މާލޭގައި އުޅޭ މީދާ ގިނަވެ، މާލޭގެ އެކި ތަންތަނުގައި މީދާ ބޭސް ބަހައްޓަން މާލޭ ސިޓީ ކައުންސިލުން މިދިޔަ މަހު ކުރިއަށްގެންދިޔަ ޕްރޮގްރާމަށް 31،000 ރުފިޔާ ޚަރަދުވިއިރު، 80 މީދާ މަރުވެފައިވާ ކަމަށް ސިޓީ ކައުންސިލުން މިއަދު ބުނެފިއެވެ. މާލޭގައި މީދާ ގިނަވެ، މީދާ މެރުމުގެ ހަރަކާތެއް ސިޓީ ކައުންސިލުން ފެށީ މިދިޔަ މަހު 16 ގައެވެ. މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން 'ސަން'އިން އެދުނު މައުލޫމާތުތައް ފޯރުކޮށްދެމުން ސިޓީ ކައުންސިލުން މިއަދު ބުނީ، އެ ޕްރޮގްރާމްގެ ދަށުން 49 ތަނެއްގައި މީދާ ބޭސް ބަހައްޓާފައިވާ ކަމަށެވެ. މި މަހުގެ ހަތަރުވަނަ ދުވަހުގެ ނިޔަލަށް އެ ޕްރޮގްރާމްގެ ދަށުން ބެހެއްޓި މީދާ ބޭސްތަކުގެ ސަބަބުން 80 މީދާ މަރުވެފައިވާ ކަމަށް ވެސް އެ ހިސާބުތަކުގައިވެއެވެ. އެ މުއްދަތުގައި އެ ޕްރޮގްރާމަށް ޚަރަދުކުރީ ޖުމުލަ 31،978.40 ރުފިޔާއެވެ. އެއީ، މީދާ ބޭސް ގަންނަން ޚަރަދުކުރި 30،596 ރުފިޔާއެއްގެ އިތުރުން އެ ޕްރޮގްރާމް ފެށުމުގެ ރަސްމިއްޔާތަށް ބޭނުންވާ ބެނާ ޕްރިންޓްކުރަން ޚަރަދުކުރި 1،382.40 ރުފިޔާއެވެ. https://sun.mv/215400 ސިޓީ ކައުންސިލުން ބުނީ، މާލޭގައި މީދާ ގިނަ ވުމުގެ ސަބަބުން އާންމު ރައްޔިތުންނަށް އޭގެ އުނދަގޫ އިންތިހާއަށް ކުރިމަތިވަމުން އަންނަކަމުގެ ގިނަ ޝަކުވާތަކެއް ލިބެމުން އަންނަ ކަމަށެވެ. އެ ހަރަކާތް ފައްޓަވައިދެއްވަމުން ޑިސެންބަރު 16ގައި މާލޭގެ މޭޔަރު އާދަމް ޢާޒިމް ވިދާޅުވީ، މި ހަރަކާތް މާރުކޭޓު ސަރަހައްދުގައި ފެށުނު ކަމުގައި ވިޔަސް، ކުރިއަށް އޮތް ދުވަސްތަކުގައި މާލޭގެ އެކި ސަރަހައްދުތަކުގައި މި ހަރަކާތް ކުރިއަށް ދާނެ ކަމަށެވެ. އެ ގޮތުން، ހަރަކާތުގައި އުޅޭނީ ކައުންސިލްގެ މުވައްޒަފުން ކަމަށާއި މީދާ މަރަން އެކި ތަންތަނަށް ބޭސް އަޅާނެ ކަމަށް މޭޔަރު ވިދާޅުވިއެވެ. މި ހަރަކާތުގެ ސަބަބުން މާލޭގެ ސާފުތާހިރުކަން އިތުރުވެ، މީދަލާ ހެދި އާންމުންނަށް ކުރިމަތިވާ އުނދަގޫތައް ކުޑަވާނެ ކަމަށް ބެލެވޭކަން ވެސް މޭޔަރު ފާހަގަކުރެއްވިއެވެ. https://x.com/MaleCitymv/status/2000878537524514994 އޭގެ އިތުރަށް، މި ހަރަކާތުގެ ތެރެއިން މީދާ މަރުވުމުން، އެ މީދާތައް ނެގުމުގެ މަސައްކަތް ކުރަން ހަމަޖެހިފައިވަނީ ވެސް ސިޓީ ކައުންސިލުންނެވެ. އެ ކައުންސިލުން ބުނި ގޮތުގައި، މި ހަރަކާތަކީ މާލެ ސިޓީ ކައުންސިލްގެ ހެލްތް ޕޮލިސީގެ ދަށުން ކުރިއަށް ގެންދާ ހަރަކާތެކެވެ. މި ހަރަކާތުގައި މޭޔަރު ޢާޒިމްގެ އިތުރުން ބައެއް ކައުންސިލަރުންނާއި ކައުންސިލްގެ އިސްވެރިން ބައިވެރިވެވަޑައިގެންނެވިއެވެ.