ސްރީލަންކާގެ ހަރުކަށި ބުޑިސްޓް ދީނީ އިސްވެރިއެއް ކަމުގައިވާ ގަލަގޮޑައާތޭ ގްނާނަސާރާ އިސްލާމްދީނަށް ފުރައްސާރަކޮށް، ދީނީ ރުޅިވެރިކަން އުފެއްދުމުގެ ކުށް ސާބިތުވެ 9 މަސްދުވަހަށް ޖަލަށްލުމަށް އެ ގައުމުގެ ކޯޓަކުން ޙުކުމްކޮށްފިއެވެ.
ކޮލޮމްބޯ މެޖިސްޓްރޭޓް ކޯޓުން މި ޙުކުމް ކޮށްފައިވަނީ، އޭނާ 2016 ވަނަ އަހަރު ނޫސްވެރިންގެ ބައްދަލުވުމެއްގައި ދެއްކި ވާހަކަތަކާ ގުޅިގެންނެވެ.
ބޯޑު ބަލަ ސޭނާ ކިޔާ ގައުމިއްޔަތުވާދީ ޖަމާއަތުގެ އިސްވެރިއެއް ކަމުގައިވާ ގްނާނަސާރާއަކީ، ކުރިންވެސް މުސްލިމުންނާ ދެކޮޅު އަނިޔާވެރި ޢަމަލުތަކާއި ނަފްރަތުގެ ކުށްތަކަށް ތުހުމަތުކުރެވިފައިވާ މީހެކެވެ.
ނިއުސްވަޔަރގެ ރިޕޯޓެއްގައިވާ ގޮތުން، އޭނާއަށް 1،500 ރުޕީސް (4 ޕައުންޑް) ގެ ޖޫރިމަނާއެއްވެސް ކޮށްފައިވެއެވެ. އަދި މި ޖޫރިމަނާ ނުދައްކައިފިނަމަ އިތުރު މަހެއްގެ ޖަލު ޙުކުމެއް އިތުރުކުރެވޭނެއެވެ.
ގްނާނަސާރާ މި ޙުކުމާ ދެކޮޅަށް އިސްތިއުނާފަށް ހުށަހަޅާފައިވީ ނަމަވެސް، އިސްތިއުނާފުގެ މުއްދަތުގައި ދޫކޮށްލުމަށް އެދުނު އެދުން ކޯޓުން ވަނީ ބަލައިނުގެންފައެވެ.
މިއީ ގްނާނަސާރާ ޖަލަށްލެވޭ ދެވަނަ ފަހަރެވެ. އޭނާ 2018 ވަނަ އަހަރު ކޯޓަށް ހުރުމަތްތެރިކޮށް ނުހިތުމާއި ބިރުދެއްކުމުގެ ކުށުން 6 އަހަރަށް ޖަލަށްލުމަށް ޙުކުމްކުރެވުނު ނަމަވެސް، އޭރުގެ ރައީސް މައިތްރިޕާލާ ސިރިސޭނާގެ މަޢާފާއެކު 9 މަސްފަހުން ވަނީ ދޫކޮށްލާފައެވެ.
ސްރީލަންކާގެ އާބާދީގެ 9.7 އިންސައްތައަކީ މުސްލިމުންނެވެ. އެ ގައުމުގެ މުސްލިމުންގެ ގިނަ މީހުންނަކީ ސްރީލަންކަން މޫރުންގެ ދަރިކޮޅަށް ނިސްބަތްވާ، 8 ވަނަ ޤަރުނާއި 15 ވަނަ ޤަރުނާ ދެމެދު އެ ގައުމުގައި އާބާދުވި އަރަބި ވިޔަފާރިވެރިންގެ ދަރިންކަމަށް ތާރީޚުން ހެކިދެއެވެ.
Thiladhun © 2019 – 2023| Made with ❤️ in #Thiladhunmathi
Thiladhun © 2019 – 2022
Made with ❤️ in #Thiladhunmathi