ފައިނަލް ވޯޓާސް ލިސްޓް ޖުމުހޫރީ ގުޅުމަށް ލިބި، އެ ލިސްޓް ޗެކް ކުރުމުގެ މަސައްކަތް ފަށައިފި އެވެ.
ޖުމުހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމް ވިދާޅުވީ، އެ ލިސްޓް ޖުމުހޫރީ ޕާޓީއަށް ލިބުނީ މިއަދު 4:03 ގައި ކަމަށެވެ.
އެ ޕާޓީގެ ކެމްޕެއިން ސްޓިއަރިން ކޮމެޓީގެ ޗެއާމަން އުމަރު ނަސީރު ވިދާޅުވީ، މުޅި ލިސްޓް ޗެކް ކުރަން މަދުވެގެން 48 ގަޑި އިރު ބޭނުންވާ ކަމަށާއި ލިސްޓް ވެރިފައި ކުރުމުގެ މަސައްކަތް މިހާރު ކުރުމުގެ މަސައްކަތް ކުރަމުން އަންނަ ކަމަށެވެ. އަދި ރީރެޖިސްޓްރީ ކުރި މީހުންގެ ފަސް ޕަސެންޓް ފޯމް ވެރިފައި ކުރަން ބޭނުންވާ ކަމަށް ވެސް ބުންނެވެ.
އުމަރު ވިދާޅުވީ ލިސްޓުގައި ސޮއި ކުރުމުގެ ކުރިން މައިގަނޑު ދެ ކަމެއް ފުރިހަމަ ކޮށްދިނުމަށް އިލެކްޝަންސް ކޮމިޝަންގައި އެދުނު ކަމަށާއި އޭގެތެރެއިން އެއްކަމަކީ ވޯޓާސް ފައިނަލް ލިސްޓު ދިނުން ކަމަށާއި އެ ލިސްޓް ލިބުނީ މިއަދު ހަވީރު ކަމަށެވެ. އަދި ރީރެޖިސްޓްރީ ކުރި މީހުން ފަސް ޕަސެންޓް ފޯމް މިހާތަނަށް ވެރިފައިކޮށްދީފައި ނުވާ ކަމަށެވެ.
ސުޕްރީމް ކޯޓުގެ ގައިޑްލައިންގައި ބުނެފައިވާ ގޮތުގެ މަތިން އިލެކްޝަންސް ކޮމިޝަނުން އިންތިހާބު ބޭއްވުމުގެ ކުރިން އިންތިހާބާބެހޭ ގޮތުން ދައުލަތުގެ އެހެން މުއައްސަސާތަކުން ހޯދަން ދޭންޖެހޭ ޔަގީންކަން ވެސް މިހާތަނަށް ހޯދިފައި ނުވާ ކަމަށާއި އޭގެ ތެރެއިން ވޯޓާސް ސެކިއުރީޓީ އާއި ގުޅޭ ގޮތުން ފުލުހުންގެ ބަހެއް ވެސް އިލެކްޝަންސްގެ ޑާޓާބޭސްގެ ސެކިއުރިޓީއާއި ގުޅޭގޮތުން އެންސީއައިޓީގެ ބަހެއް އަދި ލިބިފައި ނުވާކަމަށް އުމަރު ވިދާޅުވި އެވެ.
އުމަރު ވިދާޅުވީ މިހާރު ވެސް އިލެކްޝަންސްގެ ސާވާއަށް ބޭރުން ވަދެ އެއް ފޮށިން އަނެއް ފޮއްޓަށް މީހުން ބަދަލު ކުރަމުން ދާ ކަމަށާއި އެގޮތަށް ބާއްވައިގެން އަދި އެކަމަށް އެންސީއައިޓީ އާއި ފުލުހުންނާއި ޑީއެންއާރްގެ ބަހެއް ނެތި މާދަމާ އިންތިހާބަށް ގޮސްފިނަމަ މުޅި އިންތިހާބަކީ މިނިވަން އިންސާފުވެރި އިންތިހާބަކަށް ނުވާނެ ކަމަށާއި ސުޕްރީމް ކޯޓްގެ ހުކުމުގައި ބުނާ 16 ނުކުތާގެ ގައިޑުލައިން ރަނުން ރަނަށް ފުރިހަމަ ނުކޮށް އިންތިހާބު ބޭއްވުމަކީ ކުރެވޭނެ ކަމެއް ނޫން ކަމަށެވެ.