ދީނީ ކަންކަމާ މެދު ރައްޔިތުން ހޭލުންތެރިކޮށް އިސްލާމީ ހުދޫދުގެ ތެރެއިން މުނިފޫހިފިލުވުމުގެ ކަންކަން ހުޅުވާލުމުގެ ގޮތުން އިސްލާމިކް މިނިސްޓްރީން ބާއްވާ "އިސްލާމިކް ފެއާ" މިއަދު ހަވީރު ފަށާނެ ކަމަށް އިސްލާމިކް މިނިސްޓްރީން ބުނެފި އެވެ.
މިމަހުގެ 31 އާ ހަމަޔަށް ކުރިއަށްގެންދިޔުމަށް ނިންމާފައިވާ މި ފެއާ ކުރިއަށްދަނީ އިސްލާމީ މަރުކަޒުގެ ހޯލާއި އިސްލާމީ މަރުކަޒު މައިދާން ހިމެނޭ ސަރަހައްދުގަ އެވެ. ފެއާގެ ޝިއާރަކަށް ކަނޑައަޅާފައިވަނީ "އުހުއްވަތްތެރިކަން – މުޖުތަމައުގެ ބަދަހިން" އެވެ. ފެއާގެ މެއިން ސްޕޮންސަރަކީ މޯލްޑިވްސް ހައްޖު ކޯޕަރޭޝަންއެވެ. ކޯ ސްޕޮންސަރ އަކީ އުރީދޫ މޯލްޑިވްސް އެވެ.
އިސްލާމިކް މިނިސްޓްރީން ބުނީ، މިއަދު ފަށާ ފެއާގައި ސަރުކާރު ކުންފުނިތަކާއި ޔުނިވަސިޓީތަކާއި އަމިއްލަ ޖަމިއްޔާތަކާއި ބުކްޝޮޕްތަކުން ބައިވެރިވާނެ ކަމަށެވެ. އަދި މެސެޖް އޮފް އިސްލާމުންވެސް މި ފެއަރގައި ބައިވެރިވާނެ ކަމަށެވެ.
އިސލާމިކް މިނިސްޓްރީން ބަލަހައްޓާ ދީނީ ފަންޑާއި، ވަގުފް ފަންޑުގެ ފަންޑު ފޮށިތަށް މި ފެއާގައި ބެހެއްޓިފައި ހުންނާނެއެވެ. އަދި ފަންޑް ތަކާބެހޭ މައުލޫމާތު ފެއާގެ ތެރެއިން ލިބެން ހުންނާނެއެވެ. ފެއާގައި އިސްލާމީ ތާރީހް ދައްކުވައިދޭ އާރޓް ގެލެރީއެއް ވަނީ ހިމަނާފަ އެވެ. އަދި ފެއަރ ހިނގަމުންދާއިރު ކުޑަކުދިންނަށް ހާއްސަކޮށްގެން ސްޓޭޖް ހަރަކާތްތަކެއް ކުރިއަށްގެންދިއުމާއި، އެ ކުދިން ޝައުގުވެރިވާ ކަހަލަ ގޭމް ހަރަކާތްތައް ކުރިއަށްގެންދަން ވަނީ ނިންމާފަ އެވެ. ފެއާ ކުރިއަށްދާނީ ތިންދުވަހުގެވެސް ހަވީރު ހަތަރަކުން ހަޔަކަށް އަދި ރޭގަނޑު އަށަކުން ދިހަޔަކަށެވެ.