މަތީ ތައުލީމާއި ތަމްރީނުދޭ 101 މަރުކަޒަކުން ރީ-ރަޖިސްޓްރީ ނުކުރާތީ، އެ ތަންތަނުން ހިންގާ ކޯސްތަކުގެ ސަނަދުތައް ބަލައިނުގަތުމަށް, މޯލްޑިވްސް ކޮލިފިކޭޝަންސް އޮތޯރިޓީ (އެމްކިއުއޭ) އިން ނިންމައިފި އެވެ.އެމްކިއުއޭ އިން ކުރި އިއުލާނެއްގައި ބުނީ މަތީ ތައުލީމާއި ތަމްރީނުގެ ދޭ ގާނޫނުގެ ދަށުން އެ ހިދުމަތްދޭ މަރުކަޒުތައް ހިންގޭނީ ހަޔާ އެޑިއުކޭޝަން މިނިސްޓްރީގައި ރަޖިސްޓްރީވުމަށްފަހު އެވެ.އެކަމަކު މިއަދާ ހަމައަށް 101 ތަނަކުން ރީރަޖިސްޓްރީ ކޮށްފައި ނުވާތީ އެ ތަންތަނުގެ ލިސްޓެއް މިނިސްޓްރީން އެމްކިއުއޭ އަށް ފޮނުވާފައިވާ ކަމަށް އެ އޮތޯރިޓީން ބުންޏެވެ.އެހެންވެ، އެ ކޮލެޖުތަކާއި އިންސްޓިޓިއުޓްތަކުން ރީރަޖިސްޓްރީވެފައި ނުވާތީ، އެތަންތަނަށް ކުރިން ހުއްދަ ދިން ޕްރޮގްރާމުތަކުގެ ހުއްދަ ގަބޫލު ނުކުރާނެ ކަމަށް އެމްކިއުއޭ އިން ބުނެ އެވެ.އެމްކިޔުއޭއިން ވަނީ ގެޒެޓްގައި އެ މަރުކަޒުތަކުގެ ލިސްޓް އާއްމުކޮށްފައެވެ.ނަމަވެސް ކުރިން އެޕްރޫވަލް ދީފައިވާ ޕްރޮގްރާމްތަކުން ކިޔަވާފައިވާ އަދި އެމްކިއުއޭއަށް ބެޗް އޮޑިޓަށް ފޮނުވާފައިވާ ދަރިވަރުންގެ ސަނަދު އެ އޮތޯރިޓީން ގަބޫލުކުރާނެ ކަމަށް އެ އޮތޯރިޓީން ބުންޏެވެ.މަތީ ތަޢުލީމާއި ތަމްރީންގެ ޤާނޫނުގެ ދަށުން މަރުކަޒުތަކުން ހިންގާ ކޯސްތަކުން ދޫކުރާ ސަނަދު އެމްކިޔުއޭއަށް ގަބޫލުކުރެވޭނީ އެ މަރުކަޒަކީ އެޑިއުކޭޝަން މިނިސްޓްރީން އެކުލަވާލާ ދަފްތަރުގައި ރަޖިސްޓްރީވެފައިވާ މަރުކަޒަކަށްވާނަމަ އެކަންޏެވެ.