މެދުއިރުމަތީގައި މިހާރު ކުރިއަށްދާ ހަމަނުޖެހުންތަލާ ގުޅިގެން ތެލަށް ނުޖެހޭނެކަމުގެ ޔަގީންކަން އެބައޮތް ކަމަށް އިކޮނޮމިކް މިނިސްޓަރު މުހައްމަދު ސައީދު މިއަދު ވިދާޅުވެއްޖެ އެވެ.
ރައީސް އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި އޭނަ ވިދާޅުވީ މެދުއިރުމަތީގައި ހަމަނުޖެހުމެއް އުފެދިއްޖެ ނަމަ އަބަދު ވެސް އެންމެ އަވަހަށް އަސަރު ކުރަނީ ތެލުގެ އަގަށް ކަމަށެވެ. އެގޮތުން އިއްޔެ ވެސް ތެލުގެ އަގު 20-25 ޕަސެންޓަށް އުފުލުނު ކަމަށް ވިދާޅުވި އެވެ.
ސައީދު ވިދާޅުވީ ހާލަތު މިހާރު އޮތް ގޮތުން ތަކެތީގެ އަގަށް ބަދަލު އަންނަމުންދާ ކަމަށާއި ރާއްޖެއިން ފިޔަވަޅުތައް އަޅަނީ އެކަންތަކަށް ވިސްނައިގެން ކަމަށެވެ.
"އިއްޔެ ރައީސް ފާހަގަކުރެއްވި ގޮތަށް އަޅުގަނޑުމެންނަށް އަދި އެއްވެސް ކަންބޮޑުވުމެއް ނެތް،" ސައީދު ވިދާލުވި އެވެ. "ކުރުކޮށް ދަންނަވާ ނަމަ ތެލަކަށް ނުޖެހޭނެ، އިރާދަކުރެއްވިއްޔާ. އެލްޕީޖީ ވެސް އަދި ތެޔޮ ވެސް ހިމަނައިގެން މި ދެންނެވީ."
ސައީދު ވިދާޅުވީ ތެޔޮ ރައްކާކުރާނެ ކެޕޭސިޓީ އިތުރު ކުރުމަށް ވެސް ސަރުކާރުން މަސައްކަތް ކުރަމުން އަންނަ ކަމަށެވެ. އެގޮތުން،
ރާއްޖެ އަންނަ ޓޫރިސްޓުންނާއި ރާއްޖޭގައި މަސައްކަތް ކުރާ އާބާދީ ވެސް އިތުރުވަމުން އަންނަ އިރު އެ ހުރިހާ އެންމެންނަށް ކޭޓާ ކުރެވޭ ވަރަށް ތެލާއި ކާބޯތަކެތީގެ ރައްކާތެރިކަން ކަށަވަރު ކުރުމަށް މަސައްކަތް ކުރާ ކަމަށް ވިދާޅުވި އެވެ.
"ފްލޯޓިން އާބާދީއަކާއި ރާއްޖޭގެ އާބާދީ އާއި އަންނަ ފަތުރުވެރިންގެ އަދަދު އެއްކޮށްލީމާ ކުރީގެ ހާލަތްތަކަށް ބަލާއިރު ކޮންސިއުމް ކުރާ މީހުންގެ އަދަދު ވަނީ އިތުރުވެފައި،" ސައީދު ވިދާޅުވި އެވެ. "އެހެންވެ މި ހަގީގަތްތަކަށް ވެސް ބަލައިގެން މުސްތަގުބަލަށް ކަންތައްތަކެއް އެބަ ރޭވޭ. މީގެ ކުރިން މުދާ ރައްކާ ކުރާ މިންވަރަށް ވުރެ އިތުރަށް މުދާ ރައްކާ ކުރެވޭނެ ގޮތްތަކެއް."
އޭނަ ވިދާޅުވީ ރާއްޖެއަށް މުދާ ގެންނަން އިތުރު ރޫޓުތައް ވެސް ބަލަމުން އަންނަ ކަމަށެވެ.
"ރައްޔިތުންގެ ފުޑް ސެކިއުރިޓީ އާއި ކޮމޮޑިޓީ ސެކިއުރިޓީއަށްޓަކާ އިކޮނޮމިކް ރިއަލިޓީ އާއި ސްޓޯރޭޖާއި ލޮޖިސްޓިކްސްއާ، މި ކަންތައް ރާއްޖޭގައި ދެމެހެއްޓެނިވި ގޮތެއްގައި ކަށަވަރު ކުރުމަށް ސަރުކާރުން އެބަ ކަންތައްތަކެއް ކުރިއަށް ގެންދޭ،." މިނިސްޓަރު ވިދާޅުވި އެވެ.