އުރީދޫ މޯލްޑިވްސްއިން ކޮންމެ އަހަރަކު ބާއްވާ އެންމެ މަޖާ އަދި ބޮޑު ދުވުން ކަމުގައިވާ "އުރީދޫ ފަން ރަން" މިއަދު ކާމިޔާބުކަމާއެކު ނިންމާލައިފިއެވެ.
މިއަހަރުގެ ދުވުން ބޭއްވުނީ ހުޅުމާލޭ ސެންޓްރަލް ޕާކު ސަރަހައްދުގައެވެ.
މިއަދު ހަވީރު ވާރޭ ވެހުނު ނަމަވެސް، ޝެޑިއުލާ އެއްގޮތަށް ދުވުން ކުރިއަށް ގެންދެވުނެވެ. އެހެން އަހަރުތަކެކޭ އެއްގޮތަށް މަޖާ ކުޅިވަރުތަކާއެކު ބައިވެރިންގެ ހޫނު ތަރުހީބެއް މިއަހަރުގެ ދުވުމަށްވެސް ލިބުނެވެ. މި ދުވުމުގައި 6,000 މީހުން ބައިވެރިވިއެވެ.
މި ދުވުމުގައި ނައިބު ރައީސް ހުސައިން މުހައްމަދު ލަތީފާއި އުރީދޫ މޯލްޑިވްސްގެ މެނޭޖިންގ ޑިރެކްޓަރު އަދި ސީއީއޯ ހާލިދް އަލް ހަމާދީ އާއި އެ ކުންފުނީގެ އިސްވެރިން ބައިވެރިވެވަޑައިގަތެވެ. އުރީދޫ ފަން ރަން 2024 ފެށުމުގެ ކުރިން ރައީސުލްޖުމްހޫރިއްޔާގެ ނައިބު ވަނީ އުރީދޫ ފަން ރަން ބައިވެރިންގެ ޚާއްޞަ ސެލްފީއެއް ނަންގަވާފައެވެ.
ކޮންމެ ކިލޯމީޓަރެއްގައި ދުވުންތެރިންނަށް މަރުހަބާ ކިޔަން ފަން ސްޓޭޝަންތައް ބެހެއްޓިފައިވާއިރު، ކުލަ ޖެހުމާއި އޮބްސްޓެކަލްސްތައް ހުރަސްކުރުން ފަދަ ހަރަކާތްތައްވެސް ހިމެނުނެވެ. މީގެ އިތުރުން، ދުވުން އިތުރަށް ފޯރިގަދަ ކުރުމުގެ ގޮތުން ފޯމް ޕާޓީއެއްވެސް ބޭއްވުނެވެ.
އުރީދޫއިން މިއަދު އިޢުލާންކުރި ގޮތުގައި، އަންނަ އަހަރު "ފަން ރަން ފުވައްމުލަކު އެޑިޝަން" އެއް ބާއްވާނެއެވެ. މިއީ މާލެ ސަރަހައްދުން ބޭރުގައިވެސް މި ދުވުން ބޭއްވުމުގެ ބޭނުމުގައި ކުރިއަށްގެންދާ މަސައްކަތުގެ ބައެކެވެ. މިއަދުގެ ރަސްމިއްޔާތުގައި އުރީދޫގެ ފަރާތުން ފުވައްމުލައް ސިޓީގެ މޭޔަރަށް ހަނދާނީ ފިލާއެއްވެސް ހަވާލުކޮށްދެއްވާފައިވެއެވެ.
އުރީދޫ ފަން ރަން އަކީ ދުޅަހެޔޮ ސިއްހަތެއްގައި ހުރުމަށް ދުވުން ޕްރޮމޯޓްކޮށް، އާއިލާއާއެކު މަޖާ ވަގުތުކޮޅެއް ހޭދަކުރުމުގެ ފުރުސަތު ދިނުމުގެ ގޮތުން އުރީދޫއިން ކޮންމެ އަހަރަކު ބާއްވާ ދުވުމެކެވެ.
އުރީދޫ ފަން ރަން 2024 އަކީ އުރީދޫއިން އިންތިޒާމުކޮށްގެން ބާއްވާ މިފަދަ 6 ވަނަ ދުވުމެވެ.
Thiladhun © 2019 – 2023| Made with ❤️ in #Thiladhunmathi
Thiladhun © 2019 – 2022
Made with ❤️ in #Thiladhunmathi