ތ.ވިލުފުށީ ގެއަކުން ވަގަށް ނަގާފައިވާ ގިނަ ޢަދަދެއްގެ ފައިސާތަކެއް ހޯދައި ވައްކަންކުރިކަމުގެ ތުހުމަތުގައި ކުޑަކުއްޖަކާއި 18 އަހަރުގެ ދެ މީހަކު ފުލުހުން ހައްޔަރުކޮށްފިއެވެ.
ފުލުހުން ވިދާޅުވީ އެ ކުޑަކުއްޖާއާއި 18 އަހަރުގެ ދެ ފިރިހެނުން ހައްޔަރުކޮށްފައި ވަނީ މި މަހުގެ ދެވަނަ ދުވަހުގެ 18:30 ހާއިރު ވިލުފުށީ ޕޮލިސް ސްޓޭޝަނަށް ހުށަހެޅި ވައްކަމުގެ މައްސަލައާ ގުޅިގެން ކޯޓު އަމުރެއްގެ ދަށުން އިއްޔެގެ ވަގުތެއްގައި ކަމަށެވެ.
މިމައްސަލާގައި ވަގަށް ނަގާފައިވާ ލައްކައަކަށްވުރެ ގިނަ ރުފިޔާގެ ތެރެއިން 56،000 ރުފިޔާ ފެނިފައިވާއިރު މި ފައިސާތައް ފެނިފައިވަނީ ފުލުހުން ހައްޔަރުކުރި ތިން މީހުންގެ ތެރެއިން 18 އަހަރުގެ އެކަކު ދިރިއުޅެމުންދާ ގޭގެ ކޮޓަރިއެއްގައި ހަރުކޮށްފައިހުރި ސީލިންގ ފަންކާގެ ތަށިތެރެއަށް ލައި ފޮރުވާފައިވަނިކޮށްކަމަަށް ފުލުހުން މައުލާމާތުދެއެވެ.
ފުލުހުން ހައްޔަރުކޮށްފައިވާ ތިން މީހުންގެ ބަންދާމެދު ގޮތެއް ނިންމުމަށް ތ. ގުރައިދޫ މެޖިސްޓްރޭޓް ކޯޓަށް ހާޒިރުކުރުމުން ކުޑަ ކުއްޖާއަށްވަނީ ގޭބަންދަށް 15 ދުވަހުގެ މުއްދަތެއް ދީފައެވެ. އަދި 18 އަހަރުގެ ދެ މީހުން ބަންދުގައި ބަހައްޓައިގެން ތަހުޤީޤު ކުރިއަށް ގެންދިޔުމަށް 15 ދުވަހުގެ މުއްދަތެއް ވަނީ ދީފައެވެ.