މެޑްރިޑް (ޖެނުއަރީ 27) - ސްޕެނިޝް ލީގުގައި ރޭ ވެލެންސިއާ އަތުން 7-1 ގެ ބޮޑު ތަފާތުން ވެލެންސިއާ ބަލިކޮށް ބާސެލޯނާ އިން ލީގުގެ ރޭހުގައި ކުރިއަށް ދިއުމަށް އެ ޓީމުގެ ފެންވަރު ދައްކާލައިފި އެވެ.
މި މޮޅާ އެކު، ބާސެލޯނާ އިން ވަނީ ލީގުގެ އެއް ވަނައިގައި އޮތް ރެއާލް މެޑްރިޑާ ދެމެދު އޮތް ފަރަގު ހަތް ޕޮއިންޓަށް ކުޑަކޮށްފަ އެވެ. ރެއާލް އެއް ވަނައިގައި އޮތީ 21 މެޗުން 49 ޕޮއިންޓާ އެކު އެވެ. ދެ ވަނައިގައި އޮތް އެތުލެޓިކޯ މެޑްރިޑަށް ވަނީ 21 މެޗުން 45 ޕޮއިންޓް ލިބިފަ އެވެ. އަދި ތިން ވަނައިގައި ބާސެލޯނާ އޮތީ 21 މެޗުން 42 ޕޮއިންޓް ހޯދައިގެންނެވެ.
ރޭގެ މެޗުގެ 24 މިނިޓް ތެރޭ ބާސެލޯނާ އިން ހަތަރު ގޯލު ޖެހި އެވެ. ފްރެންކީ ޑި ޔޯންގެ ގޯލުން، ތިން ވަަނަ މިނިޓްގައި އެ ޓީމު ލީޑުނެގިއިރު، އަނެއް ލަނޑުތައް ޖެހީ ފެރާން ޓޮރޭޒް، ރަފީނިއާ އަދި ފާމިން ލޮޕޭޒް އެވެ. ފުރަތަމަ ހާފުގެ އިތުރުު ވަގުތުގެ ތެރޭގައި ލޮޕޭޒް ވަނީ ބާސެލޯނާގެ ފަސް ވަނަ ލަނޑު ޖަހައިފަ އެވެ.
ރޮބަޓް ލެވަންޑޯސްކީ، ދެ ވަނަ ހާފުގައި ބާސެލޯނާގެ ހަ ވަނަ ގޯލު ޖެހިއިރު، އެ ޓީމުން ކާމިޔާބުކުރި ފަހު ގޯލަކީ ވެލެންސިއާގެ ސެޒާ ޓަރޭގާ އަތުން ބައިކޮޅަށް ވަން ގޯލެކެވެ. މި މެޗުގައި ވެލެންސިއާގެ ހަމައެކަނި ގޯލު ޖެހީ، ހޫގޯ ޑޫރޯ އެވެ.
މިއީ، ލީގުގައި ބާސެލޯނާ އިން އެންމެ ފަހުން ކުޅުނު ހަތަރު މެޗުގެ ތެރެއިން ހޯދި ފުރަތަަމަ މޮޅެވެ. އަނެއްކޮޅުން، މިއީ ހަންސީ ފްލިކް ހަވާލުވި ފަހުން ލީގުގައި ބާސެލޯނާ އިން އެންމެ ގިނަ ގޯލު ޖެހި މެޗު ވެސް މެ އެވެ.