މަކަރާއި ހީލަތުން އޮޅުވާލައިގެން ފައިސާ ހޯދަން މަސައްކަތްކުރި ދިވެހި އަންހެނަކު ހައްޔަރުކޮށް އެމައްސަލަ ތަހުގީގު ކުރަން ފުލުހުން ފަށައިފިއެވެ.
މިމައްސަލާގައި ހައްޔަރުކޮށްފައިވަނީ 25 އަހަރުގެ ދިވެހި އަންހެނެކެވެ.
މި އަންހެންމީހާ ހައްޔަރުކޮށްފައިވަނީ ބޭރު ގައުމެއްގެ ވިޔަފާރިވެރިއެއްގެ ނަމުގައި ރާއްޖޭގައި ވިޔަފާރި ފަށައިދޭނެކަމަށްބުނެ އޮޅުވާލައިގެން މަކަރާއި ހީލަތުން ފައިސާ ހޯދަން އުޅޭކަމުގެ މައްސަލައެއް ފުލުހުންނަށް ހުށަހެޅި އެމައްސަލައިގެ ތަހުގީގަށް ކޯޓު އަމުރެއްގެ ދަށުންކަމަށް ފުލުހުން ބުނެއެވެ. މި މައްސަލާގައި އެ އަންހެންމީހާ ހައްޔަރުކުރުމަށްފަހު އޭނާގެ ބަންދާމެދު ގޮތެއް ނިންމަން ކޯޓަށް ހާޒިރުކުރުމުން މިނިސްޓްރީ އޮފް ހޯމް އެފެއާޒުން ކަނޑައަޅާ ތަނެއްގައި ބަންދުގައި ބަހައްޓައިގެން މައްސަލަ ތަހުގީގް ކުރަން 5 ދުވަހުގެ ބަންދުގެ މުއްދަތު ކްރިމިނަލް ކޯޓުން ވަނީ ދީފައެވެ.
މަކަރާއި ހީލަތުން އެކި ގޮތްގޮތުން ފައިސާ ހޯދަން ދިވެހިންގެ ތެރެއިން ބަޔަކު ކުރަމުންދާ މަސައްކަތުގައި މިވަނީ އަނެއްކާވެސް އައު ގޮތްތަކެއް ހޯދައި އެގޮތަށް ރޭވުންތައް ރާވައި ފައިސާ ހޯދަން ފަށާފައިކަމަށާ މިކަމަކީ ދިވެހިން ހޭލުންތެރިވެ ތިބެންޖެހޭ ކަމެއްކަމަށް ފުލުހުން ބުނެއެވެ.
މަކަރާއި ހީލަތުން އޮޅުވާލައިގެން ފައިސާ ހޯދަން ބައެއް މީހުން މަސައްކަތްކޮށް، މީގެ ކުރިން ވަނީ ރީލޯޑް ކުރުވައިގެންނާއި ރާސްޓަސް ކޮށްގެން ފައިސާ ހޯދާފައެވެ. މީގެ އިތުރުން އެކި މީސްމީހުންގެ ބެންކު އެކައުންޓްގެ މަޢުލޫމާތު ހޯދައިގެން އެމީހުންގެ އެކައުންޓްތަކުން ބޮޑެތި އަދަދުތަކުން މީހުންނަށް އޮޅުވާލައިގެން ފައިސާ ހޯދާފައިވެއެވެ.
މިފަދަ މައްސަލަތައް ފުލުހުންނަށް ހުށަހެޅުމުން ފުލުހުންނާއި ކަމާގުޅުންހުރި ދާއިރާތައް ގުޅިގެން ކުރަންފެށި މަސައްކަތުން އެފަދަ މައްސަލަތައް ހިނގުން ވަނީ މަދުކުރެވިފައިވާކަމަށާ އެފަދަ ބައެއް މައްސަލަތަކުގައި ޝާމިލްވިކަމަށް ތުހުމަތު ކުރެވުނު ބައެއް މީހުންގެ މައްސަލަތައް ފުލުހުންވަނީ ތަހްގީގްވެސް ކޮށްފައިކަމަށް ފުލުހުން ބުނެއެވެ.
މަކަރާއި ހީލަތުން ފައިސާ ހޯދުމުގެ މައްސަލަތަކަކީ ރައްޔިތުންގެ ހޭލުންތެރިކަން އިތުރުވެއްޖެނަމަ ހުއްޓުވިދާނެ ކަންކަމެވެ. ޚާއްޞަ ގޮތެއްގައި ނުދަންނަ ފަރާތްތަކުން ގުޅައި އޮޅުވާލައިގެން ފައިސާ ހޯދަން މަސައްކަތްކުރިނަމަވެސް އެފަދަ ފަރާތްތަކުގެ މައުލޫމާތުގެ ސައްހަކަން ކަށަވަރު ނުވަނީސް ފައިސާގެ މުއާމަލާތްތައް ނުކުރުމަކީ މުހިއްމު ކަމެއްކަމަށް ފުލުހުން ބުނެއެވެ.