ސަރުކާރުގެ ސިޔާސަތުތަކާ ދެކޮޅު ކައުންސިލްތަކާ ހެދި، މަޝްރޫއުތައް މަޑުޖައްސާލި ކަމަށް ސަރުކާރުން ބުނާ 57 ރަށެއްގެ މައުލޫމާތު އާއްމުކުރުމަށް އެމްޑީޕީއިން އެދެފި އެވެ.
ވީ ކިހިނެއް؟- ރަށުގެ ތަރައްގީއަށްޓަކައި ގިނަ ރޭވުންތަކެއް ހުރި ނަމަވެސް، ސަރުކާރުގެ ވައުދުތައް ފުއްދުމަށް 57 ރަށެއްގެ ކައުންސިލުން އެއްބާރުލުން ނުދޭ ކަމަށް، ރައީސް ޑރ. މުހައްމަދު މުއިއްޒު އިހަކަށްރޭ ވަނީ ވިދާޅުވެފަ އެވެ. އަދި އޭގެ ސަބަބުން މަޝްރޫއުތައް ނުފެށި މަޑުޖައްސާލާފައިވާ ކަމަށް އެ މަނިކުފާނު ވިދާޅުވި އެވެ.
އެކަމަކު ރައީސްގެ މި ވާހަކަފުޅަށް އެމްޑީޕީއިން މިއަދު ވަނީ ގޮންޖަހާފަ އެވެ.
އެމްޑީޕީއިން މިއަދު ބޭއްވި ނޫސްވެރިންގެ ބައްދަލުވުމެއްގައި، އެ ޕާޓީގެ ކެމްޕޭން ތަރުޖަމާނު އަދި ޕާޓީގެ ދިއްދޫ ދާއިރާގެ ރައީސް މުހައްމަދު ވަހީދު ވިދާޅުވީ ރައީސް ފާހަގަ ކުރެއްވި އެ ރަށްތަކުގެ މައުލޫމާތު ހޯއްދެވުމަށް އެ ޕާޓީއިން، މައުލޫމާތު ހޯދުމާއި ލިބިގަތުމުގެ ހައްގުގެ ގާނޫނުގެ ދަށުން، ރައިޓް ޓު އިންފޮމޭޝަން (އާރުޓީއައި) ފޯމު ހުށަހަޅާފައިވާ ކަމަށެވެ. އެކަމަކު މިހާތަނަށް އޭގެ ޖަވާބެއް ނުލިބޭ ކަމަށް ވިދާޅުވި އެވެ.
ރައީސްގެ އެ ވާހަކަފުޅުގެ މަގްސަދަކީ، ވަހީދު ވިދާޅުވި ގޮތުގައި ކައުންސިލްތަކަށް ފުރައްސާރަކޮށް، ޖެއްސުން ކުރުމެވެ. އަދި ސަރުކާރުގެ ނާގާބިލްކަން ދެއްކުން ކަމަށް ވިދާޅުވި އެވެ.
"އަޅުގަނޑު ޗެލެންޖުކޮށްފައި މި ބުނަނީ، ނުކެރޭނެ ސަރުކާރަކަށް އެ ރަށްތަކުގެ ނަން ބުނާކަށް. އެންމެ ރަށެއްގެ މައުލޫމާތެއް ވެސް ނުކެރޭނެ ދޭކަށް،" ވަހީދު ވިދާޅުވި އެވެ.
އޭނާ ވިދާޅުވީ ކައުންސިލް އިންތިހާބާ ދިމާކޮށް، ސަރުކާރުގެ އެކި ފެންވަރުގެ މީހުން ރަށްރަށަށް ގޮސް 'ވަޒީފާތައް ބަހަމުން' ދާ ކަމަށެވެ. އޭގެ އިތުރުން، 'ޖަލުގައި ތިބި މީހުން ގެއަށް' ބަދަލުކޮށް އެކި މީހުންގެ މައްޗަށް ކޮށްފައިވާ ދައުވާތައް ނަގަމުންދާ ކަމަށް ތުހުމަތު ކުރެއްވި އެވެ.
ވަހީދު ވިދާޅުވީ ސަރުކާރުގެ އެކި މުއައްސަސާތަކުގެ މުވައްޒަފުންނާއި ވަސީލަތްތައް ބޭނުންކޮށްގެން، މީގެ ކުރީގެ އިންތިހާބެއްގައި ނުފޫޒު ނުފޯރުވާ ވަރަކަށް ސަރުކާރުން މި އިންތިހާބަށް ނުފޫޒު ފޯރުވަމުން ދާ ކަމަށެވެ.