ފޮރިން މިނިސްޓްރީން ބުނެފައިވަނީ މިހާރު ކުރިމަތިވެފައިވާ މާލީ ދަތިތަކުން އަރައިގަތުމުގައި ރާއްޖެއަށް އިންޑިޔާ ސަރުކާރުން ފޯރުކޮށްދެމުންދާ އެހީތެރިކަމަށް މިނިސްޓަރު ހަލީލު ޝުކުރު އަދާކުރެއްވި ކަމަށެވެ.
މިހާރު އިންޑިޔާއަށް ރަސްމީ ދަތުރުފުޅެއްގައި ވަޑައިގެން އުޅުއްވާ ހާރިޖީވަޒީރު އަބްދުﷲ ހަލީލާ އެ ގައުމުގެ އެކްސްޓާނަލް އެފެއާޒް މިނިސްޓަރު ޑރ.ސުބްރަމާނިޔަމް ޖައިޝަންކަރު ބައްދަލުކުރައްވައިފި އެވެ. 
ފޮރިން މިނިސްޓަރުކަމާ ހަވާލުވެވަޑައިގަތުމަށްފަހު އިންޑިޔާއަށް ކުރައްވާ ފުރަތަމަ ރަސްމީ ދަތުރުފުޅުގައި މިނިސްޓަރު ހަލީލު އެ ގައުމަށް ވަޑައިގަތީ ރޭގަ އެވެ. އެ ދަތުރުފުޅުގެ އިތުރު ގިނަ ތަފުސީލުތަކެއް މިހާތަނަށް ހާމަކޮށްފައިނުވެ އެވެ. 
މި ދަތުރުފުޅުގައި މިއަދު ހެނދުނު އިންޑިޔާގެ ހާރިޖީވަޒީރު ޖައިޝަންކަރާ ބައްދަލުކުރައްވައި އެ ގައުމުގެ ހިލޭ އެހީގައި އަދި އިންޑިޔާގެ އެގްޒިމް ބޭންކުން ހަމަޖައްސާފައިވާ ލައިން އޮފް ކްރެޑިޓުގެ ދަށުން ރާއްޖޭގައި ހިންގަމުން އަންނަ މަޝްރޫއުތަކާ ގުޅޭ ގޮތުން ދެ ބޭފުޅުން މަޝްވަރާކުރެއްވި އެވެ. 
ފޮރިން މިނިސްޓްރީން ބުނެފައިވަނީ މިހާރު ކުރިމަތިވެފައިވާ މާލީ ދަތިތަކުން އަރައިގަތުމުގައި ރާއްޖެއަށް އިންޑިޔާ ސަރުކާރުން ފޯރުކޮށްދެމުންދާ އެހީތެރިކަމަށް މިނިސްޓަރު ހަލީލު ޝުކުރު އަދާކުރެއްވި ކަމަށެވެ. 
އަދި ޒަމާނުއްސުރެ އިންޑިޔާއިން ރާއްޖެއާ ބާއްވަމުންދާ ގާތް ގުޅުން ފާހަގަކުރައްވަމުން މިނިސްޓަރުގެ ދަތުރުފުޅާއެކު ދެ ގައުމުގެ ގުޅުން އިތުރަށް ބަދަހިވާނެކަމަށް އުންމީދުކުރައްވާ ކަމުގައި މިނިސްޓަރު ހަލީލު ވިދާޅުވެފައިވެ އެވެ. 
މި ބައްދަލުވުމަށްފަހު ޑރ.ޖައިޝަންކަރު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ ރާއްޖެއާއި އިންޑިޔާގެ މެދުގައި ތަރައްގީއާއި އިގުތިސާދުގެ ދާއިރާއިންނާއި މާލީ-ޓެކްނޮލޮޖީގެ ދާއިރާއިން އަދި ދެ ގައުމުގެ ރައްޔިތުންގެ މެދުގައި އޮތް ގުޅުންތައް އިތުރަށް ބަދަހިކުރުމާމެދު އެ ބައްދަލުވުމުގައި މަޝްވަރާކުރެވުނު ކަމަށެވެ. 
އަދި ރާއްޖޭގެ ކުރިއެރުމާއި ފުދުންތެރިކަމަށް ހިފަހެއްޓުމެއްނެތި ވާގިވެރިވާ ގައުމެއްގެ ގޮތުގައި، އެ ގައުމުގެ ނެއިބާހުޑް ފަސް ސިޔާސަތުގެ މަތީގައި އިންޑިޔާ އަބަދުވެސް ދެމިއޮންނާނެ ކަމަށްވެސް އޭނާ ވިދާޅުވި އެވެ. 
އިންޑިޔާއިގެ ހިލޭ އެހީގައި ރާއްޖޭގައި ހިންގަމުންދާ ހައި އިމްޕެކްޓް ކޮމިއުނިޓީ ޑިވެލޮޕްމެންޓު މަޝްރޫއުތަކުގެ ތިންވަނަ މަރުހަލާ ހިންގުމާ ގުޅޭ ފަހުމުނާމާގައި ދެ މިނިސްޓަރުން ސޮއިކުރައްވާފައިވެ އެވެ. 
 ހައި އިމްޕެކްޓް ކޮމިއުނިޓީ ޑިވެލޮޕްމެންޓު މަޝްރޫއުތަކަކީ އިންޑިޔާގެ ހިލޭ އެހީގައި އަތޮޅު ތެރޭގެ ރަށްރަށުގައި ހިންގަމުންދާ ކުދި މަޝްރޫއުތަކެކެވެ. މަގުބައްތި ހަރުކުރުމާއި ޖެޓީ މަރާމާތުކުރުން ފަދަ ބައެއް މަޝްރޫއުތައް މި ޕްރޮގުރާމުގެ ތެރެއިން މިހާތަނަށް ހިންގާފަައިވެ އެވެ. 
މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ