ޖުމްހޫރީ ޕާޓީ (ޖޭޕީ) ގެ މެނިފެސްޓޯގައި ހިމަނާނީ އެ ޕާޓީގެ ވެރިކަމުގެ ފަސް އަހަރުގެ ތެރޭގައި ހަގީގަތަކަށް ހެދޭނެ ކަންކަން ކަމަށް ޕާޓީގެ ލީޑަރު އަދި ރިޔާސީ ކެންޑިޑޭޓް ގާސިމް އިބްރާހިމް ވިދާޅުވެއްޖެ އެވެ.
"ނުކުރެވޭފަދަ ވައުދުތައްވެ، ރައްޔިތުންނަށް ހުވަފެން ދެއްކުމަކީ [އަޅުގަނޑުމެން] ކުރާނެ ކަމެއް ނޫން،" ގާސިމް އިބްރާހިމް ވިދާޅުވި އެވެ.
ރައްޔިތުންގެ މަޖިލީހުގެ މާމިގިލީ ދާއިރާގެ ގޮނޑިވެސް ފުރުއްވާ ގާސިމް ވިދާޅުވީ މި އަހަރު ބާއްވާ ރިޔާސީ އިންތިހާބުގައި އެމަނިކުފާނާ ވާދަ ކުރައްވާ ބޭފުޅުންގެ ތެރޭގައިޤައުމަށް ޚިދުމަތް ކުރުމާއި ރައްޔިތުންނަށް އަޅާލައި އޯގާތެރިވުމުގެ ރޮނގުންވެސް އެމަނިކުފާނާ ކައިރިކުރެވޭ މިންވަރަށް ކަންކަން ކޮށްދެއްވާފައިވާ ބޭފުޅަކު ނެތްކަމަށެވެ.
އެމަނިކުފާނުގެ އަމިއްލަފުޅު ދިރިއުޅުއްވުމަށް ބެލި ނަމަވެސް ކަން ކުރެވިފައިވަނީ ކާކަށްކަން ވަރަށް ސާފުކޮށް އެނގޭނެ ކަމަށާ، އެގޮތުން ރާއްޖޭގެ ރައީސްކަމަށް ކުރިމަތިލައްވަނީ ގައުމަށާއި، ރައްޔިތުންނަށް ހެޔޮއެދިގެން ކަމަށެވެ.
ޖޭޕީން ބުނީ އެޕާޓީގެ 2013 ވަނަ އަހަރުގެ މެނިފެސްޓޯ ވެގެންދާނީ ރާއްޖޭގައި މިހާތަނަށް އެކުލަވައިލެވޭ އެންމެ ފުރިހަމަ މެނިފެސްޓޯއަށް ކަމަށާއި އެ މެނިފެސްޓޯ އަކީ ހުވަފެނީ ދުނިޔެއިން ރައްޔިތުން ނެރެ، ހަގީގީ މާނައިގައި ހެޔޮގޮތްތައް ހޯދައިދޭނެ މެނިފެސްޓޯއެއް ކަމަށެވެ.
ޖޭޕީގެ މެނިފެސްޓޯ އެކުލަވައިލަނީ ފަންނީ މާހިރުންގެ ޓީމަކުންނެވެ. މިހާރު ޑްރާފްޓް ކޮށްފައިވާ މެނިފެސްޓޯ އާއި ބެހޭގޮތުން މަޝްވަރާ ކުރުމަށް އެ ޕާޓީން ވަނީ މިމަހުގެ 7 އިން 8 އަށް ޕެރަޑައިސް އައިލެންޑް ރިސޯޓްގައި މަސައްކަތު ބައްދަލުވުމެއް ވެސް ބާއްވާފަ އެވެ. ބައްދަލުވުމުގައި ޕާޓީގެ ކައުންސިލްގެ ބައެއް މެމްބަރުންނާއި، ޕޮލިޓިކަލް ސްލޮޓްތަކުގައި ތިއްބެވި ބައެއް ބޭބޭފުޅުންނާއި، ޖޭޕީގެ ބައެއް ޢާއްމު މެމްބަރުންގެ އިތުރުން ތަޢުލީމީގޮތުން ޤާބިލް، އަދި ތަޖުރިބާކާރު ބޭބޭފުޅުން ބައިވެރިވެ ވަޑައިގެންނެވި އެވެ.
ޖޭޕީގެ މެނިފެސްޓޯ އެކުލަވައިލަން އިތުރު ބައްދަލުވުންތަކެއް ބާއްވަން ހަމަޖައްސާފައިވާ ކަމަށް ވެސް އެޕާޓިން ބުންޏެވެ.