ކުރީގެ ބައެއް ފިލްމުތަކުގައި މަސައްކަތް ކުރުމަށްފަހު ފަހުން ޓެލެވިޒަން ދާއިރާއާ ގުޅުނު އެކްޓަރު ރޯނިތު ރޯއިގެ ނަމުގައި ބަޔަކު މީހުން އޮޅުވާލައިގެން އަންހެން ކުދިންތަކެއްގެ އަތުން ފައިސާ ހޯދަން އުޅުނު މައްސަލައެއް ފެންމަތިވެއްޖެއެވެ. ސޯޝަލް މީޑިއާގައި ކުރި ޕޯސްޓެއްގައި ރޯނިތު ވަނީ، އޭނާގެ ވަކިވަކި މައުލޫމާތުތައް ބޭނުންކޮށްގެން، ހާއްސަކޮށް އަންހެނުންނަށް އަމާޒުކޮށް ފައިސާ ހޯދުމަށް މަސައްކަތް ކުރަމުންދާ މީހަކާ ބެހޭގޮތުން އާންމުންނަށް އިންޒާރު ދީފައެވެ. "މީހަކު އަހަރެންގެ ނަމުގައި މީހުންނަށް، ހާއްސަކޮށް އަންހެން ކުދިންނަށް މެސެޖުކޮށް ފައިސާއަށް އެދެމުންދާކަން އަހަރެންގެ ސަމާލުކަމަށް ވަނީ އައިސްފައި. މި މީހާ ދަނީ އަހަރެންގެ ނަމުގައި ބުކިންގްސްތައް ހޯދަންވެސް މަސައްކަތް ކުރަމުން. މިކަމުގައި ބޭނުންކުރަނީ 'ޒަންގީ' ނަންބަރެއް. އަދި ބޭނުންކުރާ އީމެއިލް އައިޑީއަކީ [email protected]. އެންމެހައި ބޭފުޅުން މިކަމަށް ސަމާލުވެލައްވާ" ރޯނިތު ސްޓާ ޕްލަސްގެ ޑްރާމާ ސީރީސް "ކަސައުޓީ ޒިންދަގީ ކޭ"ގެ މަންޒަރެއްގައި--ފޮޓޯ/އެންޑީޓީވީ ރޯނިތު އިތުރަށް ސާފުކޮށްދިން ގޮތުގައި، އޭނާ ދުވަހަކުވެސް އަމިއްލަ ގޮތުން ސޯޝަލް މީޑިއާ މެދުވެރިކޮށް އެއްވެސް މީހެއްގެ އަތުން ފައިސާއަކަށް ނުވަތަ އެއްވެސް ކަހަލަ އެހީތެރިކަމަކަށް ނޭދޭނެއެވެ. "ސޯޝަލް މީޑިއާ މެދުވެރިކޮށް ނުވަތަ އެނޫންވެސް ގޮތަކަށް އަހަރެން އަންހެނުންނާ މުއާމަލާތް ނުކުރާނެކަން ދަންނަވަން. އަދި ހަމަގައިމުވެސް އަހަރެން އެއްވެސް މީހެއްގެ އަތުން ފައިސާއަކަށް ނޭދޭނަން. ތިޔަބޭފުޅުންނަށް މިފަދަ ކަމެއް ފާހަގަވެއްޖެނަމަ، ވަގުތުން އަހަރެންގެ ސަމާލުކަމަށް އެކަން ގެންނަވާ،" ރޯނިތު އިތުރަށް ލިޔެފައިވެއެވެ. މީގެއިތުރުން، މަޝްހޫރު ފަންނާނުންގެ ނަން ބޭނުންކޮށްގެން މައުސޫމް މީހުންނަށް އޮޅުވާލާ މަކަރުވެރިންނަށް ސަމާލުވުމަށް ރޯނިތު ވަނީ އިލްތިމާސްކޮށްފައެވެ. އަދި މިފަދަ ކަމެއް ދިމާވެއްޖެނަމަ އެކަން ކަމާބެހޭ ފަންނާނުންނަށް އެންގުމަކީ މުހިންމު ކަމެއް ކަމަށްވެސް ރޯނިތު ވަނީ ބުނެފައެވެ. ސައިބް ފްރޯޑު ނުވަތަ އިންޓަނެޓް މެދުވެރިކޮށް ހިންގާ މަކަރާއި ހީލަތުގެ މައްސަލަ އަކީ ފިލްމު އިންޑަސްޓްރީގެ ވަރަށް ގިނަ ފަންނާނުންނަށް ކުރިމަތިވަމުން އަންނަ މައްސަލައެކެވެ. ސްޓާޕްލަސްއިން ގެނެސްދިން މަގުބޫލު ޑްރާމާ ސީރީސް "ކަސައުޓީ ޒިންދަގީ ކޭ"ގެ 'ބަޖާޖް'ގެ ރޯލްއިން ބޮޑު މަޝްހޫރުކަމެއް ހޯދި ރޯނިތު ދެން އެންމެ އަވަހަށް ބެލުންތެރިންނަށް ފެންނާނީ ޕްރޮޑިއުސަރު ސިދާތު ރޯއީ ކަޕޫރު ތައްޔާރުކުރާ "ޓީން ކޯވޭ"އިންނެވެ.