މާލެއިން ފުރައިގެން ޅ. ނައިފަރަށް މިއަދު ދަތުރުކުރި ބޯޓެއްގެ އިންޖީނު ހުއްޓިގެން އެމްއެންޑީއެފް ކޯސްޓުގާޑުން އެހީތެރިކަން ފޯރުކޮށްދޭން ފަށައިފި އެވެ.
ވީ ކިހިނެއް؟ - އެމްއެންޑީއެފްް އިން ބުނީ 40 މީހުންނާ އެކު ދަތުރުކުރަމުންދިޔަ 'ލައިފްލައިން' ބޯޓުގެ އިންޖީނު ހުއްޓުނީ ކ. ކާށިދޫގެ އިރުން ކަމަށެވެ.
ތަފްސީލް - ބޯޓުގެ އިންޖީނު ހުއްޓުމާ ގުޅިގެން، އެ ބޯޓުގައި ތިބި އަންހެނުންނާއި ކުޑަކުދިން ނައިފަރަށް ގެންގޮސްދިނުމަށް އެމްއެންޑީއެފް ނޮދަން އޭރިއާ ކޮމާންޑް، ކޯސްޓްގާޑު ފަސްޓް ސްކޮޑްރަން އިން ހަރަކާތްތެރިވަމުން އަންނަ ކަމަށް އެމްއެންޑީއެފްް އިން ބުންޏެވެ.
އެގޮތުން:
އެ މީހުން ނައިފަރަށް ގެންގޮސްދިނުމުގައި އެމްއެންޑީއެފް ކޯސްޓްގާޑު ފަސްޓް ސްކޮޑްރަންގެ ދެ ހާބާ ކްރާފްޓް ލޯންޗާއި ކޯސްޓްގާޑުގެ ގަލްފް ކްރާފްޓް ލޯންޗެއް އަންނަނީ ހަރަކާތްތެރިވަމުން
މި ހާދިސާގެ ރިޕޯޓް އެމްއެންޑީއެފްއަށް ލިބުނީ ހެނދުނު 8:15 ހާއިރު
ފާހަގަ ކުރެވޭ - މި ދުވަސްވަރު ރާއްޖެ ސަރަހައްދުގައި ހުޅަނގު މޫސުމުގެ ބާރުގަދަވެ، ކުރިއަށް އޮތް ދެ ދުވަހު ވެސް ވިއްސާރަކޮށް، މޫސުން ގޯސްވާނެ ކަމަށް ލަފާ ކުރެވޭތީ ކަނޑު ދަތުރުފަތުރުކުރާ ފަރާތްތަކުން މޫސުމަށް ސަމާލުވުމަށް އެމްއެންޑީއެފް އިން ވަނީ އިލްތިމާސްކޮށްފަ އެވެ.