ޖުމްހޫރީ ޕާޓީގެ ލީޑަރު އޮންރަބަލް ގާސިމް އިބްރާހިމް ހައްޔަރުކުރުމާ ގުޅިގެން އެމަނިކުފާނުގެ ނިސްބަތްވެވަޑައިގަންނަވާ އދ. މާމިގިލީ ރައްޔިތުން ހިތްހަމަނުޖެހުން ފާޅުކޮށް މުޒާހަރާކުރަން ފަށައިފި އެވެ.
ވީނިއުސް އަށް މައުލޫމާތު ދެއްވަމުން މާމިގިލި ކައުންސިލްގެ ނައިބް ރައީސް އަބްދުﷲ މުފީދު ވިދާޅުވީ ގާސިމް ހައްޔަރުކުރުމާއެކު ރަށުގެ ހުރިހާ ރައްޔިތުން ކަހަލަ ގޮތަކަށް މަގުމައްޗަށް ނިކުމެ މުޒާހަރާ ކުރަމުންދާ ކަމަށެވެ. އަދި ރައްޔިތުން ތިބީ ވަރަށް ބޮޑަށް ހިތްހަމަނުޖެހިފައި ކަމަށާއި ގާަސިމް ހައްޔަރުކުރުމުން ބައެއް ރައްޔިތުން ރޮއެ ހަދާފައިވާ ކަމަށްވެސް ވިދާޅުވި އެވެ.
މުފީދު ވިދާޅުވީ މުޒާހަރާގެ ބައިވެރިން މިހާރުން މިހާރަށް ގާސިމް ދޫކޮށްލުމަށް ގޮވާލާ އަޑުއުފުލަމުންދާ ކަމަށެވެ. އަދި ގާސިމް ދޫކޮށް ނުލާހާ ހިނދެއްގައި ގެއަށް ނުވަންނާނެ ކަމަށްވެސް ބައެއް ރައްޔިތުން ބުނަމުންދާ ކަމަށްވެސް ވިދާޅުވި އެވެ.
މުފީދު ވިދާޅުވީ މާމިގިލި ޕޮލިސްޓޭޝަން ކުރިމަތީގައިވެސް ގިނަ އަދަދެއްގެ ރައްޔިތުން މުޒާހަރާ ކުރަމުންދާ ކަމަށެވެ. ގާގާނޫނާއި ހިލާފު ގޮތަކަށް ގާސިމް ހައްޔަރުކޮށްފައިވާތީ އެކަން ހަރުކަށި އިބާރާތުން ކުށްވެރިކުރާ ކަމަށް މުޒާހަރާގެ ބައިވެރިން ބުނަމުންދާ ކަމަށްވެސް ވިދާޅުވި އެވެ.
މުފީދު ވިދާޅުވީ ރައްޔިތުން މިހާރު ބޭނުންވަނީ ރައްޔިތުންގެ އިމާރާތެއްގައި ހިންގަމުން ގެންދާ މާމިގިލީ ޕޮލިސްޓޭޝަން ވަގުތުން ވަގުތަށް ހުސްކުރުމަށްފަހު އެ އިމާރާތް ރައްޔިތުންނާ ހަވާލު ކުރުމަށް ކަމަށެވެ. އަދި އެކަމާ ގުޅިގެން މާމިގިލީ ކައުންސިލުން ގަރާރެއް ނެރުމަށް މިހާރު މަސައްކަތް ކުރަމުންދާ ކަމަށްވެސް ވިދާޅުވި އެވެ.
"ރައްޔިތުން މިތިބީ ވަރަށް ރުޅިގަދަވެފަ. މާމިގިލީގެ ޕޮލިސްޓޭޝަން ހަދާފައި އެހުންނީ ރައްޔިތުންގެ އިމާރާތެއްގައި. ރައްޔިތުން ބޭނުންވަނީ މިހާރުން މިހާރަށް ފުލުހުން ތިބި އިމާރާތް ހުސްކޮށް އެއިމާރާތް ރައްޔިތުންނާ ހަވާލުކުރުމަށް. އަދި އެކަމަށް އެދި ގަރާރެއް ފާސް ކުރުމަށް ރައްޔިތުން ބޭނުންވަނީ. އެ ގަރާރު ނެރުމުގެ މަސައްކަތް މިހާރު ކުރަނީ،" މުފީދު ވިދާޅުވި އެވެ.
ކޯޓު އަމުރެއްގެ ދަށުން ގާސިމް އިބްރާހީމް ހައްޔަރުކުރީ އެމަނިކުފާނު ދިރިއުޅުއްވާ މާފަންނު ވިލާގައި ހުންނަވަނިކޮށެވެ. އެމަނިކުފާނު ހައްޔަރު ކޮށްފައިވަނީ ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތްކަމުގެ ވޯޓު ނެގުމަށް އެޖެންޑާކޮށް ވަގުތު ކައިރިވެފައިވަނިކޮށް، ގާސިމް ބޭނުންވާ ވަކިގޮތަކަށް އެ ވޯޓު އަނބުރާލުމަށްޓަކައި، މަޖިލީހުގެ މެމްބަރުންނަށް ރިޝްވަތު ދިނުމުގެ، އަމަލުތަކެއް ހިންގާފައިވާ ކަމަށް ތުހުމަތު ކުރެވިފައިވާތީ ކަމަށް ފުލުހުން ނެރެފައިވާ ބަޔާނުގައި ބުނެފައިވެ އެވެ.