މިއަދު ކުރިއަށްދާ 20 ވަނަ ރައްޔިތުންގެ މަޖިލީހުގެ އިންތިހާބުގައި އެކަށީގެންވާ އަދަދަކަށް ސަރުކާރަށް ގޮނޑި ލިބޭނެކަމަށް ބެލެވޭކަމަށް ކުރީގެ ރައީސް އަދި ޕީޕަލްސް ނެޝަނަލް ފްރަންޓް (ޕީއެންއެފް)ގެ ރައީސް އަބުއްލާ ޔާމީން ވިދާޅުވިއެވެ.
ވޯޓުލުމަށް ވަޑައިގެން އެ ސަރަހައްދުގައި ނޫސްވެރިންނާ ބައްދަލުކުރައްވާ ވާހަކަދައްކަވަމުން ޔާމީން ވިދާޅުވީ ސަރުކާރުގައި ތިބޭ ބަޔަކަށް އިންތިހާބުތަކުގައި ފައިދާތައް ހުންނާނެ ކަމަށާއި އޭގެ ތެރޭގައި ވަޒީފާ އުފެއްދުމާއި މަޝްރޫއުތައް ކުރިއަށްގެންދިއުމާއި ކަންކަން ހިމެނޭ ކަމަށެވެ. އަދި މި އިންތިހާބުގައި ސަރުކާރަށް މެޖޯރިޓީ ލިބޭނެތޯ ނޫސްވެރިއަކު ސުވާލުކުރުމުން ޔާމީން ވިދާޅުވީ ގިނަ ގޮނޑިތަކެއް ސަރުކާރަށް ލިބޭނެކަމަށް އިންތިޒާރުކުރެވޭ ކަމަށެވެ.
ޔާމީން ވިދާޅުވީ ސަރުކާރަށް މެޖޯރިޓީ ނުލިބުނަސް އެއީ މައްސަލައެއް ނޫންކަމަށާއި، ކޮންމެ ބަޔަކަށް މެޖޯރިޓީ ލިބުނަސް ސަރުކާރަށް އުނދަގޫކޮށް ޖެއްސުންކުރުމަކީ ބަލައިގަނެވޭނެ ކަމެއް ނޫން ކަމަށެވެ. އަދި އެމަނިކުފާނުގެ ޕާޓީއަށް ކިހާ ތަރުހީބެއް ލިބޭނެތޯ އަންދާޒާކުރެވޭތޯ ކުރި ސުވާލަށް ދެއްވި ޖަވާބުގައި އެމަނިކުފާނު ވިދާޅުވީ އެފަދަ ހިސާބެއް ނުޖައްސަވާ ކަމަށެވެ.
ރައީސް ޔާމީން އިތުރަށް ވިދާޅުވީ މި އިންތިހާބު ބޭއްވެނީ ރޯދަ މަހަށް ފަހު ކުޑަ ދުވަސްކޮޅެއްގެ ތެރޭގައި ކަމުން މި ތާރީހާމެދު އެހާ ހިތްހަމަޖެހިވަޑައި ނުގަންނަވާ ކަމަށެވެ. އެގޮތުން މީގެ ދެތިން ހަފްތާ ފަހުން އިންތިހާބު ބޭއްވިނަމަ ވަރަށް ހިތްހަމަ ޖެހުނީސް ކަމަށް ޔާމީން ވިދާޅުވިއެވެ.
ރައީސް ޔާމީން މިފަދައިން ވިދާޅުވެފައިވާއިރު، ވ.އާރަށް ކުއްޔަށް ދިނުމާ ގުޅޭގޮތުން އެމަނިކުފާނުގެ މައްޗަށް ކޮށްފައިވާ މަނީ ލޯންޑަރިންއާއި ކޮރަޕްޝަންގެ މައްސަލައާ ގުޅިގެން ގޭ ބަންދުގައި ހުންނަވަން ޖެހިވަޑައިގަތުމުން ސިޔާސީ އެއްވެސް ހަރަކާތެއްގައި ބައިވެރިވެވަޑައިގެންނެވޭ ގޮތެއް ނުވިއެވެ. މިދިޔަ ބުރާސްފަތި ދުވަހު އެ މައްސަލައިގެ ހުކުމް އެމަނިކުފާނަށް ކޮށް މިނިވަންވުމާއެކު މަޖިލިސް އިންތިހާބާއި ގުޅިގެން ސިޔާސީ ހަރަކާތްތަކުގައި އެމަނިކުފާނަށް ހަރަކާތްތެރިވެވުނީ އެންމެ ދެ ދުވަހުއެވެ.