އިޓަލީގެ އިންޓަމިލާނުން، ފްރާންސްގެ ޕީއެސްޖީ އަށް ކުޅޭ އިޓަލީގެ ގައުމީ ކީޕަރު ޖިއާން ލުއިޖީ ޑޯނަރޫމާ ގަތުމަށް މަސައްކަތް ފަށައިފި އެވެ.
އިންޓަމިލާނުގެ މިހާރުގެ އެއްވަނަ ކީޕަރަކީ ސްވިޒަލޭންޑްގެ ކީޕަރު ޔާން ސޯމާ އެވެ. އޭނާއާއެކު އިންޓައިން ހަދާފައިވާ ކޮންޓްރެކްޓް މި ސީޒަނުގެ ނިޔަލަށް ހަމަވާނެ އެވެ. އޭނާގެ އުމުރުން މިހާރު 36 އަހަރު ވެފައިވާތީވެ އިންޓައިން މިހާރު ބޭނުންވަނީ ޒުވާން ކީޕަރަކު ގެނައުމަށެވެ.
މި ގޮތުން ޑޯނަރޫމާ ގެންނަން ވިސްނަން ފެށީ އޭނާ އަކީ ޒުވާން އަދި އިޓަލީގެ ކީޕަރަކަށްވާތީ އެވެ. އުމުރުން 26 އަހަރުގެ ޑޮނަރޫމާ އަކީ އިންޓަމިލާނާ ވާދަވެރި އޭސީ މިލާނުގެ އެކަޑަމީން ތަމްރީނުވެގެން އެންމެ ފުރަތަމަ އެކުލަބަށް ކުޅުނު ކުޅުންތެރިއެކެވެ. މިހެންވެ އޭނާ އިންޓަމިލާނަށް ކުޅެން އަތުވެދާނެތޯ ބައެއް ތަޖުރިބާކާރުން ވަނީ ސުވާލު އުފައްދައިފަ އެވެ.
މިކަމާ ހިޔާކުތަފާތުވާ މީހުން ބުނަނީ 2021 ވަނަ އަހަރު ޕީއެސްޖީ އަށް ކުޅެން ޑޮނަރޫމާ ބަދަލުވީ މިލާނާއެކު އޮތް ގުޅުން ވަރަށް ބޮޑަށް ހީނަރުވެގެން ކަމަށެވެ. މިހެންވެ މިލާނާ އެންމެ ވާދަވެރި ޓީމަކީ އިންޓަ ކަމަށްވީ ނަމަވެސް ޑޮނަރުމާ އިންޓަމިލާނުން ފެނުމުގެ ފުރުސަތު އެބައޮތް ކަމަށެވެ.
ޕީއެސްޖީއާއެކު ޑޮނަރޫމާ ހަދާފައިވާ ކޮންޓްރެކްޓް 2026ގައި ހަމަވާނެ އެވެ. މި ކޮންޓްރެކްޓް އާކުރަން ޕީއެސްޖީން މިހާތަނަށް ކުރި މަސައްކަތް އެހާ ކާމިޔާބެއްނޫނެވެ. މިއީ ވެސް އޭނާ އިންޓަމިލާނަށް ސޮއިކޮށްފާނެ ކަމަށް ބެލެވޭ ސަބަބެކެވެ.