ބީބީގެ ވީޑިއޯއަކަށް އިންސްޓަރގްރާމުން 10 މިލިއަނަށްވުރެ ގިނަ ވިއުސް ލިބުނު ނަމަވެސް އެކަމުން މާބޮޑު މޮޅުތަކެއް ނެތްކަމަށް ފިލްމުގެ ޕްރޮޑިއުސަރު އަދި ޑާކްރެއިން އެންޓަޓެއިންމެންޓްގެ ވެރިޔާ މުހައްމަދު އަލީ (މޮގާ) ވިދާޅުވެއްޖެއެވެ.
ބިބީގެ ވީޑިއޯއަކަށް އިންސްޓަރގްރާމުގައި ވަނީ 10.5 މިލިއަން ވިއުސް ލިބިފައެވެ. އެ ވީޑިއޯގައި ފެންނަނީ ބައިސްކޯފެއްގައި ބިބީ އަޅުވައިގެން އުޅޭ މަންޒަރެވެ. މި ވީޑިއޯއަށް ގިނަ ބައެއްގެ ސަމާލުކަން ލިބިފައިވާއިރު، ވީޑިއޯއަށް ގިނަ ބަޔަކު ވަނީ ޕޮޒިޓިވް ކޮމަންޓްތަކެއް ކޮށްފައެވެ. މީގެ ތެރޭގައި ދިވެހިން ނޫން މީހުން ހިމެނޭކަން ފާހަގަކޮށްލެވެއެވެ. 
އިންސްޓަރގްރާމުގައި ބިބީގެ އެ ވީޑިއޯއަށް 10.5 މިލިއަނަށްވުރެ ގިނަ ވިއުސް ލިބުމާ ގުޅިގެން ވޮއިސްއާ ވާހަކަދައްކަމުން މޮގާ ވިދާޅުވީ ކިތަންމެ ގިނަ ވިއުސް ލިބުނު ނަމަވެސް އެކަމުން ލިބޭނެ މާބޮޑު މަންފާއެއް ނެތްކަމަށެވެ.
Advertisement
އޭނާ އެގޮތަށް އެ ވިދާޅުވީ، ޔޫޓިއުބް އަދި އިންސްޓަރގްރާމް ފަދަ ވަސީލަތްތަކުގައި ޕޯސްޓްކުރާ ވީޑިއޯތަކަށް މިލިއަނުން ވިއުސް ލިބުނު ނަމަވެސް އެފަދަ ކޮންޓެންޓް  މަނިޓައިޒްކުރެވޭނެ ގޮތެއް ނެތުމުންނެވެ. 
އެފަދަ ގޮތެއް ވެފައި އޮތްނަމަހީ ބިބީ ސިނަމާގައި ދައްކައިގެން ލިބުނު އެއްޗަކަށްވުރެ ރަނގަޅުއެއްޗެއް އެކަމުންވެސް ލިބުނީސް.
މޮގާ ވިދާޅުވިއެވެ
ސަރުކާރުން ވަނީ މިދިޔަ އަހަރުގެ ޖުލައިމަހު ޔޫޓިއުބް ވީޑިއޯ ކޮންޓެންޓް ހަދާ ރާއްޖޭގެ މީހުނަށް ފައިސާލިބޭނޭ ގޮތް ފަހިކުރުމަށް އެމެރިކާގެ ކަމާބެހޭ ފަރާތްތަކާއެކު މަޝްވަރާކޮށްފައެވެ.
މިކަމާ ގުޅޭގޮތުން މީގެ ކުރިން އިކޮނޮމިކް މިނިސްޓަރު މުހައްމަދު ސައީދު ވިދާޅުވެފައިވަނީ، ޔޫޓިއުބާއި އިންސްޓަގްރާމް، ފޭސްބުކާ އަދި ޓިކްޓޮކް ފަދަ ސޯޝަލް ޕްލެޓްފޯމްތަކުގއި ކޮންޓެންޓް އުފައްދާ ދިވެހިންނަށް ވިޔަފާރީގެ އުސޫލުން އެކަންކަން ކުރެވެން ޖެހޭކަމަށެވެ. ރާއްޖޭގައި މިހާތަނަށް އެކަން ނުވެފައިވަނީ މިހާރު އޮތް ނިޒާމުގެ ތެރެއިން ޕޭމަންޓް ރިސީވްކުރެވޭނޭ ގޮތެއް ހަމަޖެހިފައި ނެތުމުންކަމަށް މިނިސްޓަރު ވަނީ ވިދާޅުވެފައެވެ.