މީޑިއާ ރެގިއުލޭޓްކުރުމުގެ ނަމުގައި ސަރުކާރުގެ ބާރު އޮންނަ ކޮމިޝަނަކުން މީޑިއާތަކަށް ހަރުކަށި ފިޔަވަޅު އެޅޭ ގޮތަށް ރައްޔިތުންގެ މަޖިލީހަށް ހުށަހެޅި ބިލު ބޭރުކޮށްލުމުގެ ސްޓޭންޑް ހިފަހައްޓައި ބިލު ދިރާސާކުރާ ކޮމިޓީގައި ވެސް މޯލްޑިވްސް މީޑިއާ ކައުންސިލްގެ މެންބަރުން ބިލު ބޭރުކޮށްލުމަށް މިއަދު ގޮވާލައިފި އެވެ.
ވީކިހިނެއް؟ - ރައްޔިތުންގެ މަޖިލީހަށް ބިލު ބަލައިގަނެ، މަޖިލިސް ޗުއްޓީގައި ވެސް އޮތް ދުވަސްވަރެއްގައި ބިލުގެ މަސައްކަތް ކޮމިޓީން ކުރަމުން ދަނީ ބިލު ބޭރުކޮށްލުމަށް ނޫސްވެރިންނާއި ރާއްޖެ އާއި ބޭރުގެ ޖަމިއްޔާތަކުން އަދި އެމްއެމްސީން ވެސް ގޮވާލަމުން ދަނިކޮށެވެ.
ބިލަށް ހިޔާލު ހޯދުމަށް މިއަދު މެންދުރުފަހު އެމްއެމްސީގެ މެންބަރުން ހާޒިރުކޮށް ކުރިއަށް ގެންދިޔަ ކޮމިޓީ ބައްދަލުވުމުގައި ވެސް އެމްއެމްސީގެ މެންބަރުން ކަންބޮޑުވުން ފާޅުކުރީ ބިލު ފަރުމާކުރި މަރުހަލާގައި އެ ކައުންސިލާއި އެހެނިހެން މަސްލަހަތުވެރިންގެ ހިޔާލާއި ގައުމީ ފެންވަރުގެ ދިރާސާއެއް ނުކޮށް މި ކަން ކުރިއަށް ދާތީ އެވެ.
ތަފްސީލް - މީޑިއާ ކައުންސިލްގެ ރައީސް ހުސައިން ސަގީފު ވިދާޅުވީ ޒިންމާދާރު ނޫސްވެރިކަމުގެ ވެއްޓެއް ގާއިމުކުރުމަށް އިސްލާހުތަކެއް ބޭނުންވާ ކަމަށާއި ނަމަވެސް މިހާރު ހުށަހެޅިފައިވާ ބިލުން، ރައްޔިތުންގެ މަޖިލީހުގެ މެންބަރުން ފާޅުކުރައްވާފައިވާ ކަންބޮޑުވުންތަކަށް ވެސް ހައްލެއް ނުލިބޭނެ ކަމަށެވެ.
ދޮގު ވާހަކަ ފެތުރުމާއި މީހުންގެ އަބުރަށް އުނިކަން އަންނަ ގޮތަށް ވާހަކަތައް ލިޔެފައި ހުންނަނީ ނޫހެއްގެ ގޮތުގައި ރަޖިސްޓްރީނުކުރާ ވެބްސައިޓްތަކެއްގައި ކަމަށާއި ވެބްސައިޓް ޑައުންކުރި ނަމަވެސް ވީޕީއެން އާއި އިންޓަނޭޝަނަލް ހޮސްޓިން ބޭނުންކޮށްގެން އެ ސައިޓްތައް ހިންގާނެ ކަމަށް ސަގީފު ވިދާޅުވި އެވެ.
އޭނާ ވިދާޅުވީ މި ހުރިހާ ކަމަކަށް ބެލި ނަމަވެސް ބިލުގައި ހުރީ ތަންފީޒުނުކުރެވޭނެ ވަރުގެ ކަންކަން ކަމަށެވެ.
ކައުންސިލްގައި ދެން ތިބި މެންބަރުން ވަނީ ބިލުގައި ހުރި ބޮޑެތި މައްސަލަތައް ވެސް ކޮމިޓީއަށް ތިލަކޮށްދީފަ އެވެ. އެ ގޮތުން:
ކޮމިޝަންގެ ހަތް މެންބަރުންގެ ތެރެއިން ހަތަރު މެންބަރުން މީޑިއާތަކުންނާއި ނޫސްވެރިން އިންތިހާބުކުރިއަސް ދައުލަތުގެ މީޑިއާ ޕީއެސްއެމް ހިމަނާ ނަމަ މުޅި ކޮމިޝަން ކޮންޓްރޯލްކުރާނީ ދައުލަތް ނޫނީ ސަރުކާރުންކަން
އެ ހުރިހާ މެންބަރުން ވެސް ވަކިކުރުމުގެ ބާރު ރައްޔިތުންގެ މަޖިލީހަށް ލިބޭތީ، ވަރަށް ބޮޑަށް ކޮމިޝަނަށް ސިޔާސީ ނުފޫޒު ވަދެ ހަގީގީ މާނައެއްގައި މީޑިއާތައް ރެގިއުލޭޓް ނުކުރެވޭނެކަން
ނޫސްވެރިންނަށް ލިބިދޭން ޖެހޭ ރައްކާތެރިކަމުގެ އެއްވެސް ވާހަކައެއް ބިލަކު ނެތް
ވަގުތީ ގޮތުން ނޫސްތައް ބަންދުކުރުމާއި މައްސަލަ ނިމެންދެން ބަންދުކޮށްފައި ބެހެއްޓުމާއި ނޫސްވެރިންގެ މުސާރައާ ނުބައްދަލު ބޮޑެތި ޖޫރިމަނާތަކުގެ ސަބަބުން މިނިވަން ނޫސްވެރިކަން ވަރަށް ބޮޑަށް ފަހަތަށް ދާނެ
ސަގީފު ވިދާޅުވީ ޕްރެސް ފްރީޑަމް ނުވަތަ ނޫސްވެރިކަމުގެ މިނިވަންކަމުގެ އިންޑެކްސްގައި ރާއްޖެ ފަހަތަށްދާނެ ކަން މިހާރު ޔަގީންވާ ކަމަކީ އެ އިންޑެކްސް އެކުލަވާލާ 'ރިޕޯޓާސް ވިތައުޓް ބޯޑާސް' އިން އެ ބިލަކީ ނޫސްވެރިކަމަށް ހުރި ނުރައްކަލެއް ކަން ފާހަގަކޮށްފައިވާތީ އެވެ.
އެމްއެމްސީގެ ނައިބު ރައީސް އިބްރާހީމް މުހައްމަދު ފާހަގަކުރެއްވީ ކައުންސިލަށް ހުރި ގޮންޖެހުންތަކެވެ. އަދި ފުރަތަމަ ހައްލުކުރަންވީ އެ ކަންކަން ކަމަށް ވެސް ވިދާޅުވި އެވެ. އެ ގޮތުން:
މީޑިއާ ކައުންސިލްގެ ބަޖެޓަކީ މަހަކު ގާތްގަނޑަކަށް ހަތަރު ލައްކަ ރުފިޔާ
މީޑިއާތައް މޮނިޓާކުރާނެ ވަސީލަތެއް ނެތް
ތިބީ އެންމެ 14 މުވައްޒަފުން
މި ހުރި ގޮންޖެހުންތަކާއެކު ވެސް މީޑިއާ ކައުންސިލަށް ހުށަހެޅޭ ގިނަ މައްސަލަތައް ނިންމަމުންދާކަން ވެސް ތަފާސްހިސާބުތަކާ އެކު ފާހަގަކުރެއްވި އެވެ.
މި އަހަރުގެ ތެރޭގައި މިހާތަނަށް 52 މައްސަލަ ނިންމި؛ ނުނިމި 16 މައްސަލައެއް
ނޫސްތަކާ އެއްކޮޅަށް ނިންމީ އެންމެ ނުވަ މައްސަލަ
ގިނައީ ރަޖިސްޓްރީނުކޮށް ހިންގާ ސައިޓުތަކެއްގެ މައްސަލަ؛ އޭގެ 58 މައްސަލަ
ފާހަގަކޮށްލެވޭ - މިއަދު ހެނދުނު ބްރޯޑްކާސްޓިން ކޮމިޝަން (ބްރޯޑްކޮމް)ގެ މެންބަރުން ވެސް ވަނީ އެ ބިލާ އެ ބޭފުޅުން ދެކޮޅުކަން ހާމަކުރައްވައިފަ އެވެ. އެ މެންބަރުން ވެސް ގޮވާލީ ގައުމީ ފެންވަރުގެ ދިރާސާއެއް ކުރުމަށްފަހު މިފަދަ ބިލެއް ތައްޔާރުކޮށްގެން މަޖިލީހުގެ ދިރާސާކުރުމުގެ މަރުހަލާއަށް ގެނެސްގެން މަސައްކަތް ކުރުމަށެވެ.
އެމްއެމްސީން ގޮވާލީ މީޑިއާ ބިލު ބޭރުކުރަން؛ 'ނޫސްވެރިކަމުގެ އިންޑެކްސްގައި ފަހަތަށް ސޮއްސާލާނެ'
އަރުޝީފަށް ނެގީ
އެންމެފަހުން އަޕްޑޭޓްކުރީ
އެންމެފަހުން އަޕްޑޭޓްކުރީ