ހުސްވެފައިވާ ޕްރޮސިކިއުޓަ ޖެނެރަލް (ޕީޖީ) ގެ މަގާމަށް އައްޔަންކުރުމަށްޓަކައި މަޖިލީހުގެ ރުހުން ހޯދަން ފޮނުވާފައިވާ ގާނޫނީ ވަކީލު މައުމޫން ހަމީދުގެ ނަން މިނިވަން މުއައްސަސާތަކާ ބެހޭ ކޮމިޓީއަށް ފޮނުވާފައި އޮންނަތާ ތިން މަސް ފަހުން، މިއަދު ކޮމިޓީން އޭނާއާ އިންޓަވިއުކޮށްފި އެވެ. މަގާމުތަކަށް ބޭފުޅުން އައްޔަން ކުރާއިރު، މަޖިލީހުން ރުހުން ދޭން ފެންނަ ކަމަށް ކޮމިޓީން ނިންމަނީ 75 މާކްސްއަށް ވުރެ މަތިން އެ ބޭފުޅަކަށް މާކްސް ލިބިވަޑައިގަތުމުންނެވެ. އެއަށް ވުރެ މާކްސް ދަށް ވިޔަސް އެ ނަމަކާމެދު ގޮތެއް ނިންމާނީ މަޖިލީހުގެ ތަޅުމުންނެވެ. މައުމޫންގެ ނަން ކޮމިޓީއަށް ފޮނުވާފައިވަނީ މިދިޔަ އަހަރުގެ ޑިސެމްބަރު 16 ގަ އެވެ. ޕީޖީގެ ގާނޫނު ބުނާ ގޮތުން ޕީޖީގެ މަގާމު ހުސްވާތާ 30 ދުވަހުގެ ތެރޭގައި އާ ބޭފުޅަކު އައްޔަން ކުރަން ޖެހެ އެވެ. ނަމަވެސް ޕީޖީ އައްޔަންކުރުމުގެ މަސައްކަތް މަޖިލީހުގެ ކޮމިޓީގައި ކުރިއަށް ނުގެންދެވުނީ އެންމެ ބޮޑު ދެ ޕާޓީކަމުގައިވާ އެމްޑީޕީ އާއި ޕީޕީއެމުން އެކަމަށް އެއްބާރުލުން ނުލިބިގެން ކަމަށް އެ ކޮމިޓީގެ މުގައްރިރު، ދިއްދޫ ދާއިރާގެ މެމްބަރު އަހްމަދު ސަމީރު ކުރިން ވަނީ ވިދާޅުވެފަ އެވެ. ޕީޖީގެ މަގާމު ހުސްވީ، ރާއްޖޭގެ ފުރަތަމަ ޕީޖީގެ ގޮތުގައި އެ މަގާމަށް އައްޔަން ކުރެއްވި އަހުމަދު މުއިއްޒު މިދިޔަ އަހަރުގެ ނޮވެމްބަރު މަހު އިސްތިއުފާ ދެއްވުމުންނެވެ. މުއިއްޒު އިސްތިއުފާ ދެއްވީ އޭނާގެ އިތުބާރު ނެތް ކަމަށް މަޖިލީހުން ވޯޓު ނަގަން އުޅުމުން ނެވެ. އާ ޕީޖީއަކަށް އައްޔަން ކުރެއްވުމަށް ހުށަހަޅުއްވާފައިވާ މައުމޫން ހަމީދަކީ ކުރީގެ އެޓޯލްސް މިނިސްޓަރު އަބްދުﷲ ހަމީދުގެ ބޭފުޅެކެވެ. އަދި ރައީސް އަބްދުﷲ ޔާމީނާއި ކުރީގެ ރައީސް މައުމޫން އަބްދުލް ގައްޔޫމަށް ބޮޑުބޭބެ ވިދާޅުވާ ބޭފުޅެކެވެ.