެވޭތޯ ބަލާނެ ކަމަށްވެސް ފެނަކައިން ބުންޏެވެ.
ރޯދަ މަހަށް އައްޑޫގެ ކަރަންޓު މައްސަލަ ހައްލުކޮށްދޭނެ ކަމަށް ފެނަކައިން ބުނި ނަމަވެސް ރޯދަ މަސް ފެށުނު ފަހުން ކަރަންޓުގެ މައްސަލައަށް ހައްލެއް ލިބިފައެއް ނުވެ އެވެ. އެގޮތުން އިންޖީނެއްގެ ހޮޅިގަނޑެއް ފަޅައިގެންދިއުމުގެ ސަބަބުން ހިތަދޫގެ ބައެއް ސަރަހައްދުތަކުން އިއްޔެ ވެސް އެއް ގަޑިއިރަށް ކަރަންޓު ކަނޑާފައިވެ އެވެ.
އައްޑޫގެ ކަރަންޓުގެ މައްސަލައާ ގުޅިގެން ފެނަކައިގެ އިސްވެރިން މަޖިލީހުގެ އެސްއޯއީ ކޮމިޓީއަށް ހާޒިރުކޮށްދޭން މީގެކުރިން އަޒާން ވަނީ ހުށަހަޅައިފަ އެވެ. އެ މައްސަލައާ ގުޅިގެން ފެނަކައިގެ އިސްވެރިން ހާޒިރުކުރަން ފާސްކުރި ނަމަވެސް މިހާތަނަށް އެ ކުންފުނީގެ ވެރިން ކޮމިޓީއަށް ގެނެސްފައެއް ނުވެ އެވެ.
ފެނަކަ އިން ދާދިފަހުން އައްޑޫއަށް 1.8 މެގަވޮޓްގެ ދެ ޖަނަރޭޓަރެއް ގެނެސް އިންސްޓޯލްކޮށް ހިދުމަތްދޭން ވަނީ ފަށާފަ އެވެ. ނަމަވެސް ކަރަންޓު ކެނޑުމުގެ މައްސަލަ އަށް ހައްލެއް ނުލިބި ދިގުލައިގެންދާތީ އާންމުންގެ ކަންބޮޑުވުން ވަނީ އިންތިހާއަށް އިތުރުވެފަ އެވެ.