ރައްޔިތުން މަޖިލީހުގެ ތޮއްޑޫ ދާއިރާގެ މެމްބަރު އަލީ ވަހީދުގެ މައްޗަށް ކުރާ ކޮރަޕްޝަންގެ ތުހުމަތުގެ މައްސަލައިގެ ތަހުގީގަށް އޭނާ ހޮނިހިރު ދުވަހުގެ ރޭ ފުލުސް އޮފީހަށް ހާޒިރުވުމަށް ޗިޓް ފޮނުވައިފި އެވެ.
އެމްޑީޕީގެ ޕާލިމެންޓްރީ ގްރޫޕްގެ ޑެޕިއުޓީ ލީޑަރު ކަމުގައި ވެސް ހުންނެވި އަލީ ވަހީދު މިއަދު ވިދާޅުވި ގޮތުގައި އޭނާ އަށް ޗިޓް ފޮނުވީ ހޮނިހިރު ދުވަހުގެ ރޭ 9:00 އަށް ޕޮލިހަށް ހާޒިރުވުމަށެވެ. އެއީ ކޮން މައްސަލައެއްގައި ކަމެއް އޭނާ ވިދާޅެއް ނުވެ އެވެ.އަލީ ވަހީދު ޕޮލިހަށް ހާޒިރުކުރަން ނިންމުމާ ގުޅިގެން އެމްޑީޕީން މިރޭ ނެރުނު ބަޔާނެއްގައި ބުނީ އެއީ ރިޔާސީ އިންތިހާބުގެ ކެމްޕޭނަށް އެ ޕާޓީން ކުރާ މަސައްކަތަށް ހުރަސް އެޅުމަށް ކަމަށް ކުރާ ކަމެއް ކަމަށެވެ. އެ ބަޔާނުގައި ބުނީ މި ދަނޑިވަޅުގައި އަލީ ވަހީދަށް ޗިޓް ފޮނުވީ "ބިރު ދައްކައި ގޯނާ ކުރުމުގެ ގޮތުން" ކަމަށެވެ. އަދި އެއީ ޕޮލިސް ކޮމިޝަނަރު އަބްދުﷲ ރިޔާޒު ހިންގަވާ ފިނޑި އަމަލެއް ކަމަށާއި އެފަދަ އަމަލުތައް ވަގުތުން ހުއްޓާލަން ވެސް ބަޔާނުގައި ބުނެފައިވެ އެވެ.     "އެއްވެސް ހަމައެއް އުސޫލެއް ނެތް ގޮތަށް އަބްދުﷲ ރިޔާޒު މިފަދައިން އަމަލު ކުރައްވަމުންދާ ސަބަބަކީ އޭނާއަކީ ބަޣާވާތުގެ ބައިވެރިއަކަށް ވާތީ އާއި ރައްޔިތުންނަށް ޖިސްމާނީ އަނިޔާ ކުރައްވާފައިވާ ބޭފުޅަކަށް ވާތީ އާއި އަދި ކޮމިޝަނަރު އޮފް ޕޮލިސްގެ މަގާމުގައި ހުންނަވައި އޭނާ ނުރުހޭ ރިޔާސީ ކެންޑިޑޭޓަކަށް ވާ ނަމަ ފާޅުގައި އެންޓި ކެމްޕޭން ކުރައްވާ ބޭފުޅެއްކަން ޕޮލިސް އިންޓެގްރިޓީ ކޮމިޝަންގެ ތަހުގީގުން ވެސް ސާބިތުވާ ބޭފުޅަކަށް ވާތީ އާއި އެހެން ކަމުން އެ ބޭފުޅާ އަކީ ގާނޫނާ މުޅިން ޚިލާފުވެ އަދި މިހާރު މުޅިން ގޮތް ހުސްވެފައިވާ ބޭފުޅެއް ކަމަށް ވާތީ ކަމުގައި ދެކެމެވެ،" އެމްޑީޕީގެ ބަޔާނުގައިވެ އެވެ.       "ހަވީރަ"ށް އެނގިފައިވާ ގޮތުގައި ފުލުހުން ބަލަމުން ދަނީ އަލީ ވަހީދުގެ މަންމަ 7.9 މިލިއަން ރުފިޔާ އަށް މާލެ އިން ގަނެފައިވާ ގޯއްޗެއްގެ މައްސަލަ އެވެ. މީގެ ކުރިން މީޑިއާ އަށް ހާމަވި ލިޔުންތަކުން އެނގޭ ގޮތުގައި އަލީ ވަހީދުގެ މަންމަ މާލެ އިން ގަތް ގޯއްޗަށް ފައިސާ ދައްކާފައި ވަނީ އޭނާގެ ފިރިމީހާ ކަމަށް ބުނި ނަމަވެސް އެ ފައިސާ ދައްކާފައި ވަނީ ޓެޕް ކޮންސްޓްރަކްޝަނުންނެވެ.      މި މައްސަލައިގައި އަލީ ވަހީދުގެ އަނބިކަނބަލުން އައިޝަތު ލީޝާ އާއި އަލީ ވަހީދުގެ މަންމަ އއ. ތޮއްޑޫ، ހަނީމޫން، ޒުހުރާ އަބްދުﷲ އާއި އޭނާގެ ބައްޕަ މުހައްމަދު ވަހީދު އަދި ޓެޕް ކުންފުނީގެ މެނޭޖިން ޑިރެކްޓަރު އަލި މަނިކު )ޓެޕް އައްޔަ( ވަނީ ޕޮލިހަށް ހާޒިރުކޮށްފަ އެވެ. އަލީ ވަހީދު ކުރިން ވިދާޅުވެފައި ވަނީ އޭނާގެ އާއިލާގެ ބޭފުޅުން ފުލުސް އޮފީހަށް ހާޒިރުކުރަނީ އޭނާ އަށް ބިރު ދެއްކުމަށް ކަމަށެވެ.