ބޯޓު ބިލްޑިން ނުވަތަ އޮޑިދޯނިފަހަރު ބިނާކުރުމުގެ ދާއިރާގެ ވަޑިންނަށް ރަހުނަކާ ނުލައި ލޯނު ލިބޭނެ އިންތިޒާމު ހަމަޖައްސަވައި، މި ދާއިރާއަށް މީހުން ބިނާކުރުމަށްޓަކައި ޚާއްސަ މަރުކަޒެއް އިންނަމާދޫގައި ތަރައްޤީކުރައްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ އިންނަމާދޫ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.
ރ. އިންނަމާދޫއަކީ ރާއްޖޭގައި އެންމެ ފުޅާ ދާއިރާއެއްގައި އޮޑިދޯނިފަހަރު ބަނުމުގެ މަސައްކަތްކުރާ އެއް ރަށެވެ. އެރަށުގައި ގިނަ ޢަދަދެއްގެ ވަޑިން އަންނަނީ މަސައްކަތްކުރަމުންނެވެ. ރައީސުލްޖުމްހޫރިއްޔާ އިންނަމާދޫއަށް ކުރެއްވި ދަތުރުފުޅުގައި ވަނީ ވަޑިންނާ ބައްދަލުކުރައްވާ އެފަރާތްތަކުގެ ކަންބޮޑުވުންތައް އަޑުއައްސަވާފައެވެ. އެފަރާތްތަކުގެ އެންމެ ބޮޑު ކަންބޮޑުވުމަކީ އެ މަސައްކަތްކުރުމަށް ފައިސާ ލިބުމުގައި ހުރި ދަތިކަމާއި، ޒުވާނުން އެދާއިރާއަށް ވަނުމުގައިހުރި ގޮންޖެހުމުގެ ކަންބޮޑުވުންތަކެވެ.
އެހެންކަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ވަޑިންގެ އެ ކަންބޮޑުވުމަށް ޙައްލު ގެނެސްދެއްވާނެކަމުގެ ޔަޤީންކަން ދެއްވާފައެވެ. އިންނަމާދޫ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ، ރައްޔިތުން ގާތަށް ވަޑައިގަތީ ރައްޔިތުން ބޭނުންވާގޮތް އޮޅުންފިލުއްވައިގެން ކަންކަމަށް ޙައްލު ގެނެސްދެއްވުމަށްކަމަށެވެ.
އޮޑިދޯނުފަހަރު ބަނުނަކީ އިންނަމާދޫގައި އިޤްތިޞާދީގޮތުން ކުރާ މުހިންމު މަސައްކަތެއްކަން ފާހަގަކުރައްވާ ރައީސް ވިދާޅުވީ ބޭންކިން ނިޒާމުގެ ތެރެއިން ރަހުނަކާ ނުލައި އެފަރާތްތަކަށް ލޯނު ލިބޭނެގޮތް ހަމަޖައްސަވައިދެއްވާނެކަމަށެވެ.
މިދާއިރާއަށް ދިވެހިން ބޭނުންވާކަން ފާހަގަކުރައްވަމުން ރައީސް ވިދާޅުވީ އޮޑިދޮނިފަހަރު ބަނުމުގެ ދާއިރާއަކީ ދިވެހިންނަށް އިސްކަންދޭ ދާއިރާއެއްގެ ގޮތުގައި އެމަނިކުފާނު ކަނޑައަޅުއްވާފައިވާކަމަށެވެ. އަދި ބޭނުންފުޅުވަނީ އެއީ މުޅިންވެސް ދިވެހިން ހަރަކާތްތެރިވާ ދާއިރާއަކަށް ހެދުމަށްކަމަށެވެ. އެހެންކަމުން އެކަމަށްޓަކައި އެދާއިރާއަށް ޒުވާނުން ބިނާކުރުމަށް ޚާއްސަ މަރުކަޒެއް އިންނަމާދޫގައި ތަރައްޤީކޮށްދެއްވާނެކަމުގެ ޔަޤީންކަން ރައީސް ދެއްވިއެވެ.
ރައީސް ވިދާޅުވީ ރަށްރަށުގައި މިފަދަ މަސައްކަތްތަކަށް ބިން ދޫކުރުމުގައި ކަންސިލްތަކަށް ދަތިތަކެއްހުރުމުން، އާމްދަނީ ލިބޭނެގޮތަށް ދިގު މުއްދަތަކަށް ކައުންސިލްތަކަށް ބިން ދޫކުރެވޭނެގޮތްވެސް ހަމަޖައްސަވާނެކަމަށެވެ. އެގޮތުން 20 އަހަރަށް ބިން ކުއްޔަށްދެވޭނެގޮތް ކަނޑައަޅުއްވައިދެއްވާނެކަމަށް އެމަނިކުފާނު ވިދާޅުވިއެވެ.
"މި މަސައްކަތުގެ ދާއިރާއިން ކުރިއަށްދާން ބޭނުންވާ ޒުވާނުންނަށް ކުރިއަށްދެވޭނެ މަގު ފަހިކޮށްދޭނަން. އަދި މިއީ ހަމައެކަނި ދިވެހިން، ތަމްރީންވެގެން، ދިވެހިން ކުރިއަށްދާ އަދި މިދާއިރާއަށް ދިވެހިން އިތުރުވާތަން ދެކެން ބޭނުން. އެހެންވީމަ އެކަން ކުރާނަން. ދެން އޮތީ ކައުންސިލުން ބިން ދިނުން." ރައީސުލްޖުމްހޫރިއްޔާ ވިދާޅުވިއެވެ.
އިންނަމާދޫގެ ތަރައްޤީގެ އެހެނިހެން މަޝްރޫޢުތަކަށް އަލިއަޅުއްވާލައްވަމުން ރައީސް ޑރ. މުޢިއްޒު ވިދާޅުވީ އެރަށުގެ ތަރައްޤީއަށް ގިނަ މަސައްކަތްތަކެއް ކުރަންޖެހިފައިވާކަމަށެވެ. އަދި ރައްޔިތުން ބޭނުންވާގޮތަށް ވަރަށް ބާރަށް އެ މަޝްރޫޢުތައް ކުރިއަށްގެންދަވާނެކަމުގެ ޔަޤީންކަން ދެއްވާކަމަށެވެ. އިންނަމާދޫގައި ގެދޮރުގެ މައްސަލަ ހައްލުކުރުމަށް ވަޢުދުވެވަޑައިގެންފައިވާކަަމަށާއި، އެކަން ކުރައްވާނެކަމަށް ރައީސް ވިދާޅުވިއެވެ.
"އިރާދަކުރެއްވިއްޔާ ކައުންސިލުން ބިން ކަނޑައަޅުއިދެއްވިހާ އަވަހަށް، ބިން ހަމަޖެހުމުން ކޮންޓެކްޓަރު ހަމެޖެހުމާއެކު 50 ޔުނިޓުގެ ހައުސިންގ މަޝްރޫއުއެއް މިރަށުގައި ހިންގުމަށް ނިންމާފައިވާކަމަށް ދަންނަވަން." ރައީސުލްޖުމްހޫރިއްޔާ ވިދާޅުވިއެވެ.
ރައީސް ވަނީ އިންނަމާދޫ ސްކޫލަށް ޖާގަ އިތުރުކޮށްދީ ވަސީލަތްތައް ޤާއިމްކޮށްދެއްވާނެކަމަށްވެސް ވިދާޅުވެފައެވެ. އަދި ސިއްޙީ މަރުކަޒަށްވެސް ޖާގަ އިތުރުކޮށްދީ ޚިދުމަތްދޭ ވަގުތުވެސް އިތުރުކޮށްދެއްވާނެކަމުގެ ޔަޤީންކަން ރައީސް ދެއްވިއެވެ.
މީގެއިތުރުން ކުޅިވަރުގެ ވަސީލަތްތައް ޤާއިމްކޮށް، ގިރާ ސަރަހައްދު ހިމާޔަތްކޮށް، ނަރުދަމާ ނިޒާމުގައި ހުރި މައްސަލަތައްވެސް ހައްލުކޮށްދެއްވާނެކަމަށާއި، އެހުރިހާ ކަމެއް ތަރުތީބުކުރައްވައިގެން ދެ އަހަރު ދުވަހުގެ ތެރޭގައި މައްސަލަތަކަށް ފުރިހަމަ ޙައްލެއް ގެނެސްދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.