ބެއިޖިން، ޗައިނާ (އެޕްރީލް 3) - އެމެރިކާއިން އިމްޕޯޓު ކުރާ ޗައިނާގެ މުދަލުން 34 ޕަސެންޓުގެ "ރެސިޕްރޮކަލް ޓެރިފް"އެއް ނަގަން ނިންމާފައިވާތީ އެ ނިންމުން އަނބުރައި ނުގެންގޮސްފިނަމަ ބަދަލުހިފުމުގެ ގޮތުން ފިޔަވަޅުތަކެއް އަޅާނެ ކަމުގެ އިންޒާރު ޗައިނާގެ ސަރުކާރުން ދީފި އެވެ.
ޓްރަމްޕްގެ ރިޔާސީ ވައުދު ފުއްދެވުމުގެ ގޮތުން އިއްޔެ ވައިޓް ހައުސްގައި ހާއްސަ ރަސްމިއްޔާތެއް ބާއްވައި އެމަނިކުފާނު ވަނީ ރިޔާސީ އޯޑަރެއްގައި ސޮއިކުރައްވާފަ އެވެ. އާ ޓެރިފް ރޭޓުތައް އިއްޔެ އެމެރިކާގެ ސަރުކާރުން ވަނީ އާންމުކޮށްފަ އެވެ.
ދުނިޔޭގެ ބާޒާރުގައި އެމެރިކާގެ އެންމެ ބޮޑު ވާދަވެރިޔާގެ ގޮތުގައި އޮތް ޗައިނާއިން ނަގަނީ އެހެން ގައުމުތަކާ އަޅައިބަލާއިރު ބޮޑު ރޭޓެއްގެ ޓެރިފެކެވެ. އެގޮތުން، ޓްރަމްޕް ވެރިކަމަށް ވަޑައިގަތުމަށް ފަހު 20 ޕަސެންޓުގެ ޓެރިފެއް ނަގަމުންދާއިރު އިއްޔެ އިއުލާނުކުރި 34 ޕަސެންޓުގެ ޓެރިފްއާއެކު ޗައިނާއިން އެމެރިކާއަށް މުދާ އިމްޕޯޓް ކުރާނަމަ 54 ޕަސެންޓުގެ ޓެރިފެއް ނަގާނެ އެވެ.
ޗައިނާގެ ކޮމާސް މިނިސްޓްރީން ނެރުނު ބަޔާނެއްގައި ބުނެފައިވަނީ އެމެރިކާގެ މި ފިޔަވަޅަކީ މަލްޓިލޭޓަރަލް ވިޔަފާރީގެ މަޝްވަރާތަކުގައި ފާއިތުވި އަހަރުތަކުގައި ވާސިލުވެފައިވާ މަސްލަހަތުތަކުގެ ބެލެންސް ގެއްލުވައިލާ ފިޔަވަޅެއް ކަމަށެވެ. އަދި އެމެރިކާއަކީ ބައިނަލްއަގުވާމީ ވިޔަފާރީގެ ސަބަބުން ޒަމާނުއްސުރެ ބޮޑު މަންފާތަކެއް ލިބިގެންދިޔަ ގައުމެއް ކަމަށް ވެސް ޗައިނާއިން ބުނެފައިވެ އެވެ.
އެމެރިކާއަކީ ދުނިޔޭގެ އެންމެ ބޮޑު އިގުތިސޯދު އޮތް ގައުމެވެ. އެ ގައުމުގެ ފަހަތުން ދެވަނައިގައި އޮތީ ޗައިނާ އެވެ. ޗައިނާގެ ޕްރޮޑިއުސަރުން އަހަރެއްގެ މައްޗަށް 400 ބިލިއަން ޑޮލަރަށް ވުރެ އަގުހުރި މުދާ އެމެރިކާއަށް ވިއްކަ އެވެ.
ޖޫން މަހުގެ ތެރޭގައި ރައީސް ޓްރަމްޕާއި ޗައިނާގެ ރައީސް ޝީ ޖިންޕިން ބައްދަލުކުރައްވާއިރު މި ރޭޓުތަކާ ގުޅޭގޮތުން މަޝްވަރާ ކުރަން ވަނީ ހަމަޖެހިފަ އެވެ.
ޓްރަމްޕްގެ ދެވަނަ ދައުރުގައި އެމެރިކާގެ އިމްޕޯޓް ޓެކްސްގެ ރޭޓް 22 ޕަސެންޓަށް ވަނީ އުފުލިފަ އެވެ. މިދިޔަ އަހަރު އެ އަދަދު ހުރީ 2.5 ޕަސެންޓުގަ އެވެ.