ފަލަސްޠީނުގެ ޣައްޒާއާއި ލުބްނާންގެ މުސްލިމުންގެ ނަސްލުހޭދު ކުރަން ލާއިންސާނީ ޖަރީމާތައް ހިންގަމުންދާ ޒަޔަނިސްޓު އިސްރާއީލުގެ ވެރިންނަށް މަރުގެ އަދަބު ދިނުމަށް އީރާނުގެ ރޫހީ ވެރިޔާ އާޔަތުالله ޢަލީ އަލް-ޚާމަންޢީ ގޮވައިލައްވައިފިއެވެ. އޭނާ މި މޭރުމުން ގޮވައިލައްވާފައި މި ވަނީ، އިސްރާއީލުގެ ހައްދުފަހަނަ އެޅި ބޮޑުވަޒީރު ބެންޖަމިން ނަތަންޔާހޫއާއި ކުރީގެ ދިފާޢީ ވަޒީރު ޔޮއާވް ގަލާންޓް ހައްޔަރުކުރުމަށް ބައިނަލްއަޤުވާމީ ޖިނާޢީ ކޯޓު (އައިސީސީ)ން ނެރެފައިވާ އަމުރަށް އިޝާރާތް ކުރައްވައެވެ.
އެ ކަމާ ގުޅޭ ގޮތުން ޚާމަންޢީ ވިދާޅުވީ، ހައްޔަރު ކުރުމުގެ އަމުރު ނެރުމުގެ ބަދަލުގައި ޒަޔަނިސްޓު އިސްރާއީލުގެ ވެރިންގެ މައްޗަށް އިއްވަންވީ މަރުގެ ޙުކުމް ކަމުގައެވެ. "އެ ފަރާތުން [އައިސީސީން] ނެރެފައި ވަނީ ހައްޔަރު ކުރުމުގެ އަމުރު، އެއަކުން ނުފުދޭނެ… އެ ކުށްވެރިންނާ ދެކޮޅަށް މަރުގެ ޙުކުމް އިއްވަންޖެހޭ،" އޭނާ ވިދާޅުވިއެވެ.
ނިރުބަވެރި ނަތަންޔާހޫއާއި ހައްދުފަހަނަ އެޅި ގަލާންތާ ދެކޮޅަށް އައިސީސީން ނެރެފައިވާ އަމުރުގައި ބުނެފައި ވަނީ، ޣައްޒާގެ މުސްލިމުން ޝަހީދު ކުރުމާއި، ހައިހޫނުކަމަކީ ހަނގުރާމައިގެ ހަތިޔާރެއްގެ ގޮތުގައި ބޭނުން ކުރުމާއި، ދުރާލައި ރާވައިގެން ގަސްދުގައި ޣައްޒާގެ މުސްލިމުންގެ ނަސްލުހޭދު ކުރުމަށް ޔަހޫދީ ފައުޖުން ހިންގަމުންދާ ލާއިންސާނީ ޖަރީމާތަކުގެ ޖިނާޢީ ޒިންމާ އެ ދެ މީހުން އުފުލަން ޖެހޭނެ ކަމަށް ޤަބޫލު ކުރެވޭ ކަމުގައެވެ.
އައިސީސީގެ އަމުރަށް އިސްރާއީލުން ވަނީ ވަރަށް ބޮޑަށް ފާޑުކިޔާފައެވެ. ނަމަވެސް، އައިސީސީގެ އަމުރާ އެކު، ޔަހޫދީންގެ ލާއިންސާނީ ޖަރީމާތަކުގެ ޝިކާރައަކަށްވެ، ނިކަމެތިފައިވާ ޣައްޒާގެ ރައްޔިތުންނަށް ކޮންމެ ވެސް ވަރެއްގެ އުންމީދެއް ލިބިގެން ގޮސްފައިވާ ކަމުގައި މަސްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ. އަދި، އެ މީހުންނާ ދެކޮޅަށް ލާއިންސާނީ ޤަތުލުޢާންމު ހިންގުމުގެ އަޑީގައި ތިބި ޒަޔަނިސްޓުން އިންސާފުގެ ކުރިމައްޗަށް ހާޒިރު ކުރެވޭނެ ކަމުގެ އުންމީދު އައުވި ކަމުގައި ވެސް މަސްރަޙު ދިރާސާ ކުރާ ފަރާތްތަކުން ދެކެެއެވެ.
ޣައްޒާގައި ވެރިކަން ކުރާ ޙަމާސް ޖަމާޢަތުގެ އިސް އޮފިޝަލެއް ކަމުގައިވާ އިބްރާހީމް އަލް-މަޞްރީ ހައްޔަރު ކުރުމަށް ވެސް އައިސީސީން އަމުރު ކޮށްފައިވެއެވެ. އޭނާ ހައްޔަރު ކުރުމަށް އަމުރު ނެރެފައި ވަނީ، 2023 އޮކްޓޫބަރު 7ވަނަ ދުވަހު ޙަމާސްގެ މުޖާހިދުން އިސްރާއީލުގެ ރަށްތަކަށް ދިން ޖިހާދީ ޙަމަލާތަކާ ގުޅިގެންނެވެ. އަދި، ޔަހޫދީންގެ ބައިގަނޑެއް ރަހީނު ކޮށްގެން ގެންދިޔުމާ ގުޅުވައެވެ. ޔަހޫދީ ފައުޖުން ބުނީ، ޖުލައި މަހު ޣައްޒާއަށް ދީފައިވާ ނިރުބަވެރި ޙަމަލާތަކެއްގައި މަޞްރީ، ނުވަތަ މުޙައްމަދު ޟަޔިފް، ޝަހީދު ކޮށްލާފައިވާނެ ކަމުގައެވެ. ނަމަވެސް، ޙަމާސް ޖަމާޢަތުން އެ ކަން ކަށަވަރު ކޮށްދީފައެއް ނެތެވެ.
ޣައްޒާގެ މުސްލިމުންނާ ދެކޮޅަށް 2023 އޮކްޓޫބަރު 7ން ފެށިގެން ހިންގަމުންދާ ލާއިންސާނީ ޢުދުވާނުގައި ޝަހީދުކޮށްލާފައިވާ މީހުންގެ ޢަދަދު ވަނީ 44,235އަށް އުފުލިފައެެވެ. އޭގެ ތެރޭގައި 17,000އެއްހާ ކުޑަކުދިން ހިމެނޭއިރު, އިތުރު 10,000އެއްހާ މީހުންގެ ހަށިތައް ސުންނާފަތި ކޮށްލާފައިވާ އިމާރާތްތަކުގެ ދަށުގައި ތާށިވެފައިވާ ކަމަށް ޣައްޒާގެ އޮފިޝަލުން ޤަބޫލު ކުރެއެވެ. ޣައްޒާ ޢުދުވާނުގައި ޔަހޫދީ ފައުޖުން ވަނީ 104,638 މީހުން ޒަޚަމު ކޮށްލާފައެވެ.