އައްޑޫ ސިޓީގެ ގުޅިފައިވާ ރަށްތަކުން މިއަދާއި މާދަމާ ކަރަންޓު ކެނޑުމަކީ އެކަށީގެންވާ ކަމެއް ކަމަށް ފެނަކަ އިން ބުނެފިއެވެ.
ފެނަކަ ކޯޕަރޭޝަނުން ނެރުނު ބަޔާނެއްގައި ބުނީ އައްޑޫ ސިޓީގެ ގުޅިފައިވާ ރަށްތަކުގެ ކަރަންޓުގެ މައްސަލައަށް ހައްލު ހޯދުމަށް އައްޑޫ ސެންޓްރަލް ޕަވަރ ސްޓޭޝަނުގައި އަލަށް ބެހެއްޓުނު 2 މެގަވޯޓުގެ 2 ޖަނަރޭޓަރު އައްޑޫގެ ކަރަންޓުގެ ވިޔުގަޔާއި ގުޅާލާ ސިންކްރޮނައިޒް ކުރުމުގެ މަސައްކަތް މިއަދާއި މާދަމާ (ބުރާސްފަތި އަދި ހުކުރު) ކުރުމަށް ހަމަޖެހިފައިވާތީ، މަސައްކަތް ކުރަމުންދާ ވަގުތުތަކުގައި ކަރަންޓުގެ ޚިދުމަތް ކެނޑުމަކީ އެކަށީގެންވާ ކަމެއް ކަމަށެވެ.
މަސައްކަތް ކުރަމުންދާ ވަގުތުތަކުގައި ކަރަންޓުގެ ޚިދުމަތް މެދުކެނޑުމާއި ގުޅިގެން ދިމާވެދާނެ ދަތިތަކަށް އައްޑޫގެ ރައްޔިތުންގެ ކިބައިން ފެނަކައިން ވަނީ މައާފަށް އެދިފައެވެ. އަދި މިފަދަ ކަންކަމުގައި އައްޑޫގެ ރައްޔިތުންގެ ކިބައިން ލިބެމުންދާ އެއްބާރުލުން ފެނަކައިން ފާހަގަކުރެއެވެ.
އައްޑުއަށް ދިމާވެފައިވާ ކަރަންޓުގެ މައްސަލަ މި ހަފްތާގެ ތެރޭގައި ހައްލުވާނެ ކަމަށް އެ ކޯޕަރޭޝަނުން ވަނީ މިދިޔަ އަންގާރަ ދުވަހު ބުނެފައެވެ.