އައްޑޫ ހައި ސްކޫލްގެ ކަރަންޓް ބިލް ނުދައްކާތާ ހަ މަސް ދުވަސް ވެއްޖެ ކަމަށް އެ ސްކޫލުން ބުނެފި އެވެ.
ހަމައެކަނި އޭ ލެވެލް އަށް ކިޔަވައި ދެމުން އަންނަ އައްޑޫ ހައި ސްކޫލްގެ ފާއިތުވި ހަ މަސް ދުވަހުގެ ކަރަންޓް ބިލް ދައްކާފައި ނުވާ އިރު ބިލަށް 120،000ރ. އަރާފައިވާ ކަމަށް އެނގިފައިވެ އެވެ.
އެ ސްކޫލްގެ އޮފިޝަލަކު ވިދާޅުވީ ކަރަންޓް ބިލް ނުދެއްކި ލަސްވާނީ ފެނަކަ ކޯޕަރޭޝަނުން ސްކޫލަށް ތަކުރާރުކޮށް ނޯޓިސް ދެމުންދާތީ އެކަން އެޑިއުކޭޝަން މިނިސްޓްރީ އަށް ވެސް އެތައް ފަހަރެއްގެ މަތިން އަންގާފައިވާނެ ކަމަށެވެ.
ހައި ސްކޫލްގެ ފާއިތުވި ހަ މަސް ދުވަހުގެ ކަރަންޓް ބިލް ނުދައްކާކަން އެ ސްކޫލްގެ ޕްރިންސިޕަލް އިބްރާހީމް ނަދީމް ދިޓީވީ ޕްރޮގްރާކަކަށް ދެއްވި އިންޓަވިއުއެއްގައި ވެސް ވަނީ ވިދާޅުވެފަ އެވެ.
މީގެ އިތުރުން ފޯން ބިލް ނުދައްކައިގެން ދާދި ފަހުން ސްކޫލްގެ ފޯނުގެ ހިދުމަތް ވެސް ދިރާގުން ކަނޑާލުމުން ތިން ދުވަސް ވަންދެން ފޯނުގެ ހިދުމަތުން ވެސް މަހުރޫމްވެފައި ތިބެން ޖެހުނު ކަމަށް ނަދީމް ވިދާޅުވެފައިވެ އެވެ.
އެޑިއުކޭޝަން މިނިސްޓަރު ޑރ. އާސިމް އަހުމަދު ދާދި ފަހުން އައްޑު އަށް ވަޑައިގަތުމުން ސްކޫލްގެތަކުގެ ކަރަންޓް ބިލްގެ މައްސަލާގައި ސުވާލް ކުރުމުން ވިދާޅުވީ ކަރަންޓް ބިލް ނުދެއްކުމުގެ މައްސަލަތަކެއް މިހާރު ނޫޅޭނެ ކަމަށެވެ.
އެހެން ނަމަވެސް ރައީސް ޑރ. މުހައްމަދު ވަހީދު ވެރިކަމާ ހަވާލުވެވަޑައިގަތް އިރު، ގިނަ އަދަދެއްގެ ބިލް ނުދެއްކި ހުރި ނަމަވެސް، ބިލްތައް ދައްކަމުން އަންނަ ކަމަށް މިނިސްޓަރު ވިދާޅުވި އެވެ.
އެހެންވެ ސްކޫލްތަކުގެ ކަރަންޓް ބިލް ނުދެއްކޭ މައްސަލަ އެހާ ބޮޑަށް ކުރިމަތިވެފައި ނުވާނެ ކަމަށް ޑރ. އާސިމް ވިދާޅުވި އެވެ.