ކުދިންނަށް ގޭގައި ކިޔަވައިދިނުމަށް ރޮބޮޓެއް ބޭނުންކުރުމަށް މެލާނިއާ ޓްރަމްޕް ހުށަހަޅުއްވައިފިއެވެ. ބުދަ ދުވަހު ވައިޓް ހައުސްގައި ބޭއްވި ނޫސްވެރިންގެ ބައްދަލުވުމެއްގައި، އެމެރިކާގެ ފަސްޓް ލޭޑީ މެލާނިއާ ޓްރަމްޕް، 'ފިގާ އޭއައި' ކުންފުނިން އުފައްދާފައިވާ އިންސާނެއްގެ ސިފަޖެހޭ (ހިއުމަނޮއިޑް) ރޮބޮޓަކާއެކު ވަނީ ފެނިފައެވެ. ރަތް ދޫލައިގެ މަތިން މެލާނިއާއާއެކު ހިނގާފައި ދިޔުމަށްފަހު، މި ރޮބޮޓް ވަނީ ކުރު ތަގްރީރެއް ދީފައެވެ. އެގޮތުން ޓެކްނޮލޮޖީއާއި ތަޢުލީމުގެ ޒަރީއާއިން ކުޑަކުދިން ބާރުވެރިކުރުމުގެ މި ތާރީޚީ ހަރަކާތުގައި ބައިވެރިވުމަކީ ލިބޭ އުފަލެއް ކަމަށް ރޮބޮޓް ބުންޏެވެ. އަދި އޭގެ ކުޑައިރުކޮޅެއް ފަހުން ރޮބޮޓް ވަނީ އެތަނުން ގޮސްފައެވެ. https://x.com/Figure_robot/status/2036857384283644256 މިކަން ހިނގާދިޔައީ ފަސްޓް ލޭޑީ މެލާނިއާ ޓްރަމްޕް ދާދިފަހުން ފެއްޓެވި "ފޮސްޓަރިން ދަ ފިއުޗާ ޓުގެދާ" ގްލޯބަލް ސަމިޓުގެ ތެރެއިންނެވެ. މި ސަމިޓަކީ އާޓިފިޝަލް އިންޓެލިޖެންސް (އޭއައި) ހިމެނޭގޮތަށް އެޑިއުކޭޝަނަލް ޓެކްނޮލޮޖީ މެދުވެރިކޮށް ކުދިން ބާރުވެރިކުރުމާ ގުޅޭގޮތުން މަޝްވަރާކުރުމަށް ދުނިޔޭގެ އެކި ކަންކޮޅުތަކުގެ ލީޑަރުންނަށް ދައުވަތު ދީގެން ބޭއްވި ސަމިޓެކެވެ. މި ހަފްލާގައި ވާހަކަފުޅު ދައްކަވަމުން މެލާނިއާ ވަނީ، އިންސާނެއްގެ ބަދަލުގައި ރޮބޮޓެއް ދުނިޔޭގެ ކުޑަކުދިންނަށް ކިޔަވައިދޭ މުދައްރިސެއްގެ ގޮތުގައި ހަރަކާތްތެރިވާނެ މުސްތަޤުބަލެއް ތަޞައްވުރު ކުރުމަށް އެދިވަޑައިގެންފައެވެ. އެކަމަނާ ވިދާޅުވި ގޮތުގައި "ޕްލޭޓޯ" ގެ ނަން ދެވިފައިވާ މިފަދަ ރޮބޮޓެއްގެ ސަބަބުން ސައިންސާއި، އާޓާއި، ފިލޯސަފީ އަދި ތާރީޚު ފަދަ މާއްދާތަކާ ގުޅޭ އިންސާނިއްޔަތުގެ މުޅި މަޢުލޫމާތު ޚަޒާނާ ގޭގައި ތިބެގެން ކުދިންނަށް ފަސޭހަކަމާއެކު ލިބިގެންދާނެއެވެ. މީގެ އިތުރުން މިއީ ކޮންމެ ކުއްޖެއްގެ ބޭނުންތަކާ ގުޅޭގޮތަށް، ކެތްތެރިކަމާއެކު ކިޔަވައިދޭނެ އެއްޗެއް ކަމަށާއި، މީގެ ސަބަބުން ކުދިންގެ އަމިއްލަ ވިސްނުމުގެ ބާރު ކުރިއަރައިގެންދާނެ ކަމަށް ވެސް އެކަމަނާ ވިދާޅުވިއެވެ. މެލާނިއާގެ މި ވާހަކަފުޅުތަކަކީ މުސްތަޤުބަލަށް އަމާޒުކޮށް ދެއްކެވި ވާހަކަފުޅުތަކަކަށް ވީނަމަވެސް، އޭއައި އަދި ޓެކްނޮލޮޖީ ބޭނުންކޮށްގެން އިންސާނީ މުދައްރިސުންގެ ބަދަލުގައި ކިޔަވައިދިނުމުގެ ނިޒާމު އޮޓޮމޭޓް ކުރުމުގެ ވިސްނުން ޓެކް އިންޑަސްޓްރީގައި އަންނަނީ މަޤުބޫލުވަމުންނެވެ. އަދި ވައިޓް ހައުސްއިން ވެސް އަންނަނީ މިފަދަ ޚިޔާލުތަކަށް ތަރުހީބުދެމުންނެވެ. ވޭތުވެދިޔަ އަހަރުތެރޭގައި، އޭއައި ބޭނުންކޮށްގެން ކުދިންނަށް ހަލުވި ދުވެއްޔެއްގައި ކިޔަވައިދޭ ޕްރައިވެޓް ސްކޫލް ނެޓްވޯކެއް ކަމަށްވާ "އަލްފާ ސްކޫލް" ފަދަ ތަންތަނަށް ވަނީ ގިނަ ބައެއްގެ ސަމާލުކަން ލިބިފައެވެ. ޓްރަމްޕްގެ ސަރުކާރުން ވަނީ އާދައިގެ ޕަބްލިކް ސްކޫލް ނިޒާމަށް ފާޑުކިޔައި، މިފަދަ އައު ތަޖުރިބާތަކަށް މަރުހަބާ ކިޔާފައެވެ. އެގޮތުން، އެމެރިކާގެ ސެކްރެޓަރީ އޮފް އެޑިއުކޭޝަން ލިންޑާ އީ. މެކްމޭހަން (އެކަމަނާއަކީ އެޑިއުކޭޝަން ޑިޕާޓްމަންޓް އުވާލުމުގެ މަސައްކަތާ ހަވާލުވެ ހުންނެވި ބޭފުޅާ) ދާދިފަހުން ވަނީ އަލްފާ ސްކޫލްގެ ކެމްޕަހަކަށް ޒިޔާރަތްކުރައްވައި، އެތަނުގެ ކިޔަވައިދިނުމުގެ ނިޒާމަށް ތައުރީފު ކުރައްވާފައެވެ. އެމެރިކާ ސަރުކާރުން ބުނެފައިވާ ގޮތުގައި އަލްފާ ސްކޫލުން އަންނަނީ ކުދިންނަށް އޭއައިގެ ހުނަރުތައް ދަސްކޮށްދީ، މުސްތަޤުބަލުގެ ވަޒީފާގެ މާހައުލަށް އެކުދިން ތައްޔާރުކޮށްދެމުންނެވެ. ބުދަ ދުވަހު މެލާނިއާ ޓްރަމްޕް ބޭއްވި ހަރަކާތުން ވެސް ދައްކުވައިދެނީ، އެމެރިކާގެ ތަޢުލީމީ ދާއިރާގެ މުސްތަޤުބަލުގައި ޓެކްނޮލޮޖީ ކުންފުނިތަކާއި ޕްރައިވެޓް ސެކްޓާގެ ދައުރު ފުޅާކުރުމަށް ޓްރަމްޕްގެ ސަރުކާރުން ބޭނުންވާކަމެވެ. އެގޮތުން އެ ހަފްލާގައި، ތަޢުލީމީ އައު އީޖާދުތަކަށް އެހީތެރިވުމުގައި އެމެރިކާގެ ބޮޑެތި ޓެކްނޮލޮޖީ ކުންފުނިތަކުގެ ބައިވެރިވުން މެލާނިއާ ޓްރަމްޕް ވަނީ ފާހަގަކުރައްވާފައެވެ.