މިހާރު ކުރިއަށްދާ ރިވައިވަލް ސްޕޯޓްސް ބެޑްމިންޓަން ޗެލެންޖުން ރާއްޖޭގެ އެކި ކަންކޮޅުތަކުގެ މޮޅެތި ކުޅުންތެރިންނަށް ފުރުސަތު ފަހިވެގެން ގޮސްފައިވާ ކަމަށާއި ހުނަރުވެރި އެތައް ކުޅުންތެރިންނެއް މިހާތަނަށް ކުޅުނު މެޗުތަކުގައި ވެސް ފެނިފައިވާ ކަމަށް މުބާރާތުގެ އިސް ރެފްރީ، އަހުމަދު ޝިހާމް (ޕުޗު) ބުނެފި އެވެ.
މިދިޔަ ބުދަ ދުވަހުން ފެށިގެން މާދަމާގެ ނިޔަލަށް، މާލޭ ކުޅިވަރު އެކުވެނީ ބެޑްމިންޓަން ހޯލުގައި ކުރިއަށްދާ ރިވައިވަލް ބެޑްމިންޓަން ޗެލެންޖުގައި އެކި އުމުރުފުރާއިން އެއްކޮށް ޖުމްލަ 300 އަށް ވުރެ ގިނަ ކުޅުންތެރިން އަންނަނީ ބައިވެރިވަމުންނެވެ.
ދުނިޔޭގެ އެކި ފަންތީގެ މުބާރާތްތަކުގައި އޮފިޝަލްކުރުމުގެ އިތުރުން، ރާއްޖޭގައި ވެސް ގިނަ އަހަރުތަކެއްގެ ތަޖުރިބާ ރެފްރީކަން ކުރުމުގައި ހާސިލްކޮށްފައިވާ ޝިހާމް، "އަދަދު ސްޕޯޓްސް" އަށް ބުނީ، އެހާ ދުވަސްކޮށްފައި މުބާރާތެއް މި ގޮތަށް ބާއްވާތީވެ، ބައިވެރިވި ކުޅުންތެރިންގެ ނިސްބަތް ގިނަކޮށް ފެންނަ ކަމަށެވެ.
"އެ ގޮތަށް ބަލާއިރު، މިއީ އެއް އަހަރުކޮށްފައި ކުޅުންތެރިންނަށް ލިބުނު ވަރަށް ރަނގަޅު ފުރުސަތެކޭ އަޅުގަނޑު ބުނެލާނީ،" މާލެ ސަރަހައްދުގައި، މިހާ ބޮޑަށް ހުޅުވާލެވިގެން މިދިޔަ އަހަރެއްހާ ދުވަސް ތެރޭ ބާއްވާ ފުރަތަމަ މުބާރާތާ ގުޅޭގޮތުން، ޝިހާމް ދެކޭ ގޮތް ހިއްސާކުރި އެވެ.
ޝިހާމް ބުނީ، އޭނާގެ ނަޒަރުގައި ރާއްޖޭގައި ބެޑްމިންޓަން ދިރުވައި އާލާ ކުރުމުގައި އެންމެ އިސް މަސައްކަތްތަކެއް ކުރާ ރަށްތަށް ރިވައިވަލްގެ މި މުބާރާތުން ފެނިގެން އެބަދެ އެވެ.
"ބެޑްމިންޓަންގައި ރާއްޖޭގައި ނަން ކިޔާ ހުރިހާ ރަށެއްގެ ކަހަލަ ގޮތަކަށް ޖޫނިއާ އޭޖުން ފަށައިގެން ސީނިއާ ކުޅުންތެރިން އެބަފެނޭ، އޯޕަން ކެޓަގަރީގައި ވެސް ޓީމުތަކެއް ބައިވެރިވެފައި މި އޮތީ، ކުޅުންތެރިންތަކެއް ބައިވެރިވެފައި މި އޮތީ،" ޝިހާމް ބުންޏެވެ.
އެ ގޮތުން، ރިވައިވަލްގެ މި މުބާރާތުގައި، ބ. އޭދަފުށި، ޅ. ނައިފަރު، ނ. ހޮޅުދޫ، އައްޑޫ ސިޓީ އަދި ފުވައްމުލަކުގެ އިތުރުުން މާލޭގެ އެކަޑަމީތަކުގެ ކުޅުންތެރިންނާއި ގައުމީ ޖޫނިއާ ޕޫލުގައި ހިމެނޭ ކުޅުންތެރިންނާއި ސީނިއާ ގައުމީ ޓީމުގެ ކުޅުންތެރިން ވެސް ވާދަކުރެ އެވެ.
ޝިހާމް އަށް މުބާރާތުގެ ފުރަތަމަ ދެ ދުވަހު ކުޅުންތެރިންގެ ފަރާތުން ފެނުނު ކަންތައްތަކަށް ބަލައި، އޭނާ ހިއްސާކުރީ ކުރިއެރުމުގެ ވާހަކަ އެވެ.
"މިދިޔަ އަހަރު ބައެއް ރަށްރަށުގައި ހިންގި ބައެއް މުބާރާތްތަކުގައި އަޅުގަނޑު އަމިއްލަ ހައިސިއްޔަތުން އޮފިޝިއޭޓްކުރި މީހެއްގެ ގޮތުގައި ފާހަގަކުރާނީ، ވަރަށް ބޮޑު ކުރިއެރުމެއް ކުދިންގެ ފަރާތުން ފެންނަކަން ހާއްސަކޮށް ފާހަގަކޮށްލަން. އަޅުގަނޑު އަނެެއްހެން ހީވެސް ނުކުރާހާ ސަޕްރައިޒިން މެޗުތަކެއް މުބާރާތުގެ މިހާތަނަށް ވެސް ފެނިއްޖެ. އަދި ކުއާޓާ ފައިނަލާ ހަމައަށް އަދި ކިރިޔާ މި ފޯރީ، ފޯރިއިރުގައި މީގެ ކުރިން އަޅުގަނޑުމެންނަށް ފައިނަލުން ފެންނަހާ ފޯރިގަދަ މެޗުތަކެއް މިހާތަނަށް ވެސް ފެނިއްޖެ،" މެޗުތަކާއި ކުޅުންތެރިންގެ ކުޅުމަށް އިޝާރާތްކޮށް، ޝިހާމް ބުންޏެވެ.
ރާއްޖޭގައި އެންމެ ޕްރޮފެޝަނަލްކޮށް ހިނގާ ކުޅިވަރު ކްލަބްތަކުގެ ތެރެއިން ވެސް ފާހަގަކުރެވޭ ރިވައިވަލް އިން މީގެ ކުރިން، ބ. އޭދަފުށީގައި ޖޫނިއާ މުބާރާތެއް ވެސް ފޯރިގަދަކޮށް ކުރިއަށްގެންދިޔަ އެވެ. މި ފަހަރު މާލޭގައި މުބާރާތެއް ބާއްވާއިރު، މިއީ މި ދަނޑިވަޅަށް ބަލާއިރު ވަރަށް މުހިންމު ފުރުސަތުތަކެއް ފަހިވި ކަމެއްގެ ގޮތުގައި ޝިހާމް ބުނެފައިވެ އެވެ.
"އަޅުގަނޑު ބުނާނީ ބެޑްމިންޓަން ގާތްގަނޑަކަށް މާލޭގައި ހާއްސަކޮށް ވަރަށް ބޮޑަށް އަޑިއަޅާލާފައި ވަނިކޮށް، ކުޑަކުޑަކޮށް ދިރުވާލައިދިނީޔޭ ރިވައިވަލް އިން. އަޅުގަނޑުމެންގެ އޮފިޝަލުން އެކަންޏެއް ނޫން ޕްލޭޔަރުންގެ ވެސް ވަރަށް ބޮޑަށް ބޭނުންވެފައި ހުރި ވަގުތެއްގައި ބޭނުންވެފައި އޮތް ފުރުސަތެއް ރިވައިވަލް އިން މި ހުޅުވާލައިދިނީ މި ހަމަ އަޅުގަނޑުމެން ބުނަންޖެހޭނީ ގެއްލެމުންދަނިކޮށް، ރިވައިވަލް އިން ހުރިހާ ކުޅުންތެރިންނަށް ދިން ވަރަށް ރަނގަޅު ފުރުސަތެކޭ ބުނާނީ،" ޝިހާމް ބުންޏެވެ.
ރިވައިވަލް ސްޕޯޓްސް ބެޑްމިންޓަން ޗެލެންޖުގައި މިއަދު ކުރިއަށްދާނީ ކުއާޓާ ފައިނަލް މެޗުތަކުން ފެށިގެންނެވެ. މެޗުތައް ފަށާނީ 14:00 ގަ އެވެ.