މުއިއްޒުގެ އަމުރަށް ޖޭއެސްސީއަށް މަޖިލީހުން މިއަދު އައްޔަންކުރި ސައުދާގެ ކުރީގެ ފިރިމީހާ ފައުޒީއަކީ, ހައުސިން މިނިސްޓަރުކަމުގައި މުއިއްޒުއަށް ކޮރަޕްޝަންގެ ފައިސާ ލޯންޑަރ ކޮށްދިން ފަރާތްކަން ހާމަވެއްޖެއެވެ.
އެގޮތުން އޭނާގެ ނަން, 2024 ވަނަ އަހަރު ލީކުވި އެމްއެމްއޭގެ FIU (ފައިނޭންޝަލް އިންޓެލިޖެންސް ޔުނިޓް) ރިޕޯޓުގައާއި މުއިއްޒުގެ މައްޗަށް ތުހުމަތު ކުރެވޭ ކޮރަޕްޝަންގެ ތުހުމަތުތަކާއި ގުޅޭގޮތުން ފޮލިހުން ތައްޔާރު ކުރި ޕޮލިސް އިންޓެލިޖެންސް ރިޕޯޓުގައިވެސް, މުއިއްޒުއަށް މަނީ ލޯންޑަރ ކޮށްދިނުމުގައި އޭނާ އަދާކޮށްފައިވާ ދައުރު ފާހަގަ ކޮށްފައި އެބައޮތެވެ.
2024 ވަނަ އަހަރުގެ ކުރީކޮޅު ލީކުވި, މުއިއްޒު ހިންގާފައިވާ, ކޮރަޕްޝަނަށް ތުހުމަތު ކުރެވޭ އެތައް މުއާމަލާތެއް އެކުލެވޭ އެމްއެމްއޭގެ FIU (ފައިނޭންޝަލް އިންޓެލިޖެންސް ޔުނިޓް) ރިޕޯޓުގެ އެންމެ ފުރަތަމަ ސަފްހާގައި ބަޔާން ކޮށްފައިވާ ގޮތުން 2018 ވަނަ އަހަރުގެ ނޮވެމްބަރުމަހުގެ 8 ވަނަ ދުވަހު އިދުރީސް ފައުޒީ ނަމަކަށް ކިޔާ މީހަކު, ކޯޕަރޭޓް ކަސްޓަމަރ (ދިމްޔާތު ޕްރައިވެޓް ލިމިޓެޑް) ފަރާތުން 3.5 މިލިއަން ރުފިޔާ ބޭންކަށް ޖަމާކުރުމަށް ބޭންކަށް ގޮސްފައި ވެއެވެ. އަދި އެމުއާމަލާތަށް ބާރު ލިބިދިނުމުގެ ގޮތުން ދިމްޔާތު ޕްރައިވެޓް ލިމިޓެޑްއާއި މުހައްމަދު މުއިއްޒުއާއި ދެމެދު ހަދާފައިވާ އެއްބަސްވުމެއް ބޭންކަށް ހުށަހަޅާފައި ވެއެވެ.
ހަމަ އެ ރިޕޯޓު 11 ވަނަ ސަފްހާގައި ވާގޮތުން, 2017 ވަނަ އަހަރު މުއިއްޒުގެ އެކައުންޓަށް 3 ފަހަރެއްގެ މަތިން އިދުރީސް ފައުޒީ ވަނީ 17 ހާސް ޑޮލަރު ޖަމާކޮށްފައެވެ. އަދި ހަމަ އެ ސަފްހާގައި ބުނެފައިވާގޮތުން 2015 ވަނަ އަހަރުގެ މާރޗްމަހުން ފެށިގެން 2018 ވަނަ އަހަރުގެ ނޮވެމްބަރު މަހާއި ދެމެދު މުއިއްޒު 7 ފަހަރެއްގެ މަތިން ޖުމްލަކޮށް އިދުރީސް ފައުޒީގެ އެކައުންޓަށް ޖުމްލަ 14 ހާސް ޑޮލަރު ޖަމާކޮށްފައި ވެއެވެ. އެމްއެމްއޭގެ FIU (ފައިނޭންޝަލް އިންޓެލިޖެންސް ޔުނިޓް) ރިޕޯޓުގެ އެ ސަފުހާފައި ފާހަގަ ކޮށްފައިވާގޮތުން މުއިއްޒުގެ ފަރާތުން ބޭންކަށް އަބަދުވެސް ޒިޔާރަތް ކުރާ ފަރާތަކީވެސް އިދުރީސް ފައުޒީއެވެ. އެހެންނަމަވެސް އޭނާއާއި މުއިއްޒުއާއި ދެމީހުންގެ މެދުގައި އޮތް ވިޔަފާރީގެ އެއްވެސް ގުޅުމެއް ބޭންކަށް ސާބިތުކޮށްދީފައެއް ނުވެއެވެ.
އެމްއެމްއޭގެ FIU (ފައިނޭންޝަލް އިންޓެލިޖެންސް ޔުނިޓް) ރިޕޯޓުގައި ވާގޮތުން, މުއިއްޒު ކޮރަޕްޝަނަށް ޝައްކުރެވޭ މުއާމަލާތްތައް ހިންގާފައިވަނީ 3 ނަމެއްގައެވެ. އެއީ އޭނާގެ އަމިއްލަ ނަމުގައާއި ދިމްޔާތު ޕްރައިވެޓް ލިމިޓެޑްގެ ނަމުގައާއި އިދުރީސް ފައުސޒީގެ ނަމުގައެވެ. އެގޮތުން ރިޕޯޓުގެ 3 ވަނަ ސަފްހާގައި އިދުރީސް ފައުޒީގެ ނަމުގައި އުފައްދާފައިވާ “ފައުޒު އިންވެސްޓްމަންޓް”ގެ ކުންފުނިން ނައިޖީރިއާ އަދި އިންޑިއާއަށްވެސް ފައިސާ ފޮނުވާ ހަދާފައި ވެއެވެ. އަދި މުއިއްޒުގެ ފަރާތުން ބޭންކާއި ކުރާ އެންމެހާ މުއާމަލާތްތަކެއްވެސް ކުރުމުގައި އެންމެ އިސްކޮށް ހުންނަނީ އިދުރީސް ފައުޒީކަން އެމްއެމްއޭގެ FIU (ފައިނޭންޝަލް އިންޓެލިޖެންސް ޔުނިޓް) ރިޕޯޓުގެގެ 3 ވަނަ ސަފްހާގައިވެސް ފާހަގަ ކޮށްފައި ވެއެވެ.
އޭގެ އިތުރުން މުއިއްޒުގެ މައްޗަށް ކުރެވޭ ކޮރަޕްޝަނާއި ޚިޔާނާތާއި ގުޅޭގޮތުން ފުލުހުން ތައްޔާރުކޮށްފައިވާ އިންޓެލިޖެންސް ރިޕޯޓުގައިވެސް, މުއިއްޒުގެ ކޮރަޕްޝަންގެ ފައިސާ ބޭންކަށް އުފުލާދީ މުއިއްޒުއަށް މަނީ ލޯންޑަރ ކޮށްދިނުމުގައި އެންމެ އިސް ދައުރެއް އަދާކޮށްދީފައިވަނީ އިދުރީސް ފައުޒީކަން ހާމަވާން އެބަހުއްޓެވެ.
އެގޮތުން ފުލުހުން ތައްޔާރުކޮށްފައިވާ އިންޓެލިޖެންސް ރިޕޯޓުގައިވާގޮތުން 2017 ވަނަ އަހަރުގެ މާރޗްމަހާއި 2018 ވަނަ އަހަރުގެ ނޮވްމެބަރު މަހާއި ދެމެދު ސްޓޭޓް ބޭންކު އޮފް އިންޑިއާގައި މުއިއްޒު ހުޅުވާފައިވާ އެކައުންޓަށް 17 ހާސް ޑޮލަރު އެކި ފަހަރުމަތިން ޖަމާކޮށްދީފައިވަނީވެސް އިދުރީސް ފައުޒީކަމަށް ބުނެފައި ވެއެވެ. އަދި އޭނާއަކީ މުއިއްޒުގެ އެއްބަނޑު އަންހެން ކޮއްކޮ ފާތިމަތު ސައުދާގެ ފިރިމީހާކަންވެސް މި ރިޕޯޓުގައި ފާހަގަކޮށްފައި ވެއެވެ.
ފާއިތުވި އަހަރު ލީކުކޮށްލި އެމްއެމްއޭގެ FIU (ފައިނޭންޝަލް އިންޓެލިޖެންސް ޔުނިޓް) ރިޕޯޓުންނާއި އަދި ލީކު ކޮށްލި, ފުލުހުން ތައްޔާރުކޮށްފައިވާ އިންޓެލިޖެންސް ރިޕޯޓުންވެސް އެގެން ހުރި ގޮތުގައި, މުއިއްޒު ވަޒީރު ކަމުގައި ހުންނަވައިގެން, ޗައިނާ ސަރުކާރުން އޭރު ރާއްޖޭގައި ޕްރޮޖެކްޓްތައް ހިންގަމުންދިޔަ ކުންފުނިތަކުން ނެގި ރިޝްވަތުގެ ފައިސާ ލޯންޑަރ ކުރުމުގައާއި, އަދި އެނޫންވެސް ގޮތް ނޭނގޭ ގޮތަށް މުއިއްޒުގެ އެކައުންޓަށް ޖަމާއި އެތައް މިލިއަން ރުފިޔާއެއް ބޭންކަށް ޖަމާކުރުމުގައި އެންމެ އިސް ދައުރެއް އަދާކުރީ އިދުރީސް ފައުޒީއެވެ.
އިދުރީސް ފައުޒީ އެންމެ ފުރަތަމަ މަސައްކަތް ކުރީ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންގައެވެ. އެއަށްފަހު މުއިއްޒުއަށް ހައުސިން މިނިސްޓަރުކަން ލިބުމާއެކު އޭނާއަށް ހައުސިން މިނިސްޓްރީގެ މިނިސްޓަރ ބިއުރޯއިން ވަޒީފާ ދީފައި ވެއެވެ. އޭނާ މުއިއްޒުއަށް މަނީ ލޯންޑަރ ކޮށްދީފައިވަނީ އެ މަގާމްގައި ހުރެގެންނެވެ.
އެހެންނަމެވެސް މުއިއްޒުގެ އަމުރަށް މިއަދު އޭނާ އައްޔަން ކޮށްފައިވަނީ, ޝަރުއީ ދާއިރާ ރެގިއުލޭޓްކޮށް ބަލަހައްޓާ ޖޭއެސްސީއަށެވެ. އޭނާ އެމަގާމަށް އައްޔަން ކޮށްފައިވަނީ އެމަގާމަށް ކުފޫހަމަވާ, އޭނާއަށްވުރެ ތައުލީމީ ގޮތުންނާއި ތަޖުރިބާގެ ގޮތުންވާ ގާބިލް މީހުން އެމަގާމަށް ކުރިމަތި ލާފައި ވަނިކޮށެވެ.
ތަޅުމުގައި ނެގި ވޯޓުގައި ރައީސް މުއިއްޒުގެ ފުލް ކޮންޓްރޯލް އޮންނަ މަޖިލީހުން އެމަނިކުފާނުގެ ކޮއްކޯފުޅުގެ ކުރީގެ ފިރިކަލުން ފައުޒީއަށް ރުހުން ދިނުމަށް ވޯޓު ދެއްވީ 64 މެންބަރުންނެވެ. ނުފެންނަ ކަމަށް ވޯޓު ދެއްވީ ހަނިމާދޫ ދާއިރާގެ އެމްޑީޕީ މެންބަރު އަބްދުލްޣަފޫރު މޫސާއެވެ. ވަކި ގޮތަކަށް ވޯޓުދެއްވަން ބޭނުންނުވާ ކަމަށް ވޯޓުދެއްވީ ދެ މެންބަރުންނެވެ. އެއީ ކެންދޫ ދާއިރާގެ އެމްޑީޕީ މެންބަރު މައުރޫފް ޒާކިރާއި، ކެޔޮދޫ ދާއިރާގެ އެމްޑީޕީ މެންބަރު މުހައްމަދު ނިއުޝާދެވެ.
ޖުޑިޝަރީއަށް ނުފުޒު ނުފޯރުވާކަމަށް ޤުރުއާންގަ އަތްލާ ހުވާކުރައްވަން ތައްޔާރަށް ހުންނެވިކަމަށް ވިދާޅުވި މުއިއްޒި, އެމަނިކުފާނަށް މަނީ ލޯންޑަރ ކޮށްދިނުމުގައި އެންމެ އިސްކޮށް އުޅުއްވާ އިދުރީސް ފައުޒީ ޖޭއެސްސީއަށް އައްޔަން ކުރުމުން މުއިއްޒުގެ ވެރިކަމުގައި ރާއްޖޭގެ ޝަރުއީ ދާއިރާ އޮންނާނެ ހާލަތު ވަޒަން ކޮށްލައްވާށެވެ. އަދި ޖުޑިޝަރީއަށް ނުފޫޒު ނުފޯރުވާކަމަށް މާތްاللهގެ ކަލާމްފުޅުގައި އަތްލާ ހުވާކުރަން ތައްޔާރަށް ހުރިކަމަށް ލައިވް މީޑިއާގައި ވިދާޅުވަން ކެރިވަޑައިގެންނެވި މުއިއްޒުއަކީ ތެދުވެރިއެއްތޯ ނުވަތަ ދޮގުވެރިއެއްތޯ ކިޔުންތެރިން ވަޒަން ކޮށްލައްވާށެވެ!