ރާއްޖެއިން ބައިނަލްއަގްވާމީ މައިދާނުގައި ގެންގުޅޭ ސިޔާސަތުތަކަށް ބަދަލެއް އައިސްފައި ނުވާ ކަމަށް ފޮރިން މިނިސްޓަރު ޑރ.އަބްދުﷲ ޚަލީލް ވިދާޅުވެއްޖެއެވެ.
މިނިސްޓަރު މިހެން ވިދާޅުވީ ޔޫކްރެއިން-ރަޝިއާ ހަނގުރާމައާ ގުޅިގެން ރާއްޖޭގެ ސްޓޭންޑް ބަދަލުވެ، ޔޫކްރެއިންއަށް ތާއިދުކޮށްފައިވާ ކަމަށް ބުނެ ދެކެވެމުންދާ ބައެއް ވާހަކަތަކާއި ގުޅިގެން ކުރެއްވި ޕޯސްޓެއްގައެވެ.
ރައީސް ޑރ.މުހައްމަދު މުއިއްޒު އެސްޓޯނިއާއަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން އެމަނިކުފާނު ވަނީ އެ ގައުމުގެ ގާނޫނު ހަދާ މަޖިލީހުގެ ރައީސް ލޯރީ ހުއްސާރްްއާ ބައްދަލުކުރައްވައިފައެވެ.
އެ ބައްދަލުކުރެއްވުމާ ގުޅޭ ގޮތުން އެސްޓޯނިއާގެ ގާނޫނު ހަދާ މަޖިލީހުގެ އޮފިޝަލް އެކްސް ހޭންޑްްލްއިން ކުރި ޕޯސްޓުގައި ބުނެފައިވަނީ މި ބައްދަލުކުރެއްވުމުގައި ސަލާމަތީ ގުޅުންތަކާ ގުޅޭ މަޝްވަރާތައް ކުރެއްވި ކަމަށާއި ޔޫކްރެއިންއަށް ތާއީދުކޮށް ބައިނަލްއަގުވާމީ ގާނޫނުތައް ދިފާއުކުރުމާ ގުޅޭ މަޝްވަރާތައް ވެސް ކުރިއަށްގެންދެވި ކަމަށެވެ.
ރަޝިއާ-ޔޫކްރެއިން ހަނގުރާމާގައި ރާއްޖެއިން ވަކި ގައުމަކަށް ތާއިދުކޮށްފައެއް ނުވެއެވެ. ނަމަވެސް އެސްޓޯނިއާގެ ގާނޫނު ހަދާ މަޖިލީހުން ކުރި ޕޯސްޓުގައި އެހެން ބުނެފައިވާ ސަބަބެއް ސާފެއް ނުވެއެވެ.
ފޮރިން މިނިސްޓަރު ހަލީލް ކުރެއްވި ޕޯސްޓުގައި ވިދާޅުވީ ބައިނަލްއަގްވާމީ މައިދާނުގައި ރާއްޖެއިން ގެންގުޅޭ ސިޔާސަތުތައް ބަދަލު ނުވާ ކަމަށާއި، އދ.ގައި ރާއްޖެއިން ވޯޓު ދެމުންދާ ގޮތް ބައްލަވާލެއްވުމުން އެކަން ސާފުވާނެ ކަމަށެވެ.
އަދި ކުދި ގައުމުތަކުގެ މިނިވަންކަމާއި ސިޔާދަތާއި އިސްތިގްލާލަށް ބުރޫއަރާ ފަދަ ހާލަތްތަކުގައި ރާއްޖެއިން އަބަދުވެސް ނަގަނީ ޕްރިންސިޕަލް ސްޓޭންޑެއް ކަން މިނިސްޓަރު ވަނީ ފާހަގަ ކުރައްވާފައެވެ.
މީގެއިތުރުން، ރާއްޖޭގެ ޚާރިޖީ ސިޔާސަތު ބިނާވެގެންވަނީ އެއްވެސް ގައުމަކާއި ހަތުރުވެރިނުވެ ދިވެހި ރައްޔިތުންނަށް ލާބައާއި މަންފާ ލިބޭ ގޮތަށް އަދި ރާއްޖޭގެ މިނިވަންކަމާއި ސިޔާދަތަށް ބުރޫ ނާރާގޮތަށް ހުރިހާ ގައުމަކާއި އެކީވެސް ގާތް ގުޅުން ބޭއްވުމުގެ މައްޗަށް ކަމަށް ވެސް މިނިސްޓަރު ވަނީ ވިދާޅުވެފައެވެ.
އެސްޓޯނިއާގެ ގާނޫނު ހަދާ މަޖިލީހުގެ ރައީސް އާއި ރައީސް މުއިއްޒުގެ ބައްދަލުވުމަށް ފަހު ރައީސް އޮފީހުންވެސް އެކަމާ ގުޅޭގޮތުން ޕޯސްޓުކޮށްފައިވާއިރު، ރައީސް އޮފީހުން ޝާއިއުކުރި ހަބަރުގައި ރަޝިއާ-ޔޫކްރެއިން ހަނގުރާމަ އާއި ރާއްޖެއިން އެކަމުގައި ގެންގުޅޭ ސްޓޭންޑާ ގުޅޭ އެއްވެސް މަޝްވަރާތަކެއް ކުރެއްވި ކަމަށް ބުނެފައެއް ނެތެވެ.
ރަޝިއާ އަކީ ރާއްޖޭގެ ޓޫރިޒަމްގައި ވެސް މުހިންމު މާކެޓެކެވެ.